Jisọs Ch’amukọlọ Awuwu Wewe

Jisọs w’efilẹ-i ki wa takoya uchẹnyọ lugbo Ojanẹ Ọjọ. Jihofa d’afu-wñ kiafọ ñwu Jisọs ki neke ch’amukọlọ awuwu, e-lẹ d’amẹñwu ki Jisọs anya che ẹgba ki f’onu jẹ ña. Jisọs neke ch’ọga duu kpa. Ugbo du ki Jisọs lo, abo ku ma ach’ọga aw’ugbo-wñ ki ch’atẹko ma, i la ach’ọga ma kpa. Abo k’eju ma ma ganẹ n, eju ma chanẹ eganẹ; abo k’eti ma ma gbọla n, eti ma chanẹ egbọla; abo ku ma ach’oga ẹkutọla chanẹ elulẹ; abo k’amebili adu ma chekwu chanẹ en’ulatanẹ b’amebili ọwọ tẹ. Dagba ki ch’eti ukpo Jisọs ma neke d’ọwọ ma kado, ọga ma atakpa. Amonẹ ati Jisọs ubi ugbo duu ki lo. Dagba ch’iko ki Jisọs atene ki ñmi abẹk i gwugbo ka ojoji, amonẹ at’ọ ubi kpọ, Jisọs la ak’ẹnẹ duu tinyọ n.

Iko ka, amonẹ d’ẹnẹ ka ki ach’ọga ekutọla w’unyi ugbo ki Jisọs gwugwu. Amaa, unyi lẹ chẹ kọ ñwu amonẹ, abo lẹ la li ugbo du ku ma neke le w’ejefu ugbo Jisọs n. Tak abo lẹ mutẹgwu t’ojokunyi ma, oñ ma t’ẹnẹ ki ach’ọga lẹ nọ wanẹ lugbo ku ma f’uña ñwu ọgba Jisọs. Ubilẹ, Jisọs ka ñwu ọnẹkẹlẹ lẹ kakini: ‘Kwanẹ k’ẹ lulẹ.’ Alu k’amonẹ lẹ li ẹñwu ki Jisọs che-i, awuwu fu ma mu.

Ẹgba omunẹ, Jisọs gwudu w’efewo ka. Alu ki la na gwudu w’ewo lẹ, i li abokẹlẹ mẹgwa [10] ku ma ach’ọga ikpemute ku ma dago ọnajiji akwa kakini: ‘Jisọs, ch’atẹko wa!’ Iko lẹ, ma ch’ajẹñwu abo ku ma ach’ọga ikpemute ku ma mẹru amonẹ n. Jisọs ka ñwu abokẹlẹ ki ach’ọga ikpemute lẹ ku ma lo t’efu unyi Ọjọ ku ma che abu k’Ọla Ọda Jihofa ka ki ch’otila ñwu ẹnẹ ku ma ch’ọga ikpemute-wñ kpa ki che. Alu ku ma na lo, ọga ma takpa. Alu ki ẹnẹ ka ef’abo ku ma ach’ọga ikpemute lẹ f’u li kaki ọga-wñ takpa, i mu dabi wa ki d’ugwa ñwu Jisọs ki la jẹnyu ñwu Ọjọ. Ef’abokẹlẹ mẹgwa lẹ, ọnẹkẹlẹ-i kate wa d’ugwa ñwu Jisọs-i.

I n’onobulẹ ka ki ach’ọga ọdọ mẹgweji [12], i la ach’ọla gaga ku ma ch’ọga-wñ kpa. I lewa ubi Jisọs alumeji amonẹ, i la d’ọwọ ch’eti ukpo Jisọs. Ẹrẹrẹ lẹ, ọga-wñ takpa. Alu ki Jisọs ma ka k’onẹ d’ọwọ ch’owñ, Jisọs tene kakini: “Ẹnẹ d’ọwọ kado mi?” Okpo f’onobulẹ lẹ mu. Amaa, i mu daba dufu w’ọgba, i la k’ochochi ñwu Jisọs. Jisọs k’ọla ki jẹñwu ẹdọ onobulẹ lẹ bọ. i ka ñwu kakini: ‘Ọma-mi onobulẹ, na lo ef urẹdọ.’

Ẹnẹ ka ef’amadide k’odu-wñ Jairọs na ch’ologwu bọ Jisọs kakini: ‘Lewa unyi mi! Ọma-mi onobulẹ kekele ach’ọga nana.’ Amaa, taki Jisọs t’unyi Jairọs, ọma onobulẹ lẹ lekwu. Alu ki Jisọs gwudu w’ọmọ, i li kaki amonẹ wewe lew’ọmọ ab’abo unyi lẹ rakwu mẹ. Jisọs ka ñwu ma kakini: ‘Mẹ ki rakwu n, todu olu i alẹ-i.’ Ubilẹ, i gwọnyu ọma onobulẹ lẹ ọwọ, i la ka ñwu kakini: “Ọma, kwanẹ!” Ọma lẹ kwanẹ ẹrẹrẹ, Jisọs la ka ñwu ata kp’iye ọma lẹ kakini ku ma d’ujẹñwu ñwu ọma lẹ ki jẹ. Abu ẹ neju kaki ẹdọ ata kp’iye ọma lẹ adẹ taa?