Jihofa Jadu Jihosafat

Jihosafat ki ch’onu abo Israẹl m’ojibo kpai ubọ ichẹbọ Beal duu ki d’ojanẹ lẹ du kpọfọ rinyọ. Jihosafat atene k’amonẹ ku ma m’ọlọda Jihofa. Todulẹ, i kpẹ abogijo kp’Abo Lifai lo t’ugbo duu ef’ewo-ma ku ma kọ ma ọlọda Jihofa.

Am’ewo ki mẹru ma ach’okpo ek’ogwu bọ Juda todu ku ma che ma kaki Jihofa dugbo ma. Ma la ñọ n’amẹñwu ele wa ñwu onu Jihosafat. Amaa, abo Moab kpai Amọr manyu abo ku ma kw’ojuwo Sẹir lewa k’uja b’abo Juda. Jihosafat che ma kak ichẹñwu ki Jihofa ma ch’atẹko owñ n, owñ neke du n. Taki Jihosafat m’ọgbọ duu abokẹlẹ kp’abobulẹ manyu amọma-ma ko jeju dama Jerusalẹm. Oñ Jihosafat ch’adua ru Jihofa ọgba ọgbọ duu ma kakini: ‘Jihofa, i ma ch’uwẹ n, a neke du no. Agba, ka ñwu wa ẹñwu ki dukpẹ k’a ache.’

Jihofa dohi adua ma, i ka ñwu ma kakini: ‘Mẹ ki ch’okpo n. Na anya ch’atẹko mẹ. Mẹ kpo jọ uña uña mẹ, ku mẹ la dago kaa, oñ mẹ li alu ki Jihofa agba mẹ tanẹ.’ Abu Jihofa gba ma tanẹ le?

Odudu ọjọ ẹkeji, Jihosafat chi abo ku ma akeli, i la ka ñwu ma ku ma t’ọgba lale ọgba am’isoja lẹ. Ma t’ọgba lale kwi Jerusalẹm at’ọgba ogwu ef’egbili Tẹkoa.

Alu k’amakeli d’omu ma dago na jẹnyu ñwu Jihofa taa ef’uyọ, taki Jihofa gb’uja-ma ja. Jihofa m’abo Amọn kp’abo Moab eju rida b’ọla-ma, taku ma chanẹ ekp’ọla ma gbogbo w’ẹgba k’ẹnẹ kate efu-ma ma bọ gẹ n. Amaa, Jihofa m’abo Juda kpai am’isoja manyu amatama gbatanẹ. Ẹgba k’amewo ki lo Juda daka gb’ẹñwu ki wa che-i, taku ma ma jali kaki Jihofa dọmọ agb’uja abo Juda ja. Abu Jihofa ch’ajadu abo-wñ le? Jihofa ache l’ọna wewe. Jihofa tene atẹko kwugbo amonẹ tak i jadu abo-wñ n.