Ẹzaya
29 “Ọkhọbhegbe hi ọsi Ariẹ,* Ariẹ nin agbaẹbho nin Devid da mun eko.
Bha wo ha lu iluemhin nesẹbha;
Bha ha lu ọle ukpe-ukpe.
2 Mẹn dẹ si ọbalọ ji Ariẹ,
A ki ha viẹ yẹ lu akhiẹ bhọ.
Rẹji mẹn, ọ ki kiẹn ukhuo-izọese nan da tuẹ emhin an.
3 Mẹn dẹ mun eko nẹga uwẹ bhi obọ rebhe, nin mẹn rẹ khọn uwẹ,
Mẹn dẹ gbe ogba nẹga uwẹ rẹ khue uwẹ ze
Yẹ bọn emhin rẹ hẹn okhun ogbe nọnsẹ dọ khọn uwẹ.
4 A dẹ sua uwẹ fiọbhi otọ;
Eji uwẹ ye bhi otọ uwẹ ha da ha talọ,
A i da yẹ họn ebi uwẹ ta nọnsẹn ranmhude nin uwẹ rẹ sẹ ẹlo ru bhi ẹbubu.
Otọ a da ha họn urulu nọnsẹ
Bọsi urulu ọsi ọbo nọn bọ,
Sẹyẹ, ọta nọnsẹ ki ha na ẹkẹ ẹbubu dagbare khere-khere.
5 Usun ẹbho ne yi eghian* nesẹ dẹ diabe ẹmun,
Usun ẹbho ne denyẹnyẹn ẹbho dẹ diabe iku nin ahoho hoho kua.
Ẹjẹje ọ ha rẹ sunu, bhi ọsi iguaguako.
6 Jehova nọn nyan ene eyokulo dẹ vae dọ hinmhin uwẹ,
Ọle ki noo avan, otọ nọn munvẹa, usomhin, okpahoho,
Efi, bi eranlẹn nọn manman to rẹ hinmhin uwẹ.”
7 Ẹghenin, ene usun agbaẹbho rebhe ne ne Ariẹ suan
—Ọrebhe ne nanlẹn khọnlẹn,
Ene ogbe ne yoyo nan gba nẹga ọle nan rẹ mun okhọnlẹn bu ọle,
Bi ene si ọbalọ ji ọle—
Ki diabe ẹbhohiẹ nin ọria bhohiẹ bhi ọsasọn.
8 Ehe, ọ ki diabe beji ọ dia
Sade ọria nin ohanmhẹn gbe bhohiẹ ghe ọle le ebale,
Ọkpakinọn, ọle ha riọre, ohanmhẹn ki yẹ ha gbe ọle,
Bi sade ọria nin ohanmhẹn-amẹn gbe bhohiẹ ghe ọle wọn amẹn,
Ọkpakinọn, ọle ha riọre, egbe ki lọ ọle, sẹyẹ, ohanmhẹn-amẹn ki yẹ ha gbe ọle.
Iriọ ọ ha dia rẹji ene usun agbaẹbho rebhe ne ne Oke Ọsi Zaiyọn suan.
9 Ọ dẹ han bha ilo, yẹ kiẹn emhin ọnyunuan rẹji bha;
Bha ru egbe ibha ẹlo, nin ibha hẹi yẹ daghe.
Anyọn mun ele, sokpan ele bha da anyọn;
Ele de gọgọ, sokpan ọ i yi anyọn re ele lu iriọ.
10 Jehova re ibha manman wẹ dinmhin.
Ọle gue ene akhasẹ ẹlo;
Ọle re emhin gue uhọnmhọn ọsi ene miẹn imianlo.
11 Rẹji bha, imianlo rebhe dẹ diabe ẹmhọn ne ribhi ebe nan gbanọ. Ele ha mun ọlẹn nin ọria nọn sabọ tie ebe yẹ taman ọlẹn yọle: “Huẹan, tie ọle dagbare,” ọle ki yọle: “Mẹn i da sabọ, ranmhude a gbanọ ọlẹn.” 12 Sẹyẹ, ele ha mun ọne ebe nin ọria nọn i sabọ tie ebe yẹ taman ọlẹn yọle: “Huean tie ọle,” ọle ki yọle: “Mẹn i guẹ rẹ tie ebe hiehie.”
13 Jehova yọle: “Unun, ọle ene ẹbho nan rẹ gheghe yọle ghe ele ga mẹn,
Sẹyẹ, ikpunun ele rẹ gẹn mẹn,
Sokpan, ọkhọle nọnsele i zẹwẹ ribhi eji mẹn ye;
Sẹyẹ, ele re obọ rẹkhan uhi ọsi eria nan man ele le, yẹ riale ghe imẹn ele mun ofẹn ọlẹn.
14 Bhiriọ, mẹn dẹ kie lu emhin ọhan-ilo ne bunbun rẹ han ene ẹbho nan ilo,
Mẹn dẹ lu emhin ọhan-ilo kẹkẹ;
Ẹwanlẹn ki yulu ikpia nesele ne wanlan,
Sẹyẹ, ikpia ne wanlan nesele i da yẹ ha mhọn ilẹn-otọ-emhin.”
15 Ọkhọbhegbe hi ọsi eria ne lu emhin rebhe nin ele rẹ re emhanmhan nọnsele nẹko nin Jehova.
Ẹkẹ ebiuki ele da lu iwẹnna nọnsele.
Ele ki ha yọle: “Họla kuẹ daghe mhan?
Họla kuẹ lẹn ebi mhan lu?”
16 Ghe ebi bha rẹ ha ria eria diọbhi ọhan yẹ!
Abọkpa ọ be khẹke nan rẹ ha ghe ekẹn bi ọnọn re ọle man emhin?
Ebi a manlẹn dẹ be sabọ tale rẹji ọnọn manlẹn yọle:
“Ọ i yi ọle man mẹn”?
Sẹyẹ, ebi a lu dẹ be sabọ tale rẹji ọnọn lu ọle yọle:
“Ọle bha lẹn emhin soso”?
17 Bhi ẹghe nọn bha yẹ ree nian, a dẹ re Lẹbanọn kiẹn ugbo emekọnọn,
A ki ha ghe ọne ugbo emekọnọn bii ẹgbo.
18 Bhi ọne ukpẹdẹ nin, ene yehọ ki họn ẹmhọn ne ribhi ọne ebe,
Sẹyẹ, ene ruẹlo ki ha daghe. A ki ne ele sibhi ebiuki bi ojobi nin ele rẹ ha ye re.
19 Ene mhọn ẹkẹ-omẹnhiẹn dẹ manman ha ghọnghọn ranmhude Jehova,
Sẹyẹ, ene ibhioguele dẹ ha sọnyẹnmhẹn ranmhude Ọnọn Khiale Ọsi Izrẹl.
20 Ranmhude, ene denyẹnyẹn ẹbho i da yẹ ha ribhọ.
A dẹ fuẹn ene dẹgbọ a,
Sẹyẹ, a ki fuẹn ọrebhe a ne guanọ nin ele wo ha kuan ẹbho.
21 Eria ne re ohoghe sin ẹbho rẹ re ele kiẹn eria ebe, a dẹ yẹ fuẹn ele a.
Ene ke ufi khẹ ọnọn guiẹzọ* bhi igeti ọsi agbaẹbho,
Bi ene khiẹn ẹmhọn an beji a ha da miẹn ghe, a bha bhuohiẹn nọn gbale nin ọria nọn lu nọnsẹn, a dẹ yẹ fuẹn ele a.
22 Ọnan hi ebi Jehova nọn hinmhin Ebraham tale rẹji uwa ọsi Jekọp:
“Ẹkhọle i da yẹ ha lo Jekọp,
Sẹyẹ, ẹlo nọnsọle i da yẹ luẹluẹ* a bhi uhọnmhọn.
23 Ranmhude, ọle ha daghe imọn nesọle ne nẹga ọle,
Imọn ne yi iwẹnna obọ nọnsẹmhẹn,
Ọle bi ene imọn nesọle ki ha gẹn elin nọnsẹmhẹn;
Ehe, ele ki ha gẹn Ọnọn Khiale Ọsi Jekọp.
Sẹyẹ, ele ki ha mun ofẹn Osẹnobulua ọsi Izrẹl.
24 Ene ria eria diọbhi ọhan ki dọ ha mhọn ilẹn-otọ-emhin,
Sẹyẹ, ene zaka-zunyọn ki ha miẹn adia ọbhi egbe.”