Jihofa Jẹñwu Ẹlaija Ki Dabi F’ukpahiu Nẹ

Alu ki Jẹzẹbẹl gbọ kaki ma f’amakachẹ Beal chakaa kpa mẹ, ẹdọ-wñ mu kpabiẹ nyọnyọ. Tak i kp’uchẹ ru Ẹlaija kakini: ‘Ọna, onugo-wẹ akwu dabu amakachẹ Beal lẹ.’ Ẹlaija chanẹ ech’okpo tak i ra le t’egbili. I chanẹ ech’adua kakini: ‘Jihofa, akanya-i che tabale ñwu mi, jẹñwu mi k’u kwu ke.’ Tak Ẹlaija m’olu du ofe oli ka todu k’ọla-wñ chẹ kpa nyọnyọ.

Onuchẹ Ọjọ ka f’u j’olu, i la ka ñwu kakini: ‘Kwanẹ k’ẹ jẹñwu.’ Ẹlaija li akala ka ki d’oji okwuta ki akpuna kpai ọcha omi ofo. I f’u jẹ, i la f’omi ñmọ, tak i dabi ñọ kpo dachi. Onuchẹ lẹ dabi ñọ f’u j’olu ẹgba omunẹ gẹ, i la ka ñwu kakini: ‘Kwanẹ k’ẹ jẹñwu k’ukpahiu ki b’ẹ jọ ñwu ulẹ k’e lo-i.’ Todulẹ Ẹlaija dabi ñọ f’ujẹñwu jẹ gẹ. Oñ i chanẹ ulẹ ọrọka ọgbọ meji [40] kpai odu ọgbọ meji [40] tak i wa Uwo Họrẹb. Ọmọ lẹ Ẹlaija le t’efu awo okwuta, i la m’olu du. Amaa, Jihofa kọla kpai Ẹlaija ọmọ, i ka ñwu kakini: ‘Ẹñwu ẹ che emi, Ẹlaija?’ Oñ Ẹlaija dohi kakini: ‘Abo Israẹl hi alo-wẹ tinyọ mẹ, ma f’ubọ ichẹbọ-wẹ gwulọ wanẹ, ma la f’amakachẹ-wẹ kpa, abajọ-i ma atene ed’omi onugo kpa.’

Jihofa ka ñwu kakini: ‘Dufu k’ẹ kpo dago ojuwo.’ Ejodudu, afu lile ju lale ọmọ. Tak anẹ emiejo kpai ọgọ-una la lebọ. Otitala-wñ, Ẹlaija gb’omukọla mẹnẹẹ ka. Oñ Ẹlaija m’ukpo-wñ ko b’eju-wñ ma taki dufu t’ọdọda awo lẹ. Ubilẹ, Jihofa t’ọ ene ẹñwu ki chi ki ara, tak Ẹlaija dohi kakini: ‘Omi kate bọ-i.’ Amaa, Jihofa ka ñwu kakini: ‘I ch’uwẹ kate bọ-i n, omi che n’amonẹ icham ny’ọgwọkọ mebie [7,000] ojanẹ Israẹl ku ma ma danyẹkwu ñwu Beal n. Lo k’ẹ nya f’ekpo ba t’Ẹlaisha oji ki ch’akachẹ koji-wẹ.’ Ẹrẹrẹ, Ẹlaija le nya chẹñwu ki Jihofa ka ñwu ki che. Ẹ neju kaki Jihofa ach’atẹko wẹ onugo ichẹñwu k’ẹ chẹñwu ki Jihofa ka ñw’ẹ k’ẹ che? Iii, i ach’atẹko wẹ gboo. K’a tejanẹ lugbo ẹñwu ki che adiko ọkpawñ lẹ.