Ẹzaya
30 Jehova yọle: “Ọkhọbhegbe hi ọsi ene imọn ne wo bhi uhọnmhọn,
Ne lu emhin nin mẹn bha je ele le,
Ne deba ẹbho kẹkẹ muobọ* arẹmiẹn mẹn bha re obọ ọbhọ,
Beji ele ha da ha lu ba olukhọ nọnsele.
2 Ele bha nọọn mẹn ebi ele ha khian yẹ, ele kuẹ diọbhi otọ Ijipt,*
Nin ele dọ nẹko bhi enin,
Bhi odotọ ugbega nọnsi Fero.*
3 Ọkpakinọn, ẹkhọle bha da miẹn bhi ugbega nin bha dọ guanọ bhi obọ Fero,
Sẹyẹ urẹko nin bha dọ rẹko bhi otọ Ijipt, iregbebhunun bha ha miẹn bhọ.
4 Ekhaẹmhọn nesọle ribhi Zoan,
Sẹyẹ ukọ nesọle sẹbhi Henis.
5 Ẹkhọle ele rebhe ha miẹn
Bhi obọ ẹbho ne i da sabọ re urẹkpa nin ele,
Ẹbho nan i miẹn urẹkpa la emhin soso bhi obọ ele.
Ẹkhọle bi iregbebhunun, ele ọkpa a miẹn bhi obọ ele.”
6 Ọnan hi ohiẹn nan bhu gbe ene elanmhẹn ne nyẹnlẹn bhi obọ ọsi saot:*
Ele muno ẹfe nọnsele ọbhi okhun jaki,
Ele muno emhin nin ele mhọn ọbhi okhun ikẹtẹkẹtẹ,
Ele muno ele rẹkhan otọ nin ọkakale bi ọbalọ ye,
Otọ nin oduman ye, oduman nọn so,
Otọ nin ọbotọ bi ẹnyẹn nọn tin ye, ẹnyẹn ne mhọn obi.
Ene ẹbho i da miẹn elele bhi ene emhin nan.
7 Ihoho urẹkpa ọsi Ijipt khin.
Bhiriọ, ebi mẹn tie ele hi: “Rehab, nọn wo dotua gbe obọ ọbhi egbe.”
8 “Bhi ejayenan nian, ha khian, gbẹn ene ẹmhọn ọbhi sileti* bhi isira ele,
Uwẹ ha yẹ gbẹn ọlẹn ọbhi ebe,
Beji a ha da miẹn ọlẹn noo bhi ẹghe odalo,
Nọn ha yi ọsali rẹ ha khian ighegheghe.
9 Ẹbho ne mhọn akan-ehọ ele khin, imọn nin eku vuọn ele obọ,
Imọn ne bha muegbe rẹ re ehọ ọbhi uhi* nọnsi Jehova.
10 Ele taman ọbo yọle, ‘Bha hẹi bọ,’
Sẹyẹ, ele taman ene miẹn imianlo yọle, ‘Bha hẹi miẹn imianlo ọsi ẹmhọanta nin mhan,
Bha ta ọta ne mhẹn bhi ehọ man mhan; bha miẹn imianlo ọsi ohoghe.
11 Bha sibhi uwedẹ nọn gbale re; bha van obọ sibhi ọne odẹ re.
Bha hẹi yẹ tẹmhọn Ọnọn Khiale Ọsi Izrẹl man mhan.’”
12 Bhiriọ, ọnan hi ebi Ọnọn Khiale Ọsi Izrẹl tale:
“Beji a miẹn bha he ọta nọnsẹmhẹn,
Sẹyẹ, bha rẹọ bhi ọta ohoghe bi ọta eku,
Yẹ mun udu nyan ele,
13 Ọne emhin ebe nan nin bha lu dẹ re ibha diabe egbuwa nọn vanọ a,
Egbuwa nọn yoyo nọn vanọ a, nọn yẹ muegbe rẹ siẹn kua.
Osukpa ọ ha rẹ wo siẹn kua, bhi ọsi iguaguako.
14 Ọ dẹ guọghọ a beji udede akhe rẹ guọghọ a,
Udede akhe nọn guọghọ a sẹsẹsẹ rẹ sẹbhọ ghe,
Osọnmhẹn ọlẹn i da kẹre nan ha miẹn rẹ gua eranlẹn,
La nan ha rẹ bhanọ amẹn bhi otọ.”*
15 Ọnan hi ebi Jehova nin Ebeanlẹn Nọn Ke Okhun Nẹ, nin Ọnọn Khiale Ọsi Izrẹl tale:
“Bha dẹ miẹn uhọnmhọn sade bha fikie bu mẹn re yẹ ku egbe ọi;
Bha dẹ miẹn ahu sade ibha bha ha kpokpo egbe bi sade bha mun udu nyan mẹn.”
Ọkpakinọn ibha bha ka lu iriọ.
16 Sokpan, ibha da yọle: “Eye, mhan dẹ hẹn akasi nẹgbe!”
Bhiriọ, bha dẹ wo nẹgbe.
Sẹyẹ, bha da yọle: “Akasi ne manman runẹ mhan ha hẹn!”
Bhiriọ, ene manman runẹ, ele da khu rẹkhan bha.
17 Itue uli* ki ha guọ ranmhude otuọnkpa nọn re ofẹn mun ele,
Bha ki nẹgbe ranmhude itue isẹn ne re ofẹn mun bha,
Rẹ sẹbhọ ghe ene ha kẹre bhi ẹwẹ bha ki dia khere bọsi eran nan re fi ba bhi okhun oke,
Ele ki dia zẹghẹ bọsi eran nan rẹ lu iyaman bhi uke oke.
18 Ọkpakinọn, Jehova wo ziẹngbe khẹ ẹghe nin ọle ha rẹ lu bha nọnsẹn.
Ọle dẹ mhọn itohan da bha.
Osẹnobulua nọn bhuohiẹn nọn gbale Jehova khin.
Eghọnghọn hi ọsi ọrebhe ne ziẹngbe khẹ ọle.*
19 Ẹghe nin ene ẹbho ha rẹ ha nyẹnlẹn bhi Zaiyọn, bhi Jerusalẹm, bha i da yẹ ha viẹ. Ahamiẹn bha viẹ bu ọle nin ọle rẹkpa bha, ọle ki mhọn itohan da bha. Ẹjẹje ọle ha rẹ wanniẹn bha sade ọle họn eviẹ nọnsẹbha. 20 Arẹmiẹn Jehova dẹ re oya nin ibha le bọsi ebale, yẹ re ọkakale nin bha wọn bọsi amẹn, Ọman-emhin Nọn Ke Okhun Nẹ nọnsẹbha i da yẹ re egbe he nin bha, bhiriọ, bha ki re ẹlo nọnsẹbha rẹ daghe Ọman-emhin Nọn Ke Okhun Nẹ nọnsẹbha. 21 Sẹyẹ, Ahamiẹn ibha bibi diọbhi obera, la bibi diọbhi agobọ, ọdeọde bhi ẹwẹ bha dẹ họn ukpuru bhi ikeke nọnsọle yọle: “Ọnan hi ọne uwedẹ. Khian rẹkhan ọlẹn.”
22 Bha ki riia isiliva nan rẹ ra amanzẹ nọnsẹbha a, bi igolu nan rẹ ra amanzẹ nesẹbha nan re emantọn lu. Bha ki ne ele kua bọsi ukpọn nin okhuo rẹ miẹn ẹghe yẹ taman ele yọle, “Bha sibhi enan re!”* 23 Osẹnobulua ki ji amẹn rọ ọbhi emhin nin bha kọle, sẹyẹ, otọ nọnsẹbha ki biẹ ebale ne mhẹn ne bunbun. Bhi ọne ukpẹdẹ nin, emhin-iri nesẹbha ki miẹn otọ ne bhiabhia nin ebale ye da ha kọn. 24 Sẹyẹ, ẹmena bi jaki nesẹbha nin bha rẹ wẹnna ki ha le ebale nan gua kugbe, ebale ne mhẹn nin iku i ye.* 25 Bhi ọne ukpẹdẹ nan ha rẹ manman gbono ẹbho a, nin ene uwa ne yoyo ha rẹ siẹn kua, ẹdẹ dẹ ha na bhi okhun ene oke rebhe nẹ kua. 26 Bhi ọne ukpẹdẹ nin Jehova ha rẹ gban iguẹ ọsi ẹbho nesọle, yẹ re egbe daan ele bhi udede itẹ nin ọle zẹ ele bhi egbe, ẹfua ọsi uki ki diabe ọsi oẹnlẹn, sẹyẹ, ẹfua ọsi oẹnlẹn ki re igba ihinlọn bhala gbera beji ọ ka ye khẹ, bọsi ẹfua ọsi ikpẹdẹ ihinlọn.
27 Ghọle, Jehova na bhi eje reele vade,*
Ohu manman ha re ọle, sẹyẹ, udede adudu amẹn nẹga ọle.
Ọle re ohu talọ,
Sẹyẹ, olanmhẹn nọnsọle diabe eranlẹn nọn manman to.
28 Inian ohiẹnhiẹn* nọnsọle diabe ẹdẹ nọn manman nẹ nọn sabọ lọ ọria sẹbhi uru.
Ọle dẹ re ohiẹnhiẹn nọnsọle khankhan ene agbaẹbho kua beji a rẹ re ayọ khankhan iku sibhi emhin re;
Sẹyẹ, ọle ki diẹn iri ene ẹbho bhi agban rẹ re ele ha bibi.
29 Ọkpakinọn, bha dẹ ha so illo beji bha rẹ so illo bhi ọsasọn
Sade bha muegbe* iluemhin nọnsẹbha,
Sẹyẹ, ọkhọle nọnsẹbha ki ha ghọnghọn
Bọsi ọria nọn khue ufele
Beji ọle rẹ khian oke nọnsi Jehova, nin Udo ọsi Izrẹl.
30 Jehova dẹ re ukpurulu nọn khua nọnsọle talọ nin ẹbho họn.
Ọle dẹ re ahu nọnsọle man bọsi eranlẹn nọn manman to,
Bọsi okpamẹn, bi bọsi avan bi esia nọn de,
Beji ọle ha rẹ re ohu re obọ nọnsọle gbehẹ eghian ọlẹn.
31 Ranmhude ukpurulu nọnsi Jehova, ofẹn ki ha mun Asiria,
Ọle ki re ukpokpo rẹ fi Asiria emhin.
32 Jehovah dẹ re obọ nọnsọle khọn Asiria.
Ẹghe rebhe nin Ọle ha rẹ re ukpokpo nọnsọle
Rẹ fi ọle emhin rẹ re oya nanlẹn,
A ki ha khue okede bi afan* rẹkhan ọlẹn.
33 A bhọ mhanmhan eji a ha da fuẹn Asiria fo,*
Ọle bi ojie nọnsọle;
Osẹnobulua si eran ne bunbun koko bhi eje dinmhin yẹ bhiabhia,
Ene eran manman wo bun, iriọ eranlẹn nọn ribhọ ha yẹ rẹ manman ha to.
Ohiẹnhiẹn nọnsi Jehova nọn diabe eranlẹn ọsi sọfọ* nọn nẹ bọsi ẹdẹ,
Ọle da mun eranlẹn ọbhọ.