Ẹzaya

32 Ghọle! Ojie dẹ gbẹloghe bhi uwedẹ nọn khiale.

Ekhaẹmhọn dẹ ha bhuohiẹn nọn gbale beji ele rẹ gbẹloghe.

 2 Ọdeọde bhi ẹwẹ ele ki diabe eji a da rẹko sade ahoho fi,

Bi eji a da rẹko* sade okpamẹn rọ.

Ọdeọde bhi ẹwẹ ele dẹ diabe ẹdẹ nọn ribhi otọ nin amẹn i ye,

Bi ọfu ọsi udede udo nan miẹn bhi otọ nọn ka amẹn an.

 3 Ẹghenin, ẹlo ọsi ene daghe i da gue,

Sẹyẹ, ene họn ẹmhọn ki ha gbehọkotọ nọnsẹn.

 4 Ene i re ẹghe obhi otọ rẹ ria eria dẹ ha ria eria nyan ebi ele luẹle.

Sẹyẹ, ene bẹmhọn* ki sabọ ha talọ nọnsẹn. Ebi ele ta ki yẹ khiakhia bhi ehọ.

 5 A i da yẹ ha tie ọria ebe ọnọn zẹ emhin bhi obọ,

Sẹyẹ, a i da yẹ ha tie ọria nọn lu ebe bha gba ọria nọn nyẹnlẹn nọnsẹn.

 6 Ranmhude, ọria ebe dẹ ta ọta ebe.

Ọle dẹ mhanmhan emhin ne bha gba bhi ọkhọle,

Beji ọle ha da re ẹbho sọtẹ da Osẹnobulua yẹ re ele ta ọta ne bha gba rẹji Jehova.

Sẹyẹ, beji a ha da miẹn ghe, a i da re ebale nin ọne ohanmhẹn gbe,

La, re amẹn nin ọne ohanmhẹn-amẹn gbe.

 7 Emhin ọbe ọria nọn lu ebe bha gba wo mhanmhan;

Ọle ki ha re obọ bhi emhin ne bha gba,*

Beji a ha da miẹn ghe, a ki re ohoghe sin obhioguele nọn ribhi ọbalọ,

Aharẹmiẹn ẹmhọanta ọne obhioguele tale.

 8 Ọkpakinọn, ọ yẹẹ ọria nọn zẹ emhin bhi obọ rẹ ha lu ẹsele,

Sẹyẹ, ọ dọnmhegbe rẹ wo ha zẹ emhin bhi obọ.

10 A ha gbera ukpe ọkpa khere, ibha nin emhin i rẹtẹ ki ha guọ,

Rẹ na bhi ẹghe nan ha rẹ munhẹn ha rọ emhin ugbo, re dọ sẹbhi ẹghe nan ha rẹ rọ emhin ugbo fo, bha i da miẹn emhin ugbo soso rọ.

Bha banọn ikpọn sibhi egbe re,

Bha ha yẹ re ukpọn-akhiẹ gba akun.

12 Bha ha gbono obọ bhi udu rẹ viẹ oya

Ranmhude ebe sunu ji ugbo nesẹbha ne manman biẹ ebale, bi ugbo eran anyọn nesẹbha ne manman mọn ikpẹ.

13 Igbẹn bi ikhiakhiọ ki vuọn otọ ọsi ẹbho nesẹmhẹn;

Ele ki vuọn ene uwa rebhe nan da sọnyẹnmhẹn,

Ehe, ele ki vuọn ọne agbaẹbho nan da dujie.

14 A mun ọne uwa nọn yoyo nan manman gbega fia;

Ẹbho i yẹ nyẹnlẹn bhi ọne agbaẹbho nan da rẹ ha kpokeke,

Ofẹl* bi uwa nan da khẹ ughe kiẹn eji a mun fia sẹsẹsẹ.

Sẹyẹ, ọ kiẹn eje yẹẹ jaki nan miẹn bhi ẹwẹ da ha kọn

Bi otọ nin ihuan da kọn.

15 Iriọ ọ da wo ha ye rẹ dọ sẹbhi ẹghe nin Osẹnobulua ha rẹ biri ẹlinmhin nọnsọle nyan mhan,

Ẹghe nin ojẹgbo ha rẹ kiẹn ugbo emekọnọn,

Sẹyẹ, a ki ha ghe ọne ugbo emekọnọn bii ẹgbo.

16 Ẹghenin, a ki ha bhuohiẹn nọn gbale bhi ọne ojẹgbo,

Sẹyẹ, ikhiale ki gba ijerebhe bhi ọne ugbo emekọnọn.

17 Ọfure ki gba ijerebhe ranmhude ghe ẹbho lu ebe gbale,

Sẹyẹ, ugbega bi ọfubhegbe nọn i da fo ghẹdẹ ki ha ribhọ ranmhude ẹbho lu ebe gbale.

18 Ẹbho nesẹmhẹn dẹ ha nyẹnlẹn bhi eje fure,

Ije kẹkẹ ne mhọn ugbega, bi ije kẹkẹ ne fu bhi egbe nan da koahu a.

19 Ọkpakinọn, a dẹ re esia riia ọne ẹgbo a,

Sẹyẹ, a ki dunmhun ọne agbaẹbho sotọ sẹsẹsẹ.

20 Eghọnghọn hi ọsi bha ne kọ emhin ọbhi egbe ẹdẹ rebhe,

Ibha ne ji ogho-ẹmena bi jaki nesẹbha da ha ribhi ugbo.”