Bætum kennsluhæfnina í boðuninni

1. Hvaða færni ættum við að þjálfa upp og hvers vegna? (2. Tímóteusarbréf 4:2) (Sjá einnig mynd.)

JESÚS sagði við fylgjendur sína: „Gerið fólk af öllum þjóðum að lærisveinum … og kennið því að halda öll fyrirmæli mín.“ (Matt. 28:19, 20) Allir þjónar Guðs ættu því að vera kennarar. Jehóva dregur þá til sín sem ‚hafa það hugarfar sem þarf‘ og englarnir hjálpa okkur að finna þá. (Post. 13:48; Jóh. 6:44; Opinb. 14:6) En við þurfum samt að leggja okkar af mörkum. Sjáum hvað við getum lært af postulunum Páli og Barnabasi. Biblían segir að þeir hafi ‚talað þannig að mikill fjöldi bæði Gyðinga og Grikkja tók trú‘ þegar þeir fluttu fagnaðarboðskapinn í samkundunni í Íkóníum. (Post. 14:1) Það leikur enginn vafi á því að Páll og Barnabas höfðu lagt sig fram um að vera góðir kennarar. (Lestu 2. Tímóteusarbréf 4:2.) Allir þjónar Guðs ættu að þjálfa upp kennsluhæfni sína.

2. Hvers vegna gæti sumum þjónum Guðs fundist að þeir geti ekki bætt kennsluhæfni sína?

² Sumum finnst þeir ef til vill ófærir um að bæta kennsluhæfni sína vegna þess að þeir hafa ekki nógu mikla menntun eða hæfileika. Biblían minnist á menn sem fundu líka til vanmáttar. (2. Mós. 4:10; Jer. 1:6) Öðrum finnst þeir kannski ekki hafa nógu mikla kennsluhæfileika vegna þess að þeir virðast ekki ná sama árangri og aðrir. Auðvitað bregðast ekki allir sem við hittum jákvætt við fagnaðarboðskapnum. Og árangurinn veltur ekki eingöngu á því sem við gerum. Eins og komið hefur fram sjá Jehóva og englarnir til þess að einlægir einstaklingar finnist. Við viljum samt sem áður gera okkar besta til að kynna boðskapinn á aðlaðandi hátt. Þessi námsgrein fjallar um hvernig við getum bætt kennsluhæfni okkar á þrjá vegu.

LÁTUM OKKUR ANNT UM ÁHEYRENDUR OKKAR

3. Hvers vegna náði Jesús að snerta hjörtu áheyrenda sinna?

³ Biblían segir um Jesú: „Hann vissi hvað bjó í mönnunum.“ (Jóh. 2:25) Þessi orð gefa til kynna að Jesús hafi þekkt hugsanagang fólks og hvatir. Hann gat snert hjörtu áheyrenda sinna vegna þess að hann vissi hvers þeir þörfnuðust. Hann sá að fólk var andlega vannært og undirokað af ótal siðum og reglum manna. (Matt. 9:36; 23:4) Hann tók einmitt þetta fyrir í fjallræðunni. Margir löðuðust að Jesú vegna þess að hann talaði um mál sem snertu þá persónulega.

4. Hvernig getum við sýnt að okkur sé annt um fólk? (Sjá einnig myndir.)

⁴ Við getum sýnt að okkur sé annt um fólk sem við hittum með því að reyna að skilja áhyggjur þess. Allir sem við boðum trúna verða á einn eða annan hátt fyrir áhrifum af spilltu heimskerfi Satans. Ef við höfum það í huga eigum við auðveldara með að sýna fólki á svæði okkar samkennd. Er til dæmis eitthvað búið að vera í fréttum sem fólk hefur áhyggjur af? Óttast foreldrar um öryggi barna sinna í skólanum? Eru margir atvinnulausir á svæðinu? Reyndu að ímynda þér að lifa á þessum ‚hættulegu tímum‘ án vonarinnar sem Biblían veitir. – 2. Tím. 3:1; Jes. 65:13, 14.

5. Hvernig var Jesús ólíkur faríseunum sem kennari? (Matteus 11:28–30)

⁵ Jesú var annt um áheyrendur sína og þeir fundu það á því hvernig hann kom fram við þá. Hann var gjörólíkur faríseunum sem litu niður á almenning og álitu hann fyrirlitlegan. (Matt. 23:13; Jóh. 7:49) Jesús kom fram við fólk af góðvild og virðingu. Hann var „ljúfur í lund og lítillátur í hjarta“ og það gerði hann að góðum kennara. (Lestu Matteus 11:28–30.) Við ættum líka að sýna áheyrendum okkar góðvild og virðingu.

6. Hvernig getum við sýnt þeim góðvild og virðingu sem hafna boðskap okkar eða standa gegn okkur?

⁶ Sumir hafna boðskap okkar eða standa jafnvel gegn okkur. Hvernig ættum við að bregðast við? Jesús sagði að við ættum að gera meira en einfaldlega að þola andstöðu. Hann sagði: „Gerið þeim gott sem hata ykkur, blessið þá sem bölva ykkur og biðjið fyrir þeim sem smána ykkur.“ (Lúk. 6:27, 28) Við eigum auðveldara með að gera þetta ef við látum þá sem koma þannig fram njóta vafans. Sumir eru vissulega harðir andstæðingar. En aðrir eru kannski undir álagi vegna fjölskylduvandamála eða með einhverjar aðrar áhyggjur sem hafa ekkert með okkur að gera. Við komum kannski bara á vondum tíma. Við ættum ‚alltaf að vera vingjarnleg í tali og krydda mál okkar með salti. Þá vitum við hvernig við eigum að svara hverjum manni.‘ (Kól. 4:6) Við móðgumst síður og getum orðið betri kennarar ef við höfum samkennd með fólki og reynum að skilja þarfir þess.

TREYSTUM ORÐI GUÐS

7. Hvernig sýndi Jesús að hann treysti á orð Guðs þegar hann kenndi? (Jóhannes 7:14–16)

⁷ Jesús treysti ekki á eigin þekkingu. Hann byggði kennslu sína á orði Guðs og kenndi þannig að áheyrendur hans áttu auðvelt með að skilja og muna það sem hann sagði. Í Biblíunni segir að Jesús hafi kennt „eins og sá sem hefur vald en ekki eins og fræðimennirnir“ og að fólk hafi verið „agndofa yfir kennslu hans“. (Mark. 1:22; sjá skýringu við „ekki eins og fræðimennirnir“ í námsbiblíunni á tungumáli sem þú skilur.) Fræðimenn á dögum Jesú vitnuðu í mikilsvirta rabbína til að gefa kennslu sinni aukið vægi. Jesús vitnaði hins vegar oft í innblásið orð Guðs. Þar sem hann var sonur Guðs og hafði áður verið á himnum hefði hann getað slegið um sig með gríðarlegri þekkingu og kaffært áheyrendur sína með henni. En hann gerði það ekki heldur beindi hann athyglinni að vilja Guðs og orði hans. (Lestu Jóhannes 7:14–16.) Jesús setti fylgjendum sínum einstakt fordæmi.

8. Hvernig fylgdi Pétur fordæmi Jesú?

⁸ Lærisveinar Jesú treystu líka á orð Guðs þegar þeir kenndu. Tökum til dæmis ræðuna sem Pétur postuli flutti á hvítasunnudag árið 33. Pétur var ekki hámenntaður en snerti þó hjörtu hlustenda sinna með því að útskýra út frá Ritningunum hvernig spádómarnir rættust á Jesú. (Post. 2:14–37) Hver var árangurinn? „Þeir sem tóku fúslega við boðskap hans létu skírast og á þeim degi bættust við um 3.000 manns.“ – Post. 2:41.

9. Hvers vegna ættum við að reiða okkur á orð Guðs þegar við kennum?

⁹ Orð Guðs er besta hjálpargagnið til að snerta hjörtu áheyrenda okkar. (Hebr. 4:12) Við þurfum þess vegna að beina athyglinni að Biblíunni þegar við kennum. Við viljum „boða orðið“ en ekki eigin hugmyndir. (2. Tím. 4:2) Í Orðskviðunum 2:6 segir: „Jehóva veitir visku, af munni hans kemur þekking og hyggindi.“ Við erum því á vissan hátt að leyfa Jehóva að tala þegar við sýnum fólki hvað Biblían segir. (Mal. 2:7) Við viljum að fólk viti að það sem hún hefur að geyma er miklu æðra visku manna. Hún er innblásin af Guði og veitir þekkingu sem við þurfum til að gleðja skapara okkar og eiga hamingjuríkt líf. – 2. Tím. 3:16, 17.

10. Hvernig getum við beint athygli biblíunemanda að orði Guðs?

¹⁰ Vertu vakandi fyrir því að beina athygli nemandans að því sem Biblían kennir þegar þú býrð þig undir að stýra biblíunámskeiði. Hann þarf að skilja að Biblían er aðalkennslubókin þótt við notum líka myndir og myndbönd í kennslunni. Flettu því upp lykilversunum í námsefninu og hjálpaðu nemandanum að skilja aðalatriðin. Og þegar þú notar myndir og myndbönd skaltu beina athygli hans að meginreglum Biblíunnar. Þú þarft ekki að tala mikið eða lesa mjög mörg biblíuvers til að ná þessu markmiði. Gefðu nemandanum nægan tíma til að skilja hvað versið merkir. Stundum getur verið nauðsynlegt að lesa versið aftur. Með þessu móti kennum við það sem Biblían kennir, ekki bara hvað bók, mynd eða myndband segir. – 1. Kor. 2:13.

11, 12. (a) Hvernig sýnum við biblíunemendum þolinmæði? (Postulasagan 17:1–4) (Sjá einnig mynd.) (b) Hverju gera sumir sér ekki grein fyrir varðandi Biblíuna og hvernig getum við hjálpað þeim?

¹¹ Ef nemanda þínum finnst erfitt að skilja það sem þið eruð að fjalla um skaltu muna að „boða orðið … með mikilli þolinmæði“. Það taka ekki allir framförum á sama hraða. Sumir þurfa kannski aðeins lengri tíma til að meðtaka sannindi sem okkur finnst auðvelt að skilja. Páll þurfti að boða Gyðingum í Þessaloníku trúna í nokkur skipti og rökræða við þá út frá Biblíunni. Þá skildu sumir þeirra boðskapinn. – Lestu Postulasöguna 17:1–4.

¹² Önnur leið til að sýna biblíunemanda þolinmæði er að gefa honum nægan tíma til að svara spurningum í stað þess að tala of mikið sjálfur. Reyndu að hlusta vel og skilja hvernig hann hugsar. Lestu síðan og ræddu um ákveðin biblíuvers til að hjálpa honum að skilja hvernig Guð hugsar. Mundu líka að sumir hafa enga þekkingu á Biblíunni. Myndi hjálpa að sýna honum prentaða útgáfu af henni? Til að sýna honum hversu miklar upplýsingar Biblían hefur að geyma gætirðu bent honum á „Kynningu á orði Guðs“ fremst í Nýheimsþýðingunni. Þú gætir útskýrt hvernig Biblían getur nýst honum með því að sýna honum eitt eða tvö vers undir spurningu 15 um það hvernig Biblían getur hjálpað okkur að finna hamingju. Ef þú sýnir biblíunemanda þínum hversu dýrmætt orð Guðs er skilar það meiri árangri.

BEINUM ATHYGLINNI AÐ JEHÓVA

13. Að hverjum ættum við að beina athygli nemandans þegar við kennum? Lýstu með dæmi.

¹³ Markmið okkar er að hjálpa áheyrendum okkar að kynnast Jehóva og nálgast hann. (Jak. 4:8) Við getum líkt þessu við vinnu ljósamanns í leikhúsi. Þegar sýningin stendur yfir beinir hann ekki ljósunum að sjálfum sér. Hann beinir þeim að aðalpersónunum og sér til þess að þær séu í sviðsljósinu. Við ættum á líkan hátt að beina athyglinni að Jehóva en ekki okkur sjálfum þegar við kennum öðrum.

14. Hvernig getum við beint athygli nemanda okkar að Jehóva?

¹⁴ Glæddu löngun hjá biblíunemanda þínum til að gleðja Jehóva. (Orðskv. 27:11) Þú ert ekki að kenna honum að gera það sem er rétt og forðast það sem er rangt til þess eins að verða vottur Jehóva. Þú vilt að nemandi þinn geri breytingar til að gleðja Jehóva. Ef hann er að reyna að losa sig við slæman ávana skaltu spyrja hann spurninga eins og: Hvers vegna hatar Jehóva slíkt? Hvers vegna vill Jehóva að þú hættir að gera eitthvað sem þér finnst gott? Hvernig sýnir þetta að Jehóva elskar þig? Því meira sem þú færð nemanda þinn til að hugsa um Jehóva því betur skilur hann hversu yndislegur faðir hann er. Og þegar hann gerir það getur það fengið hann til að langa til að gleðja Jehóva.

HÖLDUM ÁFRAM AÐ BÆTA KENNSLUNA

15. Hvað getur þú gert til að halda áfram að bæta kennsluhæfni þína?

¹⁵ Þú getur beðið Jehóva í bæn um að hjálpa þér að sjá hvað þú þarft að gera til að bæta kennsluhæfni þína. (1. Jóh. 5:14) Þú getur breytt í samræmi við bænir þínar með því að taka vel eftir hvernig Jehóva veitir þjálfun á safnaðarsamkomum. Þú gætir boðið hæfum bróður eða systur að koma með þér þegar þú stýrir biblíunámskeiði. Spyrðu síðan hvað þú getir gert til að taka framförum. Mundu líka að þótt þú þekkir námsefnið gerir nemandinn það ekki. Reyndu að sjá efnið með hans augum. Hjálpaðu honum síðan að skilja hversu gagnlegt það er sem hann er að læra og það sem Jehóva lofar okkur. Það getur hvatt hann til að eignast náið vináttusamband við Jehóva og fært honum sanna hamingju. – Sálm. 1:1–3.

16. Hvers vegna er gagnlegt að halda áfram að bæta kennsluhæfni okkar?

¹⁶ Ein mesta gleði sem við njótum er að fræða aðra um Jehóva. Og í nýjum heimi Guðs þurfa margir á kennslu að halda. Höldum því áfram að láta okkur annt um þá sem við fræðum, að reiða okkur á orð Jehóva og að beina athyglinni að honum þegar við boðum fagnaðarboðskapinn. Þannig bætum við kennsluhæfni okkar.