Jisọs F’amẹnukpuchẹ Mẹgweji Chi

Ubi ki Jisọs f’uchẹnyọ jẹ ọdọ-ka ny’ẹbọ, ẹñwu ogbogaga ka lew’ọgba-wñ ki dukpẹ ki che. Abo i achi ku ma amẹru tule ku ma ch’ukọlọ kp’owñ? Ẹnẹ i ad’ukọchẹ ñwu ki ch’ẹnẹ ki agbọgba ujọ Abo Kraist? Jisọs atene ki Jihofa ki n’ọ le ef’ẹñwu ogbogaga ki atene che-i. Todulẹ, Jisọs le t’ojuwo ugbo ki ch’owñ kate adẹ, i la ch’adua kw’odu gbogbo gbẹgba k’ọjọ ñwa. Odudu lẹ, Jisọs dọ uchẹ abo ka ef’amakọche-wñ dama, tak i chi amẹnukpuchẹ-wñ mẹgweji [12]. Ẹ che rewa odu ma? Odu-ma che Pita, Andru, Jemis, Jọn, Filip, Bartolomiu, Tọmas, Matiu, Jemis ọma Alfiọs, Tadeus, Saimọn, kpai Judas Iskariọt.

Abo mẹgweji [12] lẹ at’ọ ubi ny’ugbo duu ki alo. Ubi ki m’ukọchẹ du ñwu ma, i kpẹ ma dufu ku ma na takoya uchẹnyọ ojika ọla-ma. Jihofa d’ukpahiu ñwu ma ku ma neke ch’ọga amonẹ kpa ku ma la neke n’amebili dufu b’amonẹ tẹ.

Jisọs d’abo mẹgweji ki dẹ-i kọ am’onukwu-wñ, i la kẹdọno ma. AmiFarisi neju kak amẹnukpuchẹ Jisọs ch’abo ku ma ma ch’iskulu n, kak ẹnẹ ọtalaka ma che. Amaa, Jisọs kọ ma ọna ku ma ach’ukọlọ-ma le. Ma adẹ kpai Jisọs iko ki ch’ogbogaga tule ef’ọlai-wñ w’iko okwu-wñ kpai ubi udajikwanẹ-wñ. Dabu Jisọs, ojile amẹnukpuchẹ-wñ che Galili ma kwo, abo ka efu ma la che n’ọya.

Amẹnukpuchẹ lẹ jọkpa n, todulẹ ma achẹñwu ki ma ch’eju-wñ n iko ka. Iko ẹbọ, ma kpibe taku ma kọla n, ma la atu ẹñwu ẹbiẹnẹ. Iko ẹbọ, ma n’ẹdejẹ n. Ma añọ jiñwa agbade ọla-ma lugbo ẹnẹ ki ch’ogbogaga tule. Amaa, ẹnẹ ọmẹmẹlẹ ki afẹdọ Jihofa ma che-i. Ama lẹ ach’abo ku ma agwọnyu ujọ Abo Kraist ichẹñwu ki Jisọs le-i.