Ojanẹ Ka Ki Dab’oli Lile

Odu ọjọ ka, Nebiukadnẹza n’ọna ubailo ka. Tak i kp’uchẹ r’amanibe-wñ ku ma ka ñwu ẹñwu ki ch’ofe ọna lẹ.Amaa, ẹnẹ duu ma neke k’ẹñwu ki ch’ofe ọna lẹ n. Otitala-wñ, onu Nebiukadnẹza f’ọna lẹ ka ñwu Daniẹl.

Nebiukadnẹza ka ñwu Daniẹl kakini: ‘Ef’ọna-mi, u li oli ka, oli lẹ gba nana, ọgba-wñ tẹ gbogbo akado ojale. Ma neke li oli lẹ kwugbo duu anẹ ilẹ-i. Eñmi-wñ ach’utọ eju, ẹro oji-wñ la ch’ẹkwutẹẹ. Amẹla oko aj’olubọ-wñ, amẹwẹ ojale la ak’unyi j’ẹtọ-wñ. Tak onuchẹ Ọjọ ka gwọru kwef ojale wa, i la d’omu nyate kakini: “F’ọli lẹ lọ wanẹ, k’ẹ la f’ẹtọ-wñ kọda. Ẹ ki muda t’ọkakpunu-wñ kpai ili-wñ nọ dago anẹ, n’ebije kpai ebijekpa f’u ji tẹ. Ẹdọ oli lẹ ki mu rida b’e-onẹ tẹ, ku ma ki d’ẹdọ ẹla ñwu, iko iko mebie ki la l’owñ oji. K’amonẹ chakaa ku ma deju ki ma ka k’Ọjọ n’Ọda, i la adu ñwu ẹnẹ duu ki d’owñ ẹdọ.”’

Jihofa d’ẹñwu ki ch’ofe ọna lẹ tejugede ñwu Daniẹl. Alu ki Daniẹl f’ofe ọna lẹ ma, okpo f’u mu, oñ i ka ñwu Nebiukadnẹza kakini: ‘O onu, i ma jẹ k’ọna lẹ ki chẹ b’amẹnọla-wẹ oji ma. Amaa, uwẹ gbagẹdẹ i akọla oji-wñ. Oli lile ku ma kọda lẹ ch’uwẹ dẹ. Ojanẹ wẹ af’ẹ ọwọ, uwẹ la al’egbe dabu amẹla ef’oko. Amaa, todu k’onuchẹ Ọjọ lẹ ka ku ma t’ọkakpunu oli lẹ kpai ili-wñ nọ, ma adabi d’ojanẹ wẹ ñw’ẹ gẹ.’

Ọdọ ka anubi lẹ, Onu Nebiukadnẹza na lulẹ oji unyi ọfẹ-wñ, i la na g’alu ki Babilọn dẹ. Oñ i kakini: ‘G’efewo lile k’u n’ugbiti kpai ukpahiu-mi kọ. Mẹ g’alu k’unana-mi dẹ kade!’ Alu ki n’ọla lẹ aka, omukọla ka kwef ojale kakini: ‘Nebiukadnẹza! Ojanẹ-wẹ f’ẹ ọwọ mẹ.’

Ẹrẹrẹ lẹ, oji Nebiukadnẹza mu rida, i la chanẹ eche dabu ẹla ef’oko. E-lẹ jẹñwu ma f’u no kwefu unyi onu, i la chanẹ edodo kp’amẹla ef’oko. Tak iloji Nebiukadnẹza chẹkọ dabu iwẹ ọrẹ, oñ anyiga-wñ dab e-uji.

Ubi k’ọdọ mebie lale gwudu, onu Nebiukadnẹza dabi le wef’ibe-wñ, Jihofa la dabi mu du j’onu Babilọn. Ubilẹ, oñ Nebiukadnẹza kakini: ‘U jẹnyu ñwu Jihofa ẹnẹ ki ch’Onu ef’ojale. Abajọ-i tak u ma kaki Jihofa n’Ọda-i, i ahi abo ku ma hiọla-ne wanẹ, i la ad’ẹnẹ duu ki nyọ-wñ j’onu.’