Ọwọ Ka Ki K’ẹñwu T’ọlọdọ

Adiko ẹgba ki Bẹlshaza ch’onu Babilọn, i f’amẹnẹ ogbogaga dabu ichamu ny’ọgwọkọ ojanẹ-wñ dọ ku ma wa ch’uyọ anẹ ọjọ ka. I ka ñwu am’adu-wñ ku ma k’amago ọjamalia ki Nebiukadnẹza ko kwef unyi Jihofa wa. Bẹlshaza kpai ab’ononojo-wñ m’ago lẹ du ñm’omi, ma la chanẹ ed’ugwa ñwu am’ọjọ ma. Ẹrẹrẹ lẹ, ọwọ ka kpo dufu, i la chanẹ ek’amẹñwu ubailo t’ọlọdọ ef’unyi ugbo ku ma jọ ajẹñwu.

Bẹlshaza chanẹ ech’okpo. Oñ i f’amachobochi-wñ dọ, i la gbalu ñwu ma kakini: ‘Ichẹñwu k’ẹnẹ duu efu mẹ neke k’ofe am’ọla ki jọ-i, na d’ẹnẹ lẹ ch’ẹnẹ ẹkẹta ef abo ki gwọnyu ọda Babilọn.’ Ma ch’aludu ku ma neke che, amaa i n’ẹnẹ duu efu ma ki neke ka anẹreju am’ọla lẹ n. Tak ọya onu lewa kakini: ‘I n’ọnẹkẹlẹ ka ku ma adọ Daniẹl ki ch’akofe ọla ñwu Nebiukadnẹza, i che neke k’ofe am’ọla ki dẹ-i ñw’ẹ.’

Alu ki Daniẹl lew’ugbo onu, Bẹlshaza ka ñwu kakini: ‘Ichẹñwu k’ẹ neke gba ẹñwu ku ma kọ-i, k’ẹ la neke k’ofe am’ọla-i, na adu akọ-ọfa ku ma d’ọjamalia che ñw’ẹ, u la añọ d’ẹ ch’ẹnẹ ẹkẹta ef abo ku ma gwọnyu ọda Babilọn.’ Taki Daniẹl dohi ñwu kakini: ‘U tene ẹñwu ele wẹ n, amaa na ka ñw’ẹ ẹñwu ki ch’ofe am’ọla-i. Ata-wẹ Nebiuchadneza ch’ẹnẹ ki ah’ika ne, Jihofa la f’u hi-wanẹ. Ẹ che m’ọchaka amẹñwu-i duu, amaa ẹ dojima ñwu Jihofa n ẹ m’ago ọjamalia unyi Ọjọ du ñm’otẹ. Todulẹ Ọjọ f’amọla-i kọ, owñ ch’ọla ki che: Mẹnẹ, Mẹnẹ, Tẹkẹl, kpai Parsin. Ẹñwu ki ch’ofe am’ọla-i che kak abo Midia kpai Pẹrsia anya f’ojanẹ Babilọn du, ẹ la anya ch’onu gẹ n.’

Babilọn dabu ewo k’ẹnẹ duu ma neke du n. Ọdọ ki chẹ jukpa kpai aji lile ki che n’efu nyọnyọ ch’amẹñwu ki adide ewo Babilọn. Amaa, anẹ ọjọ lẹ, abo Midia kpai Pẹrsia k’uja w’ewo lẹ. Sairọs Onu abo Pẹrsia f’ọna che ñwu aji lẹ ki cha rinyọ todu k’abogwu-wñ ki neke gwudu t’alakwu ewo lẹ. Alu ku ma w’alakwu ewo lẹ, ọna alakwu lẹ chẹ bi tẹ! Abogwu mugwudu t’ewo lẹ, ma f’u ma du, ma la m’onu du kpa. Taki Sairọs f’ọda nẹ oji Baibilọn.

Agbagba ọdọ ka, Sairọs jẹñwu ma f’akooya tẹ kakini: ‘Jihofa ka ñwu mi ku dabi f’unyi Ọjọ ki dẹ Jerusalẹm kọ. Ẹnẹ duu efu-mẹ ku mẹ ch’abo-wñ ki atene ech’atẹko neke lo.’ Dabalu ki Jihofa gbalu, abo Ju wewe dabi ti Jerusalẹm ubi ọdọ ẹtẹgwa [70] ku ma kpi Jerusalẹm biẹ. Sairọs m’amọjamalia, ago ajifa kpai amẹñwu omunẹ ki Nebiukadnẹza ko kw’unyi Ọjọ ko kpuchẹ dabi. Ẹ li ọna ki Jihofa du Sairọs ch’atẹko abo-wñ le?