Gæska Jehóva „á hinum síðustu dögum“

„Komið, förum upp á fjall [Jehóva].“ — Jesaja 2:3.

1, 2. (a) Hvaða alvarleg hætta ógnar nú mannkyninu? (b) Hvað segja veraldarleiðtogar um Harmagedón?

‚HINIR SÍÐUSTU DAGAR.‘ Hvers vegna koma þessi orð aftur og aftur fyrir í spádómum Biblíunnar? Merkja þau að dagar mannkynsins séu taldir og að lokum muni jörðin okkar og allt líf á henni fyrirfarast í einhverjum alheimshamförum? Veraldarleiðtogar tala oft áhyggjufullir um slíkan möguleika. Í sjónvarpsviðtali þann 13. janúar 1985 aðvaraði til dæmis þáverandi utanríkisráðherra Sovétríkjanna, Andrei Gromyko, þjóð sína við því að „alvarleg hætta, alvarleg ógnun vofði yfir öllu mannkyninu.“ Hann hélt áfram: „Gera ætti allt sem hugsast getur til að bægja þessari ógnun frá svo að Harmagedón, sem fólk hefur óttast um aldaraðir, verði ekki.“

² Við fjölmörg tækifæri hefur Ronald Reagan Bandaríkjaforseti einnig minnst á Harmagedón. Dagblaðið Daily News í New York hafði eftir honum þann 30. október 1983: „Ég leiði hugann að spámönnum ykkar til forna í Gamlatestamentinu og táknunum sem boða Harmagedón, og ég get ekki varist þeirri hugsun hvort — hvort við séum sú kynsloð sem mun sjá það verða.“ Þann 8. febrúar 1985 mátti lesa þessa frétt í The Wall Street Journal: „Reagan forseti segist hugsa og tala um Harmagedón . . . en hann er ekki að leggja á ráðin um það.“

3. (a) Hvað er Harmagedón? (b) Hvað er átt við með orðunum „hinir síðustu dagar“?

³ Já, leiðtogar veraldar tala um Harmagedón. En gera þeir sér ljóst hvað þetta biblíuorð merkir? Bersýnilega ekki því að Harmagedón er ekki kjarnorkubál af mannavöldum. Það er alheimsstríð Guðs þegar hann og samkonungur hans, Jesús Kristur, fullnægja dómi á óguðlegum þjóðum og óguðlegum mönnum. Það kemur sem hápunktur ‚hinna síðustu tíma.‘ (Daníel 10:14; Opinberunarbókin 16:14, 16) Og hvað eigum við að skilja með orðunum ‚hinir síðustu tímar‘ eða „hinir síðustu dagar‘? Sumar aðrar biblíuþýðingar tala um „endi daganna“ og „síðari endi daganna.“ (Buhl, dönsk þýðing, Young) Hebresku orðin, sem eru þýdd þannig, eru achariþ hayyamim. Samkvæmt Theological Dictionary of the Old Testament (Guðfræðiorðabók yfir Gamlatestamentið) merkja þessi orð oft „lokatíminn“ og vísa þá ekki aðeins til framtíðarinnar almennt heldur „hvernig sagan nær hápunkti sínu; lyktir hennar.“

4. Hvernig mun „lokatíminn“ fullnast og með hvaða árangri?

⁴ Í um það bil 70 ár hefur mannkynið lifað tímabilið sem nefnt er ‚endalok veraldar‘ og Jesús sagði fyrir um í Matteusi 24:3-25:46. Þetta tímabil, sem hófst árið 1914, er ‚lokatíminn‘ þegar atburðarásin færist skref fyrir skref nær hástigi sínu. Þá verður ‚þrengingin mikla‘ þegar öllu hinu illa skipulagi Satans verður gereytt. (Matteus 24:21, 22) Lyktir málsins verða þær að hið helga nafn Jehóva verður hreinsað af allri smán. — Esekíel 38:16, 23.

Gæska Jehóva

5. Hvaða hvetjandi orð er að finna í Hósea 3:5?

⁵ Jehóva er Guð sem veitir hvatningu. Á við og dreif um orð sitt, heilaga Biblíu, hefur hann dreift örvandi hvatningarorðum! Einn þeirra staða er Hósea 3:5 þar sem stendur: „Eftir það munu Ísraelsmenn snúa sér og leita [Jehóva], Guðs síns, og Davíðs, konungs síns, og þeir munu á hinum síðustu dögum flýja til [Jehóva] og til hans blessunar.“

6. Hvernig hefur hinn andlegi Ísrael aðskilið sig frá sértrúarhópum kristna heimsins?

⁶ Leifar Ísraels sneru heim úr útlegð í Babýlon árið 537 e.o.t. til að taka upp á ný tilbeiðslu á Jehóva í Jerúsalem. Svipað gerðist á okkar tímum þegar hinar smurðu leifar Ísraels ‚sneru við‘ árið 1919 úr fjötrum í skipulagi Satans og ‚leituðu í einlægni Jehóva Guðs síns.‘ Hversu ólíkir eru þeir ekki fráhvarfshópum kristna heimsins! Enginn þeirra vill viðurkenna Jehóva sem ‚Guð sinn.‘ Í stað þess að ‚leita Jehóva‘ forðast þeir algerlega að nota nafn hans.

7. Hvernig hafa þjónar Jehóva heiðrað nafn hans?

⁷ Snemma á „hinum síðustu dögum,“ þann 1. janúar 1926, birti enski Varðturninn grein með hinum krefjandi titli „Hver vill heiðra Jehóva?“ Leifar hins andlega Ísraels, sem safnað hafði verið á ný, svöruðu drottinhollir þessu kalli og árið 1931 fögnuðu þeir því að taka sér nafnið vottar Jehóva. (Jesaja 43:10, 12) Enn þann dag í dag halda þeir nafni Jehóva hátt á lofti fyrir jarðarbúum. Árið 1984 gáfu þeir til dæmis út í milljónaupplagi á fjölmörgum tungumálum fallegan bækling í litum sem bar heitið Nafn Guðs sem vara mun að eilífu.

8, 9. (a) Hvað er átt við með því að ‚leita Davíðs, konungs síns‘? (b) Hvenær og hvar var konungurinn settur í hásæti? (c) Hvernig fengu þjónar Jehóva skilning á þessu máli?

⁸ En Hósea hafði líka spáð því að þessir andlegu synir myndu „snúa sér og leita . . . Davíðs konungs síns.“ Ísrael að holdinu hafði engan konung haft frá því að konungsætt Davíðs var kollvarpað árið 607 f.o.t. Þar með hófst 2520 ára stjórn án hlutdeildar Guðs — „tímar heiðingjanna“ eða tilteknar tíðir þjóðanna. (Lúkas 21:24; Daníel 4:16) En árið 1914, þegar „hinir síðustu dagar“ hófust, setti Guð hann sem Davíð var táknmynd um — Jesú Krist — í hásæti sem konung í Síon, ‚hinni himnesku Jerúsalem.‘ — Hebreabréfið 12:22; Sálmur 2:6.

⁹ Þjónar Jehóva á jörðinni skildu ekki samstundis allt þetta. Leit þeirra að ‚Davíð, konungi sínum,‘ náði samt sem áður hámarki þegar enski Varðturninn birti þann 1. mars 1925 greinina „Fæðing þjóðarinnar.“ Þar voru lagðar fram traustar sannanir, byggðar á Opinberunarbókinni 12. kafla, fyrir því að messíasarríki Jehóva hefði fæðst á himnum árið 1914 og að Kristur ‚ríkti núna mitt á meðal óvina sinna.‘ — Sálmur 110:1, 2; 2:1-6.

10. (a) Hverjir ‚koma skjálfandi til Jehóva‘ og hvernig? (b) Hvers vegna er ‚ótti Jehóva‘ svona þýðingarmikill núna?

¹⁰ Hinar smurðu leifar, og raunar allir sem vígja sig Jehóva, eru sér sárlega meðvitandi um syndir sínar sem þeir drýgðu fyrrum. Í auðmýkt hafa þeir „komið skjálfandi til Jehóva“ og beðið hann fyrirgefningar á sínum fyrri syndum. (Hósea 3:5, NW) Og núna stefna „hinir síðustu dagar“ að hámarki sínu og þeir sem elska Jehóva verða að gæta þess betur en nokkru sinni fyrr að þeir brjóti ekki gegn Guði og réttlátum lögum hans. Við verðum að halda áfram að „koma skjálfandi til Jehóva,“ leika líkama okkar hart til að bjargast inn í nýja skipan Guðs. (1. Korintubréf 9:27) Við verðum alltaf að muna að „upphaf speki er ótti [Jehóva].“ — Sálmur 111:10.

11. (a) Á hvaða vegu er Jehóva góður? (b) Hvers vegna verðum við að ‚koma skjálfandi til gæsku Jehóva‘?

¹¹ En hvernig getum við „komið skjálfandi . . .  til gæsku hans“? Jehóva er algóður. Hann er ímynd allra góðra eiginleika. Hann er fullkominn í því að sjá fyrir sérhverri þörf okkar. Við getum því sagt í fullu trúartrausti eins og Davíð: „[Jehóva] er minn hirðir, mig mun ekkert bresta. . . . Já, gæfa og náð fylgja mér alla ævidaga mína.“ (Sálmur 23:1-6) Núna og allt fram til enda ‚hinna síðustu daga‘ verðum við að ‚koma skjálfandi til gæsku Jehóva‘ í trausti þess að hin dýrmæta fórn sonar hans, Jesú, breiði yfir syndir okkar. (1. Jóhannesarbréf 2:1, 2) Við segjum með þakklátum huga: „Ó [Jehóva], . . . hversu mikil er gæska þín, er þú hefir geymt þeim er óttast þig.“ — Sálmur 31:18, 20.

12. (a) Hvernig getum við líkt eftir gæsku Jehóva? (b) Hvers vegna er það nauðsynlegt?

¹² Um leið og heimur Satans sekkur æ dýpra niður í fen vonskunnar, megum við líkja eftir gæsku Jehóva með því að kunngera nágrönnum okkar fagnaðarboðskapinn um ríkið, og með því að sýna guðhræðslu í breytni okkar. Megum við rækta ávexti andans, þar á meðal gæsku, á öllum sviðum — innan fjölskyldunnar, í söfnuðunum og í samskiptum við fólkið í heiminum. (Galatabréfið 5:22, 23; Sálmur 119:65-68) Það er nauðsynlegt ef við eigum að lifa af ‚hina síðustu daga.‘

Ráð frá ættföður

13. (a) Hverjir geta núna haft gagn af því að íhuga spádóminn sem Jakob bar fram á dánarbeðinu? (b) Hvaða heilræði eru fólgin í spádóminum?

¹³ Fyrir um það bil 3700 árum bar ættfaðirinn Jakob (einnig nefndur Ísrael) fram spádóm á dánarbeði sínu. Hann ávarpaði hina tólf syni sína, höfuð ættkvísla Ísraels, og sagði: „Safnist saman, svo að ég megi birta ykkur það sem mun henda ykkur á hinum síðustu dögum.“ Orð hans eiga núna við þá sem eftir eru af hinum andlega Ísrael, og í víðara samhengi við félaga þeirra, ‚hina aðra sauði.‘ Enginn þeirra getur óhegndur sýnt óvirðingu siðferðisstöðlum Jehóva eins og Rúben, eða leyft sér ofbeldishug eins og Símeon og Leví. Þess í stað verða þeir að rækta eiginleika svo sem hugrekki, traust til Jehóva og atorkusemi eins og hinir synir Ísraels sýndu. — 1. Mósebók 49:1, NW, 3-7, 9, 18, 22; Jóhannes 10:16; samanber 2. Pétursbréf 1:8-11.a

14. Hvaða tveir skyldir spádómar um ‚lokatímann‘ eru einkum hinum ‚öðrum sauðum‘ til leiðsagnar?

¹⁴ Sérstök ráð eru samt sem áður gefin hinum ‚öðrum sauðum‘ sem eiga í vændum að lifa af ‚lokatímann.‘ Eins og í áhersluskyni er þau að finna í tveim skyldum biblíuspádómum í Jesaja 2:2-5 og Míka 4:1-5.

Fólk streymir til húss Guðs

15. (a) Hvernig hefur Jesaja 2:2 ræst? (b) Hvaða andstæður sjá auðmjúkir menn núna og hver eru viðbrögð þeirra?

¹⁵ Jesaja 2:2 hljóðar svo: „Það skal verða á hinum síðustu dögum, að fjall það, er hús [Jehóva] stendur á, mun grundvallað verða á fjallatindi og gnæfa upp yfir hæðirnar, og þangað munu allir lýðirnir streyma.“ Í meira en 50 ár, frá 1935, hafa þessar „gersemar allra þjóða“ verið að safnast til tilbeiðsluhúss Jehóva og ‚fylla húsið dýrð.‘ Þessi ‚straumur‘ virðist færast í aukana þegar nálgast endalok ‚hinna síðustu daga.‘ Sífellt meira ber á hinu táknræna fjalli hreinnar tilbeiðslu á Jehóva, þannig að auðmjúkir menn geta séð hversu ólíkt það er hinum sértrúarlegu ‚hæðum‘ og ‚fjöllum‘ í undanlátsömum heimi Satans. Þeir ‚ganga út‘ úr falstrúarbrögðunum og flýja í sívaxandi fjölda til fjallsins þar sem Jehóva er tilbeðinn. — Haggaí 2:7; Opinberunarbókin 18:2, 4, 5; Sálmur 37:10, 11.

16. (a) Hvaða kalli svara auðmjúkir menn núna? (b) Hvernig uppfyllir Jehóva fyrirheit sitt um að „hraða því“?

¹⁶ Þessir auðmjúku menn svara kallinu í Jesaja 2:3: „Komið, förum upp á fjall [Jehóva], til húss Jakobs Guðs, svo að hann kenni oss sína vegu og vér megum ganga á hans stigum,‘ því að frá Síon mun kenning út ganga og orð [Jehóva] frá Jerúsalem.“ Nú þegar er Jehóva að uppfylla loforð sitt um að ‚hraða því þegar að því kæmi.‘ (Jesaja 60:22) Ört stækkandi „mikill múgur . . .  af alls kyns fólki“ streymir að til að tilbiðja Jehóva. Af þeim létu 138.540 skírast árið 1982; 161.896 árið 1983 og 179.421 árið 1984. Þeir vilja bjargast í gegnum ‚hina síðustu daga.‘ — Opinberunarbókin 7:9, 14.

17. (a) Hvernig geta nýir vottar sýnt að þeir kunni að meta gæsku Jehóva? (b) Hvaða jákvæðu boði þurfum við allir að hlýða?

¹⁷ Þessir nýju vottar meta að verðleikum þá gæsku sem Jehóva hefur sýnt þeim með því að færa þeim ljós sannleikans, og þeir þrá í einlægni að sýna öðrum gæsku. Þeir taka fagnandi þeim leiðbeiningum sem Jehóva gefur í gegnum orð sitt og skipulag. Í lögmáli Móse voru mörg boð og bönn og Ísraelsmenn urðu að hlýða þeim. (Sjá 2. Mósebók 20:3-17.) En hin tvö miklu boðorð til kristinna manna, sem Jesús nefndi, eru jákvæð boðorð um að ‚elska Jehóva Guð okkar af öllu hjarta, sálu, huga og mætti, og náunga okkar eins og sjálfa okkur.‘ (Markús 12:29-31) Sem einn maður hlýða vottar Jehóva nú þeirri ‚kenningu‘ og lögum sem Jehóva sendir út frá hinni ‚himnesku Jerúsalem‘ og lifa eftir réttlátum boðum þeirra.

18. (a) Hvers konar reglur þurfum við að virða? (b) Hvaða gagn er að því að hlýða heilbrigðum reglum?

¹⁸ Þetta merkir þó ekki að þjónar Jehóva þurfi engum reglum að hlýða. Páll postuli áminnir okkur: „Allt fari sómasamlega fram og með reglu.“ (1. Korintubréf 14:40) Fáeinar reglur getur til dæmis þurft um Ríkissali okkar til að stilla raforkunotkun í hóf eða koma í veg fyrir að börn noti tilbeiðsluhús Guðs fyrir leikvöll eftir samkomurnar. Fjölskylduhöfuð geta þurft að hafa ákveðið fyrirkomulag til að fara reglulega yfir hinn daglega biblíutexta innan veggja heimilisins. Á betelheimilum eru settar reglur svo sem um að þeir sem þar búa prýði fagnaðarerindið með því að klæðast látlausum fatnaði og vera snyrtilega til fara. (1. Tímóteusarbréf 2:9) ‚Bækurnar,‘ sem lokið verður upp í þúsundáraríki Jesú, munu vafalaust hafa að geyma reglur til gagns fyrir mannkynið. Það er gott að venjast því núna að hlýða heilbrigðum og skynsamlegum reglum sem eru settar af tillitssemi við aðra og til að tryggja röð og reglu. — Opinberunarbókin 20:12; 1. Korintubréf 10:24; Filippíbréfið 2:3, 4.

Í þessum ofbeldisfulla heimi

19, 20. (a) Hvernig hafa þjónar Jehóva brugðist við meginreglunni í Míka 4:3? (b) Hvernig er það þeim til gagns nú á „síðustu dögum“?

¹⁹ Við nálgumst ört þann tíma þegar „hver höndin [mun] vera uppi á móti annarri.“ (Sakaría 14:13) Hvernig bregðast þjónar Jehóva við hinu vaxandi lögleysi og ofbeldi heimsins? Þeir hegða sér í samræmi við Míka 4:3 þar sem segir: „[Þeir] munu smíða plógjárn úr sverðum sínum og sníðla úr spjótum sínum.“ Vottar Jehóva hafna hvers kyns ofbeldi. „Ekki skulu [þeir] temja sér hernað framar.“ Vafalaust munu þeir halda áfram að njóta góðs af því út í gegnum „hina síðustu daga“ eins og verið hefur til þessa.

²⁰ Þegar tímarítið Varðturninn benti til dæmis á það árið 1983 (1. febrúar 1984 á íslensku) að kristnir menn ættu ekki að bera skotvopn losuðu vottar Jehóva í Nýju Kaledóníu sig við skotvopn sín. Skömmu síðar gerðu pólitísk samtök leit í einum bæ þar og brenndu til grunna hvert einasta hús þar sem skotvopn fundust. Engin hús í eigu votta voru eyðilögð. Oft er það besta vörnin að vera kunnur fyrir hlutleysi eins og reynslan hefur sannað á Norður-Írlandi, í Líbanon, Zimbabve og öðrum löndum.

21. (a) Hvaða kalli ættum við að svara og hvað ættum við að einsetja okkur ef við viljum vera hamingjusamir? (b) Hvernig getum við fengið hlutdeild í gæsku Jehóva?

²¹ Við getum talist hamingjusamir ef við svörum kallinu í Jesaja 2:5: „Komið, göngum í ljósi [Jehóva]“! Við getum líka öll talist hamingjusöm ef við tökum sömu óhagganlegu afstöðuna og spámaðurinn Míka, sem sagði eftir að hafa lýst því öryggi, friði og paradísarskilyrðum sem ríkja meðal fólks Guðs: „Því að allar þjóðirnar ganga hver í nafni síns guðs, en vér göngum í nafni [Jehóva], Guðs vors, æ og ævinlega.“ Vissulega mun gæska Jehóva koma fram gagnvart okkur öllum sem halda áfram að koma saman í friði til sannrar guðsdýrkunar í von um að lifa af „hina síðustu daga.“

[Neðanmáls]

Spurningar til upprifjunar

◻ Hvernig skilur þú hugtakið „hinir síðustu dagar“?

◻ Hvernig getum við ‚komið skjálfandi til Jehóva og gæsku hans‘?

◻ Hvaða leiðsögn er fólgin í spádóminum sem Jakob bar fram á dánarbeði sínu?

◻ Hvaða jákvæð skref getum við stigið í samræmi við Jesaja 2:2-5 og Míka 4:1-5?

[Mynd á blaðsíðu 9]

Hósea hvetur okkur til að líkja eftir gæsku Jehóva.

[Mynd á blaðsíðu 10]

Jakob lýsir æskilegum og óæskilegum eiginleikum.

[Mynd á blaðsíðu 11]

Jesaja býður okkur að ‚ganga í ljósi Jehóva.‘

[Mynd á blaðsíðu 12]

Míka hvetur okkur til að ‚ganga í nafni Jehóva að eilífu.‘