Jihofa Kpẹ Jẹrẹmaya Ki Nya J’uchẹnyọ

Jihofa chi Jẹrẹmaya ki lo t’ewo Juda ki mu d’akachẹ ñwu ma. Jihofa ka ñwu ki na j’uchẹnyọ ñwu ma, ki la ka ñwu ma ku ma f’ọwọ n’ẹbiẹnẹ eche. Jẹrẹmaya ka ñwu Jihofa kakini: ‘Ayaa! Ondu Jihofa, go, omi meju ekọla n, todu imọtọ u che.’ Taki Jihofa ka ñwu kakini: ‘Ẹ ki chokpo ma n. Todu omi d’ugbo wẹ ku gb’ẹ tanẹ.’

Jihofa ka ñwu Jẹrẹmaya ki m’abogijo ko jọ dama, ki la f’otubẹ ki dab’ucha kpọfọ ọgba ma, ki la ka ñwu ma kakini: ‘Ọna lẹ oñ na akp’ewo ki dẹ-i fọ.’ Alu ki Jẹrẹmaya ch’alu ki Jihofa ka ñwu ki che, abogijo lẹ chanẹ ewẹdọ nyọnyọ. Atama ka ku ma adọ ki Pashur d’eñwu gwo akachẹ Jẹrẹmaya, i la mu Jẹrẹmaya du t’odo. Kw’odu ọjọ lẹ gbogbo gbẹgba k’ọjọ ñwa, Jẹrẹmaya neke ch’ichẹ n. Odudu ọjọñwa-wñ, Pashur ti Jẹrẹmaya nọ tanẹ kw’oji odo lẹ. Taki Jẹrẹmaya kakini: ‘U neke ch’ukọlọ-i gẹ n. U la ñọ kọla ef’odu-wñ gẹ n.’ Amaa, ẹ neju kaki Jẹrẹmaya f’ọwọ n’ukọlọ Jihofa eche? Ehee. Alu ki kpibe oji ọla lẹ nyọnyọ, i kakini: ‘Ọla Jihofa dabu una ki maja tefu ẹdọ-mi ajo. U neke f’ọwọ no ej’uchẹnyọ n.’ Ochochi Jẹrẹmaya d’ọwọ no ed’ufeti ñwu amonẹ lẹ n.

Ubi ọdọ wewe, abo Juda dabi f’onu etitọ nẹ. Amaa, ẹdọ amatama kpai amakachẹ ọlemi ki dọmọ lẹ bọ todu uchẹ ki Jẹrẹmaya ajẹ ru ma n. Taku ma ka ñwu amagboji kpai amonẹ lẹ kakini: ‘I dukpẹ k’ẹnẹ-i ki kwu.’ Oñ Jẹrẹmaya ka ñwu ma kakini: ‘Ichẹñwu ku mẹ m’umi du kpa, ẹnẹ ki ma f’udu n oñ mẹ du kpa-i. Ọla duu ku ka ñwu mẹ lẹ ch’ọla Jihofa i che, i ch’emi n.’ Alu k’amagboji gb’ọla lẹ, oñ ma ka kakini: ‘I dukpẹ k’ọnẹkẹlẹ-i ki kwu n.’

Jẹrẹmaya na j’uchẹnyọ alo waa, e-lẹ la jẹñwu amagboji lẹ ku ma wẹdọ nyọnyọ. Taku ma ka ñwu onu ma ki mi Jẹrẹmaya du kpa. Onu lẹ ka ñwu ma kakini, ma neke chẹñwu duu ku ma atene eche kpai Jẹrẹmaya. Taku ma mu Jẹrẹmaya du t’efu ura k’ẹpiọ dọ todu ki kwu t’ọmọ. Oñ Jẹrẹmaya chanẹ etuny’anẹ ef’ẹpiọ lẹ.

Tak Ẹbẹd-mẹlẹk ki ch’onoji ki defu unyi onu ka ñwu onu kakini: ‘Ondu-mi, abo-i mu Jẹrẹmaya du tefu ura ẹpiọ mẹ! Ichẹñwu k’a kw’ọna-wñ t’ọmọ, i agbanẹ tak i kwu n.’ Oñ onu chi abo ogwuẹgwa (30) ku ma lebi Ẹbẹd-mẹlẹk todu ku ma neke nya m’akachẹ Jẹrẹmaya du kwefu ura lẹ ki we kwu. Ichẹñwu k’a ch’awọli Jẹrẹmaya, k’a ma jẹ k’ẹñwu duu ki kp’ọna ny’uwa ej’uchẹnyọ n, ẹ neju kak ẹñwu ọmẹmẹlẹ i che?