Jisọs J’uchẹnyọ Lugbo Ojanẹ Ọjọ

Alu ki Jisọs che baptism kpa, i chanẹ uchẹnyọ ejẹ kakini: ‘Ojanẹ Ọjọ mẹrọwọ mẹ.’ Amakọchẹ na t’ọ ubi alu ki aj’uchẹnyọ laale ef’ewo Galili kpai Judia. Alu ki Jisọs dabi wa Nasarẹt ef’ewo-wñ, i le t’efu unyi Ọjọ, i la m’ọtakada ẹkama e-Aizaya bi, i la gba dufu gbogbo kakini: ‘Jihofa m’afu-wñ du ñwu mi mẹ k’u takoya uchẹnyọ ñwu amonẹ.’ Ẹñwu ch’ofe ọla-i? Ẹñwu ki ch’ofe-wñ che kakini, dagba k’amonẹ añeju ki Jisọs ki na ch’ukọlọ awuwu, ẹñwu ki chi k’Ọjọ d’afu kiafọ ñwu Jisọs che todu ki takoya uchẹnyọ. Ubilẹ, i ka ñwu abo ku ma anetiru kakini: ‘Eñini-i, achẹ ki dẹ-i chẹ mẹ.’

Ubilẹ, Jisọs le t’eti Ohimini Galili, ọmọ lẹ i li amakọchẹ-wñ mẹlẹ ku ma ch’amakpẹja. I dọ ma omu kakini: ‘Mẹ t’umi ubi, na la ak’umẹ ch’amakpẹja onẹ.’ Abo ki Jisọs dọ ma lẹ che Pita, Andru, Jemis kpai Jọn. Ma t’ukọlọ ẹja ekpa ma nọ, ma la kpo ti Jisọs ubi ẹrẹrẹ. Ma le gbogbo w’ewo Galili, ma na takoya uchẹnyọ lugbo Ojanẹ Ọjọ. Ma takoya uchẹnyọ lẹ ef unyi Ọjọ, ef aja manyu adogbe adogbe. Amonẹ wewe at’uma ubi ugbo duu ku ma alo. Inabali lugbo Jisọs gbanẹ ny’ọwọ ugbo duu gbogbo ti Siria.

I dẹ pẹẹ, Jisọs d’ukpahiu ñwu abo ka ef’abo ku ma at’ọ ubi ku ma neke ch’ọga amonẹ kpa, ku ma la n’amafu bibi rinyọ b’amonẹ tẹ. Abo ki bọ at’ọ ubi alu ki ajuchẹnyọ ef’amewo lile kpai am’ewo kekele. Abobulẹ wewe n’ukẹdọno lugbo Jisọs, abobulẹ lẹ che Meri Magdalin, Joana, Susana kpai abobulẹ omunẹ. Abobulẹ lẹ la d’ejutẹ Jisọs kpai abo ku ma at’ọ ubi.

Ubi ki Jisọs kọ amakọchẹ-wñ, i fu ma kpẹ dufu nya takoya uchẹnyọ. Alu ku ma aj’uchẹnyọ laale ef’ewo Galili, amonẹ wewe mud’amakọchẹ, ma la fu baptism che. Amonẹ wewe atene ech’amakọchẹ, e-lẹ jẹñwu Jisọs du ma wawe nyu ẹñwu oko ki chẹ biẹ ku ma aja mẹ. Jisọs kakini: ‘Mẹ ch’adua ki Jihofa ki kpẹ ab’ukọlọ w’efu uchẹ-wñ ku ma wa ja amẹñwu oko lẹ.’ I gbanẹ n, Jisọs kpẹ amonẹ ọgbọ mẹta ny’ẹgwa [70] uchẹ uchẹ ku ma nya takoya uchẹnyọ laale ef’ewo Judia. Ma j’uchẹnyọ r’amonẹ duu ku ma li lugbo Ojanẹ Ọjọ. Ẹgba k’amakọchẹ lẹ dabi wa, i ache ma ọla gaga ku ma ka ñwu Jiṣos lugbo amẹñwu ku ma li. I n’ẹñwu duu ki Ebili neke che ki d’ọwọ n’ukọlọ lẹ n.

Jisọs ch’alu duu ki neke che ki jẹñwu amakọchẹ-wñ ku ma we d’ọwọ n’ukọlọ ogbogaga ki dẹ ẹgba ki dabi t’efu ojale. Jisọs ka ñwu ma kakini: ‘Mẹ takoya uchẹnyọ r’amonẹ duu ef’ilẹ-i. Mẹ kọ amonẹ lugbo Ọla Ọjọ, mẹ la na che ma baptism.’