Ma Fi Jerusalẹm Kpabiẹ

Abo Juda at’arẹ Jihofa nọ nya rẹ am’ọjọ omunẹ iko t’iko duu. Jihofa na ch’alu duu ki neke ch’atẹko ma ku ma dabi tef’arẹ ochochi. I ch’abalẹ ọdọ wewe. I kpẹ am’akachẹ wewe r’uma ku ma d’ufeti ñwu ma, amaa ma netiru Jihofa n. Gbake-lẹ, ma anyi am’akachẹ lẹ anyinacha. Abu Jihofa kpoji am’ọjọ omunẹ egwa-i le?

Onu ojanẹ Babilọn ku ma adọ Nebiukadnẹza, dọmọ adu am’ojanẹ wewe ef’ogwu, i la na gb’amojanẹ lẹ ny’ọwọ. Ẹgba ejodudu, i f’ojanẹ Jerusalẹm du, i la f’Onu Jehoyakin kpai am’agboji kpai am’ajogwu manyu am’agwalọ chakaa mu. Tak i m’ọchaka ma kọ w’ojanẹ Babilọn. I la ñọ m’amẹñwu akoko chaka ki j’efunyi Ọjọ ko. Ubilẹ, Nebiukadnẹza jẹñwu Zẹdẹkaya f’onu jẹ ojanẹ Juda.

Ẹgba ejodudu, Zẹdẹkaya aleb’ọda ki Nebiukadnẹza adu ñwu. Amaa, i dẹ pẹẹ, am’ojanẹ ki mẹru kpai am’akachẹ ọlemi chanẹ ed’ibe ñwu Zẹdẹkaya todu ki kọ nyi’onu Nebiukadnẹza ọwọ. Jẹrẹmaya d’ufeti ñwu kakini: ‘Ichẹñwu k’ẹ kọ ny’onu Nebiukadnẹza ọwọ, e-lẹ an’ukwu wa ñwu amonẹ wewe, i an’ukpọta kpai ọga bibi w’ojanẹ Juda.’

Ubi ki Zẹdẹkaya d’oji ọfẹ ọdọ mẹjọ, i fu tu ki kọ ny’onu Babilọn ọwọ, i ka ñwu abogwu Ijipt ku ma wa ch’atẹko-wñ. E-lẹ jẹñwu Nebiukadnẹza f’abogwu kpẹ lo ti Jerusalẹm ku ma fi Jerusalẹm kpabiẹ. Abogwu lẹ la f’uru che lo Jerusalẹm daka. Taki Jẹrẹmaya ka ñwu Zẹdẹkaya kakini: ‘Jihofa kak ichẹñwu k’ẹ gb’ọwọ ẹlọ ñwu onu Babilọn, bak’onugo wẹ adeju, ẹñwu duu la akẹrẹb’ewo-i n. Amaa, ichẹñwu k’ẹ ma gb’ọwọ ẹlọ n, bak’abo Babilọn an’una gw’ewo-i jo, ma la ad’onugo wẹ ch’adu.’ Oñ Zẹdẹkaya dohi ñwu kakini: ‘U gb’ọwọ ẹlọ n!’

Ọdọ ka ny’ukpẹru anubi lẹ, abogwu Babilọn f’ọdọ Jerusalẹm kpọfọ w’efewo lẹ, ma la n’una f’ewo lẹ gwujo. Ma f’unyi Ọjọ gwujo, ma kp’amonẹ wewe ma la m’amonẹ wewe ko adu lo ti Babilọn.

Zẹdẹkaya ra kwi Jerusalẹm. Amaa, abogwu Babilọn na no, ma la f’u mu amẹru Jeriko taku ma mu du w’ugbo Nebiukadnẹza. Nebiukadnẹza jẹñwu ma f’amọma Zẹdẹkaya kpa eju Zẹdẹkaya. Ubilẹ, i jẹñwu ma f’eju Zẹdẹkaya kpọfọ, ma la mu du t’efunyi dudu, ọmọ lẹ i la dẹ gbogbo gbẹgba ki kwu. Amaa, Jihofa gbalu ñwu abo Juda kakini: ‘Ubi ọdọ ẹtẹgwa [70], oñ na ako mẹ dabi wa Jerusalẹm.’

Ẹñwu anya che kẹrẹbọ amagbadufu ku ma ko ma lo ti Babilọn? Ma agwọnyu Jihofa kpakaa?