Horft á heiminn

Þrenns konar söguskoðun

Skólabörnum í Bosníu eru kenndar þrjár útgáfur af sögu, listum og tungumáli svæðisins. Útgáfan, sem þau fá að læra, stjórnast af því hvaða þjóðarbrot af þeim þrem stærstu ræður námsskránni, að sögn dagblaðsins The New York Times. Nemendur á svæði Serba, þar sem rétttrúnaðarkirkjan er ráðandi, eru fræddir um það að maðurinn, sem myrti Ferdínand erkihertoga árið 1914 og hleypti fyrri heimsstyrjöldinni af stað, hafi verið „hetja og skáld.“ Nemendum, sem eru rómversk-kaþólskir Króatar, er kennt að hann hafi verið „launmorðingi sem Serbar þjálfuðu og fyrirskipuðu að fremja þetta hermdarverk.“ Í útgáfu múslíma af atburðinum er maðurinn kallaður „þjóðernissinni“ og sagt að „verknaður hans hafi valdið uppþotum gegn Serbum sem þurft hafi lögreglu frá öllum þjóðarbrotunum þrem til að stöðva.“ Samkvæmt frétt blaðsins eru nemendur beðnir að segja til hvort þeir séu Serbar, múslímar eða Króatar, svo að hægt sé að raða þeim niður í kennslustofur eftir þjóðerni.

Kærleikur bregst aldrei

„Táningum, sem þykir mjög vænt um foreldra sína og kennara, hættir miklu síður en öðrum til að neyta fíkniefna og áfengis, reyna að svipta sig lífi, beita ofbeldi eða stunda kynlíf á unga aldri,“ að sögn dagblaðsins The Washington Post. Rannsóknarmenn við Minnesota-háskóla og Norður-Karólínuháskóla í Chapel Hill komust að þeirri niðurstöðu að ekki skipti máli hvort barnið byggi hjá báðum foreldrum sínum eða öðru. Aðalatriðið væri að barnið fyndi að það væri elskað, metið og skilið. Annað, sem rannsóknin leiddi í ljós, var að „miklu skipti að foreldrarnir gegndu stóru hlutverki í lífi barnanna öll táningsárin, jafnvel þegar þeim fyndist hlutverk sitt fara minnkandi,“ að sögn blaðsins.

Streita fjölgar umferðarslysum

Viðhorf fólks til vinnunnar hefur mikil áhrif á hegðun þess undir stýri, að því er segir í niðurstöðum rannsóknar á vegum Samtaka atvinnuveganna um heilbrigðis- og félagsþjónustu í Þýskalandi. Þeim sem eru undir álagi vegna vinnunnar er mun hættara við umferðarslysum en ella, að sögn dagblaðsins Süddeutsche Zeitung. „Innibyrgð gremja í garð yfirmanns eða vinnufélaga getur dregið úr einbeitingu í akstri,“ segir blaðið. Rannsóknin leiddi í ljós að 75 af hundraði manna, sem höfðu valdið umferðarslysi á leið í eða úr vinnu, kenndu um „einbeitingarskorti, of miklum asa, tímaþröng eða streitu.“ Karlmenn eru sagðir líklegastir til að lenda í slysi vegna neikvæðrar streitu, en rannsóknin leiddi einnig í ljós að mæðrum með ung börn er sérstaklega hætt við að lenda í slysum. Dagblaðið segir: „Þær voru oft undir miklu álagi því að þær þurftu að sækja börnin í leikskóla á réttum tíma eða elda mat í hádegishléi.“

Tíðar martraðir barna

Næstum öll börn dreymir illa. Samkvæmt niðurstöðum rannsóknar á vegum Aðalgeðverndarstofnunarinnar í Mannheim í Þýskalandi minnast 9 börn af hverjum 10 þess að hafa vaknað við drauma. Algengar martraðir eru á þá lund að barnið dreymir að einhver elti það, það sé að detta úr mikilli hæð eða lendi í stríði eða náttúruhamförum. Oftast eru slíkir draumar blanda ímyndunar og veruleika. Drengir gleyma yfirleitt hvað þá dreymir. Stúlkur tala hins vegar gjarnan um drauma sína eða skrifa um þá. Sérfræðingar mæla með að börn tali um efni martraða sinna til að draga úr kvíða af völdum þeirra, teikni myndir af þeim eða leiki atvik úr þeim. Frá þessu er greint í dagblaðinu Berliner Zeitung. Sé þessum tillögum fylgt dregur yfirleitt úr tíðni slíkra drauma á fáeinum vikum og þeir hætta að skelfa börnin.

Upphitun matvæla eyðir ekki eiturefnum

Menn ættu ekki að borða kjöt sem staðið hefur í stofuhita lengur en tvær klukkustundir, að sögn fréttaritsins Tufts University Health & Nutrition Letter. En nægir ekki að hita það upp aftur til að drepa skaðlega gerla? „Með því að hita kjötið má drepa gerlana sem fjölguðu sér á yfirborði þess, en það eyðir ekki skaðlegum eiturefnum sem vissir gerlar mynda,“ segir ritið. Eiturefni, sem algengur klasagerill myndar, getur valdið magaverkjum, niðurgangi, ógleði, kuldaköstum, sótthita og höfuðverk. „Og eiturefnin eyðast ekki þótt matvælin séu sjóðhituð.“