Ọma Ọnẹkẹlẹ Ọyaukwọkọ Ka Mu Dajikwanẹ

Adiko ọkpawñ lẹ, Jihofa ka ñwu Ẹlaija kakini: ‘Kwanẹ k’ẹ lo ti Zarẹfat, ọyaukwọkọ ka ki dọmọ ad’ujẹñwu wẹ jẹ.’ Alu ki Ẹlaija w’alakwu ewo lẹ, i li ọyaukwọkọ ka ki dago ọmọ afiyẹ iji. Ẹlaija ka ñwu ki ch’omi ñwu ñmọ. Alu ki alo ki nya ch’omi, Ẹlaija ñọ f’u dọ, i la ka ñwu kakini: ‘Agba, m’ibrẹdi ree ka du wa ñwu mi.’ Amaa, ọyaukwọkọ lẹ ka ñwu kakini: ‘I n’ibrẹdi duu k’u che gwanẹ n, ẹñwu kate k’u nẹ ch’omu kpai ekpo ree k’u neke du ch’ujẹñwu k’omi kp’ọma-mi ọnẹkẹlẹ kate neke jẹ.’ Ẹlaija ka ñwu kakini: ‘Jihofa gbalu kakini ichẹñwu k’ẹ f’ibrẹdi che ñwu mi, omu wẹ kpai ekpo wẹ atakpa gbẹgba k’omi adabi lọ n.’

Tak ọyaukwọkọ lẹ le t’unyi nya f’ibrẹdi che ñwu akachẹ Jihofa. Dabalu ki Jihofa gbalu, ọyaukwọkọ lẹ kp’ọma-wñ n’ujẹñwu ku ma na jẹ iko ọkpawñ lẹ, ọcha omu kpai ekpo-wñ takpa n. I dẹ alu ki dẹ.

Ubilẹ, ẹñwu ẹbiẹnẹ ka lewa che. Ọma ọyaukwọkọ lẹ chanẹ ech’ọga ẹgbiti, i la lekwu. Ọyaukwọkọ lẹ ch’ologwu b’Ẹlaija ki ch’atẹko-wñ. Ẹlaija m’ọma lẹ gba kw’ọwọ onobulẹ lẹ, tak i mu du le t’ejefu ojale ki d’efunyi onobulẹ lẹ. I m’ọma lẹ du dachi oj’atẹ tak i ch’adua ru Jihofa kakini: ‘Jihofa, agba jẹñwu ọma-i ki dabi deju.’ Ichẹñwu ki Jihofa m’ọma lẹ du dajikwanẹ, ẹñwu chi ki ach’ẹñwu awuwu nana? Todu ki ma n’ẹnẹ duu ki dajikwanẹ kwobi k’a gbọ mama ta n, onobulẹ-i kp’ọma-wñ la ch’ẹnẹ Israẹl n.

Amaa, iñmi ọma lẹ mu dabi w’efu-wñ tak i chanẹ eñmiñmi! Ẹlaija ka ñwu ọyaukwọkọ lẹ kakini: ‘Go, ọma wẹ deju.’ Ẹdọ ọyaukwọkọ lẹ bọ nyọnyọ tak i kakini: ‘Ẹnẹ Ọjọ oñ ẹ che ochochi. U che m’e-lẹ todu ọla ki Jihofa ka ñwẹ k’ẹ ka, e-lẹ kate oñ ẹ ka-i.’