Hvernig getum við glímt við truflanir?

1, 2. Hvernig getur það sem er mikilvægt orðið að truflun?

HVENÆR varðstu síðast fyrir truflun? Kannski dró eitthvað athygli þína frá því sem þú varst að gera og þú þurftir að ákveða hvort skipti meira máli. Segjum til dæmis að síminn þinn hringi meðan þú ert að keyra. Það gæti verið mikilvægt símtal en þú gerir þér grein fyrir að á þessu augnabliki er það truflun. Þá skiptir meira máli að þú einbeitir þér að akstrinum.

² Við þurfum öll að sinna mikilvægum málum sem krefjast athygli. Við vitum að það sem skiptir mestu máli er að einbeita sér að þjónustunni við Jehóva.a (Matt. 6:33) Þjónar Jehóva reyna, eins og góðir bílstjórar, að koma auga á hvað gæti truflað athygli þeirra frá því sem er mikilvægast. – Orðskv. 4:25; Matt. 6:22.

3. Hvers vegna er gagnlegt að hugleiða hvernig við getum glímt við truflanir?

³ Ekkert okkar ætlar að láta trufla sig í þjónustunni við Jehóva. En það er bara svo margt sem getur auðveldlega truflað okkur. (Lúk. 21:34–36) Til að hjálpa okkur að einbeita okkur að þjónustu Jehóva skulum við hugleiða (1) hvaða truflanir verða á vegi okkar, (2) hvað Jesús gerði til að láta ekkert trufla sig og (3) hvernig við getum glímt við truflanir.

HVAÐA TRUFLANIR VERÐA Á VEGI OKKAR?

4–6. Hvað gæti auðveldlega truflað okkur?

⁴ Það er margt sem krefst athygli okkar. Við eigum kannski við heilsuvandamál að glíma eða önnur mál sem varða okkur sjálf eða fjölskylduna. Það er að sjálfsögðu mikilvægt að sinna þessum málum. En gætu þau farið að taka of mikið af athygli okkar? Já, ef þau eru farin að yfirtaka allan huga okkar, tíma og orku.

⁵ Auk þess búa mörg okkar við óróa og ofbeldi, slæmt efnahagsástand eða farsóttir. (2. Tím. 3:1) Við slíkar aðstæður getum við orðið svo áhyggjufull að við hugsum stöðugt um erfiðleikana.

⁶ Kannski hefur líf einhverra sem við þekkjum farið á hvolf út af slíkum aðstæðum. Þeir eru skiljanlega undir miklu tilfinningaálagi. Við erum ekki hönnuð til að vera undir slíku álagi í langan tíma. Það er engin furða að sumum finnst fótunum hafa verið kippt undan sér. Sumir bregðast við slíku álagi með því að fylla líf sitt með skemmtun og afþreyingu. Hvað getum við gert ef við erum í þessum aðstæðum? Skoðum hvernig við getum lært af Jesú að láta ekkert trufla tilbeiðslu okkar.

HVAÐ GERÐI JESÚS TIL AÐ LÁTA EKKI TRUFLA SIG?

7. Hvað hefði getað truflað Jesú?

⁷ Ýmislegt hefði getað truflað Jesú, eins og félagsleg og pólitísk ágreiningsmál. Á þeim tíma glímdu margir við fátækt og veikindi. (Matt. 14:14; Mark. 14:7) Þeir þurftu að þola óréttlæti af hendi Rómverja og samlanda sinna. Sumir sem sáu Jesú gera kraftaverk vildu gera hann að konungi. (Jóh. 6:14, 15) Auk þess beindi Satan spjótum sínum að Jesú. Hann reyndi að freista hans til að stytta sér leið í að fá völd yfir heiminum. (Matt. 4:8, 9) Og Pétur postuli, einn af nánustu vinum Jesú, reyndi að fá hann til að auðvelda sér lífið þegar hann sagði: „Hlífðu þér, Drottinn.“ – Matt. 16:21, 22.

8. Hvað gerði Jesús til að láta ekki trufla sig?

⁸ Hvað gerði Jesús til að láta ekki trufla sig í þjónustu Jehóva? Í fyrsta lagi tileinkaði hann sér hugsunarhátt Jehóva. (Jóh. 8:28; 14:9) Í öðru lagi var hann upptekinn í þjónustu hans. (Matt. 9:35) Og í þriðja lagi hafði hann skýrt í huga hvað skipti mestu máli. (Jóh. 4:34) Hann hafnaði boði Satans mjög ákveðið og lét ekki undan Pétri þótt hann meinti vel þegar hann hvatti hann til að hlífa sér. (Matt. 4:10; 16:23) Jesús lét ekki það sem fólk hugsaði, sagði eða gerði draga athygli sína frá því að gera vilja Jehóva. Við verðum kannski ekki fyrir sömu truflunum og Jesús. En með því að gera eins og hann getum við forðast að láta trufla okkur.

HVAÐ GETUM VIÐ GERT TIL AÐ LÁTA EKKI TRUFLA OKKUR?

9. Hvað bendir Efesusbréfið 5:17 okkur á að við þurfum að gera?

⁹ Tileinkum okkur hugsunarhátt Jehóva. Það hjálpar okkur að skilja hvað Jehóva vill að við gerum til að gleðja hann. (Lestu Efesusbréfið 5:17.) Við gerum það með því að lesa og hugleiða orð hans. Við getum gert þetta þótt Biblían tali ekki beint um okkar aðstæður. Hvernig gerum við það? Með því að læra að skilja hvernig Jehóva hugsar og vera fús til að láta hann leiðbeina okkur.

10. Hvernig getum við lært að skilja hvernig Jehóva hugsar?

¹⁰ Við getum lært að skilja hvernig Jehóva hugsar með því að rannsaka Biblíuna og samskipti hans við menn. (Jer. 45:5) Þegar við lesum frásögur hennar getum við spurt okkur spurninga eins og: Hvað segir þetta mér um Jehóva? Hvernig get ég notað þetta til að aðlaga mína hugsun hans hugsun? Hugsanir hans eru að sjálfsögðu hærri okkar hugsunum. (Jes. 55:9) Við leitum því að sjálfsögðu til hans til að fá leiðbeiningar. (Sálm. 143:10) Og við biðjum líka til hans um hjálp til að hugsa eins og hann. – 1. Jóh. 5:14.

11. Hvers óskar Jehóva okkur?

¹¹ Þegar við tileinkum okkur hugsunarhátt Jehóva áttum við okkur á því að hann vill að við forðumst truflanir og séum tilbúin þegar endir þessa heimskerfis kemur. (Matt. 24:44) Hann vill ekki að áhyggjur íþyngi okkur. (Matt. 6:31, 32) Hann gefur okkur því góð ráð til að takast á við áhyggjur varðandi heilsuna, vinnuna, heimilið og fjölskylduna. Hann hvetur okkur til að reiða okkur á sig til að fá visku og styrk til að takast á við vandamálin. – Sálm. 55:22; Orðskv. 3:5–7.

12. Hvernig getum við tekist á við áhyggjur af því sem er að gerast í heiminum? (Matteus 5:3)

¹² Verum upptekin í þjónustunni við Jehóva. Við höfum öll einhverjar áhyggjur af því sem er að gerast í heiminum. En þar sem það er ekki á okkar valdi að leysa vandamálin ættum við að einbeita okkur að þjónustunni við Jehóva til að þau trufli okkur ekki um of. Við höldum gleðinni ef við vinnum að því að sinna andlegri þörf okkar – þörf sem Jehóva skapaði okkur með. (Lestu Matteus 5:3.) Við getum sinnt þessari þörf með því að kynnast Jehóva í orði hans, Biblíunni, og gera eins vel og við getum í þjónustu hans. Þá gleðjum við líka Jehóva vegna þess að við notum tímann skynsamlega. – Orðskv. 23:15.

13. Hvernig getum við notað tímann sem best?

¹³ Við erum ákveðin í að ‚nota tímann sem best‘. (Ef. 5:15, 16; sjá skýringu við „notið tímann sem best“ í námsbiblíunni á tungumáli sem þú skilur.) Biblían er ekki einfaldlega að leggja til að við notum tíma okkar betur í daglegu lífi. Hún er að segja okkur að hugsa vandlega um hvernig við notum tíma okkar áður en Jehóva bindur enda á þetta illa heimskerfi. Hvernig notum við tíma okkar sem best? Ef við notuðum mikinn tíma í að fylgjast með öllum slæmu fréttunum sem berast stöðugt gæti það truflað okkur, gert okkur niðurdregin og við yrðum ekki eins kappsöm í þjónustu Jehóva. Það er miklu betra að setja því takmörk hversu mikið við horfum og hlustum á fréttir. Þannig höfum við meiri tíma og orku til að þjóna Jehóva. Það er líka verðugt markmið að auka þjónustu okkar á þeim sviðum sem við getum, eins og til dæmis að vera duglegri við að heimsækja áhugasama aftur. Við skiljum að það er mjög mikilvægt að nota hvert tækifæri sem við höfum til að hjálpa fólki svo að það „bjargist og fái nákvæma þekkingu á sannleikanum“. – 1. Tím. 2:4.

14. Hvernig hjálpar það að vera upptekin í þjónustu Jehóva okkur? (Sjá einnig mynd.)

¹⁴ Við sjáum atburði heimsins í réttu ljósi þegar við erum upptekin í þjónustunni við Jehóva. Það setur okkur ekki á hliðina að verða vitni að óróa og ofbeldi, slæmu efnahagsástandi og farsóttum. Við áttum okkur á hvað þetta þýðir í raun – spádómar Biblíunnar eru að koma fram. Við getum haldið ró okkar og treyst því að Jehóva hjálpi okkur í gegnum þennan tíma í stað þess að láta óttann ná tökum á okkur. Við þekkjum fyrirætlun Jehóva. – Sálm. 16:8; 112:1, 6–8.

15. Hvað ættum við að gera samkvæmt 1. Pétursbréfi 4:7 og hvers vegna?

¹⁵ Höfum skýrt í huga hvað er mikilvægt. Margir nú á dögum eru uppteknir af afþreyingu en hugsa ekki um að þetta heimskerfi er að syngja sitt síðasta. Afþreying á vissulega rétt á sér en við þurfum að vera skynsöm til að láta þennan heim ekki hafa áhrif á okkur. (Lestu 1. Pétursbréf 4:7.) Þetta hjálpar okkur að taka góðar ákvarðanir og nota ekki of mikinn tíma til að skemmta okkur. Slíkar ákvarðanir sýna að við viljum hugsa eins og Jehóva og að við skiljum hvað skiptir mestu máli. – 2. Tím. 1:7.

16. Að hverju einbeitti Jesús sér rétt áður en hann dó?

¹⁶ Jesús gleymdi aldrei hvað skipti mestu máli. Hann einbeitti sér að því að vera trúr síðustu stundirnar sem hann lifði, en þær voru mjög erfiðar. Og hann einbeitti sér að því að klára verkefnið sem Jehóva fól honum. Hann bað því ákaft. En lærisveinarnir gerðu það ekki og voru ekki á varðbergi eins og Jesús heldur sofnuðu. Þeir voru „örmagna af hryggð“. – Lúk. 22:39–46; Jóh. 19:30.

17. Hvers vegna nota margir samfélagsmiðla en hvernig getur það verið gildra? (Sjá einnig mynd.)

¹⁷ Við getum, eins og lærisveinar Jesú, orðið tilfinningalega lúin. Atburðir á tíma endalokanna geta valdið okkur kvíða og áhyggjum. Margir flýja á samfélagsmiðlana til að dreifa huganum. Þeir nota þá til að vera í sambandi við fjölskyldu og vini víðs vegar um heiminn. Þannig deila þeir með þeim fréttum, myndum og fleiru. Og þeir nota þá líka í alls konar afþreyingu. En framboðið af efni er mikið og fólk getur orðið svo niðursokkið að það notar mest af tíma sínum og orku í að fylgjast með öllu því nýjasta. Til að falla ekki í þá gryfju gætum við spurt okkur: Hvernig líður mér þegar ég hef verið á samfélagsmiðlunum? Er ég endurnærður eða hefur það tekið athygli mína frá því sem skiptir mestu máli?

18. Hvers vegna þurfum við að hafa góða dómgreind þegar við veljum okkur afþreyingu?

¹⁸ Við þurfum líka að sýna góða dómgreind þegar við horfum á kvikmyndir eða sjónvarpsþætti á streymisveitum, skoðum myndbönd á netinu eða spilum tölvuleiki. Þetta getur verið gaman og hjálpað okkur að vinda ofan af okkur. En við þurfum að hafa góða dómgreind til að ákveða hvernig og hversu mikið afþreyingarefni við veljum. Við erum stöðugt mötuð á nýjum tillögum að efni til að horfa á og ofbeldi og siðleysi gæti farið að freista okkar. Trúbróðir okkar í Asíu féll í þessa gryfju. Hann byrjaði á að horfa á stiklur úr kvikmyndum á netinu. Með tímanum var hann farinn að horfa á stiklur með siðlausu efni. Að lokum fór hann að horfa á klám. Sem betur fer náði hann að stoppa þetta með hjálp öldunganna og stuðningi góðra vina. Hann tók þetta föstum tökum – eyddi streymisveituforritum og setti sér tímamörk um símanotkunina. Reynsla hans sýnir vel að við þurfum á góðri dómgreind að halda þegar við veljum okkur afþreyingu.

19. Hvað getur gerst ef líf okkar snýst um afþreyingu?

¹⁹ Við þurfum líka að nota góða dómgreind þegar kemur að því að slaka á og fara í frí. Við þurfum öll á því að halda að slaka á og taka okkur frí öðru hvoru. Það gerir okkur gott og stuðlar að góðri heilsu. En ef við erum of upptekin af því hættum við á að missa jafnvægið og á að það sem er mikilvægt verði út undan. (Fil. 1:10) Við þurfum öll að taka eigin ákvörðun um hvað við gerum og hversu mikinn tíma við notum í það. Spyrðu þig: Sýni ég góða dómgreind með því hversu mikinn tíma ég nota í afþreyingu og frí? Get ég sagt að ég meti það sem er mikilvægt og sé að búa mig undir ‚endi allra hluta‘?

20. Hvaða gagn höfum við af því að varast truflanir?

²⁰ Það er okkur til gagns að varast að láta trufla þjónustu okkar við Jehóva. (Jes. 48:17) Með hans hjálp eigum við auðveldara með að takast á við erfiðleika lífsins. Heimsatburðir trufla okkur þá síður. Og við forðumst að eyða of miklum tíma í afþreyingu og skemmtun. Verum því áfram ákveðin í að tileinka okkur hugsunarhátt Jehóva. Verum upptekin við að þjóna honum. Og höfum skýrt í huga hvað skiptir mestu máli. Þegar við gerum það forðumst við ekki bara truflanir heldur getum við „haldið fast í vonina um hið sanna líf“. – 1. Tím. 6:19.