Jihofa D’olofi Ñwu Onu Onobulẹ Jẹzẹbẹl

Onu Ehab ali ef’uchẹ ọnẹkẹlẹ ka ku ma adọ Nebọt kw’aliwido unyi onu ki dẹ Jẹzrẹl. Ehab añeju ef’uchẹ lẹ, todulẹ i atene ki mudu la kwugbo Nebọt. Amaa, Nebọt kọ eta ñwu todu ọda Jihofa jẹ k’onẹ ki t’anẹ ki chẹñwu ogwu n. Ehab che bumọ Nebọt todu ki Nebọt atene chẹñwu ki ch’eju-wñ? Ehee. Ẹdọ Ehab mu kpabiẹ nyọnyọ. Ẹdọ-wñ chẹ kpabiẹ nyọnyọ ki ma tene ki kw’ejefu olu-wñ n, i la kọ ej’ujẹñwu.

Ọya Ehab ch’Onu onobulẹ ẹbiẹnẹ ku ma adọ Jẹzẹbẹl. I ka ñwu Ehab kakini: ‘Uwẹ ch’onu abo Israẹl, ẹ neke gb’ẹñwu duu ki nyọ ñw’ẹ. Na gb’efuchẹ Iẹ ñw’ẹ.’ Taki Jẹzẹbẹl f’ọtakada kọ r’abogijo, i ka ñwu ma kakini Nebọt ab’Ọjọ ina, ku ma r’ikpolo do gbẹgba ki akwu. Abogijo lẹ ch’alu ki Jẹzẹbẹl ka ñwu ma ku ma che, ubilẹ Jẹzẹbẹl ka ñwu Ehab kakini: ‘Nebọt lekwu mẹ, ef’uchẹ lẹ mud’e-wẹ mẹ.’

I che Nebọt kate ch’ẹnẹ k’ọwọ-wñ chẹ fẹ ki Jẹzẹbẹl du kpa n. I che kp’amonẹ wewe ku ma arẹ Jihofa. Ode oñ Jẹzẹbẹl agwa, i la che ch’amẹñwu ẹbiẹnẹ wewe omunẹ. Jihofa che li amẹñwu ẹbiẹnẹ gbaa ki Jẹzẹbẹl ache. Ẹñwu Jihofa ache Jẹzẹbẹl?

Ubi ki Ehab kwu, ọma-wñ Jehoram f’onu jẹ. Jihofa f’uchẹ kp’ọnẹkẹlẹ ka k’odu-wñ kọ Jehu ki nya d’olofi ñwu Jẹzẹbẹl kp’abo unyi-wñ.

Jehu n’ọkogwu-wñ lo ti Jẹzrẹl ugbo ki Jẹzẹbẹl dẹ. Jehoram n’ọkogwu-wñ ledo Jehu, i la t’ọ ene kakini: ‘Urẹdọ i che?’ Oñ Jehu dohi kakini: ‘Urẹdọ neke dọmọ n, todu Jẹzẹbẹl iye-wẹ dọmọ ach’ẹbiẹnẹ nyọgba.’ Taki Jehoram atene ki r’ọkogwu-wñ da ki ra kw’ọmọ. Amaa, Jehu f’ọfa ta ñwu Jehoram tak i lekwu.

Ubilẹ, Jehu le t’unyi ọfẹ Jẹzẹbẹl. Alu ki Jẹzẹbẹl gbọ kakini Jehu awa, i nya f’eju-wñ kwọ, i f’oji-wñ che ọmẹmẹlẹ, i la kpo gw’anẹ al’iwido unyi-wñ ojale anede ñwu. Alu ki Jehu le w’ọmọ, Jẹzẹbẹl chanẹ ekọla ẹd’ẹkpabiẹ ñwu. Taki Jehu d’omu ny’atẹ ka ñwu amadu ku ma dago iba Jẹzẹbẹl kakini: “Mẹ mu du rọ wanẹ!” Taku ma ki Jẹzẹbẹl ẹchẹ l’aliwido wanẹ, i la lekwu.

Ubilẹ, Jehu m’amọma Ehab ọnẹkẹlẹ ọgbọ mẹta ny’ẹgwa [70] du kpa, i la jẹñwu edojikanẹ ñwu Beal ki kw’ojanẹ lẹ. Ẹ che li kaki Jihofa che m’ẹñwu duu, k’i la anya d’olofi ñwu abo duu ku ma achẹñwu ẹbiẹnẹ iko-wñ?