Ma Kọ Edojikanẹ Ñw’ojibo

Ubi k’Onu Nẹbiukadnẹza n’ọna lugbo ojibo lile lẹ, i n’ọjamalia du b’ojibo lile ka. I la mu du dago ugbo kpataka ki dẹ Dura, tak i d’amẹnẹ ogbogaga ef’ewo Babilọn manyu Shedrak, Mishak kpai Abẹdnigo ku ma wa dago ọgba ojibo lẹ. Tak onu d’ọda kakini: ‘Ichẹñwu ku mẹ gb’ukọla ọkakachi, umolo kp’ọkpana, amẹ ki d’ojikanẹ ñw’ojibo lẹ! Ẹnẹ duu ki ma tẹkpẹ ki dojikanẹ ñw’ojibo lẹ n, ugbogbolo ma ad’u rikpolo t’alumeji una ki ajo ef’aido.’ Abokẹlẹ Hibru mẹta lẹ ajẹ dojikanẹ ñw’ojibo lẹ abẹki Jihofa kate ma arẹ?

Onu Nebiukadnẹza d’ọda ku ma f’ọda gwo. Ẹrẹrẹ lẹ, ọgbọ amonẹ lẹ duu tẹkpẹ, ma la dojikanẹ ñw’ojibo lẹ. Amaa, Shedrak, Mishak kpai Abẹdnigo kọ edojikanẹ ñw’ojibo lẹ. Abo ka ef’abo ki tẹkpẹ lẹ li ma, taku ma mu du ka ñwu onu kakini: ‘Abokẹlẹ Hibru mẹta lẹ kọ edojikanẹ ñw’ojibo-wẹ.’ Tak onu Nẹbiukadnẹza kp’uchẹ ku ma ko ma w’ọgba-wñ tak i kakini: ‘Na dabi d’uña omunẹ ñwu mẹ ku mẹ dojikanẹ ñw’ojibo-mi. Ichẹñwu ku mẹ kọ edojikanẹ, na adu mẹ rikpolo t’alumeji una ki ajo ef’aido. I n’ọjọ duu ki agba mẹ bef’ọwọ mi tẹ n.’ Taku ma dohi kakini: ‘Ẹ ki d’uña omunẹ ñwu wa gẹ n. Ọjọ wa k’a arẹ neke gba wa tanẹ, ichẹñwu ki ma la gba wa tanẹ n, O onu, a nya dojikanẹ ñw’ojibo wẹ n.’

Alu ki Nebiukadnẹza gb’ẹñwu ku ma ka lẹ, i kpo wẹdọ nana.Tak i ka ñwu amadu-wñ kakini: ‘Mẹ f’una ko ny’aido lẹ ki kpa t’alu ki tẹtẹ akpa le onu mebie!’ ‘Tak i ka ñwu am’isoja-wñ ku ma fu Shedrak, Mishak kpai Abẹdnigo ji, ku ma ko ma rikpolo ny’efu una ki ajo ef’aido lẹ!’ Todu k’ọgọ una lẹ akpa tabale, i f’abo ku ma ki Shedrak, Mishak kpai Abẹdnigo ẹchẹ tef’una lẹ kpa ẹrẹrẹ. Oñ abo Hibru mẹta lẹ lewa nanẹ t’alumeji una ki ajo ef’aido lẹ. Amaa, alu ki Nẹbiukadnẹza g’efu una ki ajo lẹ, i li kak abokẹlẹ mẹlẹ jef’una lẹ alulẹ, i la dukpẹ ki ch’abo mẹta. Tak awuwu f’onu Nẹbiukadnẹza mu, oñ i t’amisoja-wñ ene kakini: ‘I ch’onẹ mẹta awa ji ko rikpolo jọ alumeji una lẹ n? Na ali abokẹlẹ mẹlẹ ku ma tale alumeji una lẹ, eju ẹnẹ ẹkẹlẹ-ma la dab’eju onuchẹ Ọjọ!’

Taku Nebiukadnẹza tẹmẹru alu ọna aido lẹ, oñ i kọla kakini: ‘Amẹ adu Ọjọ Chamachala, mẹ dufu wa ku mẹ w’emi!’ Awuwu f’ọgbọ amonẹ mu alu ku ma li Shedrak, Mishak kpai Abẹdnigo alu ku ma dufu awa, k’ẹñwu ẹbiẹnẹ duu ma la che ma n. Ẹñwu duu la ch’añọla ma n. Oji-ma kpai afẹ-ma la jo n, ọla ma la lu una n.

Tak onu Nebiukadnẹza kakini: ‘Ọjọ Shedrak, Mishak kpai Abẹdnigo ki n’ele. Owñ ki f’onuchẹ-wñ kpẹ wa gba amadu-wñ tanẹ. I n’Ọjọ duu ki dab’e-ma n.’

Uwẹ f’ọla mu k’ẹ gwọnyu Jihofa kpakaa ef’ẹñwu duu k’ẹ le gwefu-wñ du dabu abo Hibru mẹta lẹ?