Jihofa F’ojanẹ Israẹl Kpẹru

Urẹdọ d’ojanẹ Israẹl todu ki Solomọn arẹ Jihofa. Amaa, Solomọn n’amọya wewe kw’ojanẹ omunẹ ku ma agw’ojibo. Ọree ree Solomọn onugo mu rida, i la chanẹ egw’ojibo kp’amọya-wñ. Ẹdọ Jihofa mu kpabiẹ ru Solomọn, tak i ka ñwu kakini: Na f’ojanẹ Israẹl gẹ b’akwọra unyi-wẹ tẹ, na f’u kpẹr’eji. Na d’ukpẹ ki nana tule ñwu adu-wẹ ka, akwọra unyi-wẹ la ajọfẹ oji ukpẹ ki nya tule.’

Jihofa jẹñwu ẹñwu ki ka ki nẹr’eju l’ọna omunẹ. Adu Solomọn ka k’odu-wñ kọ Jẹroboam na lo t’ulẹ, owñ kpai akachẹ Ọjọ ka k’odu-wñ kọ Ahija lewa de ejọna. Ahija gwọnyu ukpo k’onugo-wñ nẹ, i la f’u kpana r’ẹgweji tak i ka ñwu Jẹroboam kakini: ‘Jihofa ad’ojanẹ Israẹl kw’ọwọ akwọra unyi Solomọn, i la af’u kpẹr’eji. Uwẹ ki m’ẹkpana ukpo mẹgwa ko todu ẹ nya j’onu oji ọlọpu mẹgwa.’ Alu k’Onu Solomọn f’ọla lẹ gbọ, i atene ki mu Jẹroboam du kpa! Todulẹ Jẹroboam ra le t’ojanẹ Ijipt. Alu ki Solomọn lekwu k’ọma-wñ Rẹhoboam f’onu jẹ, Jeroboam kpibe kak iko lewa ki neke dabi t’ojanẹ Israẹl mẹ.

Abogijo ojanẹ Israẹl ka ñwu Rẹhoboam kakini: ‘Ichẹñwu k’ẹ ch’ali ẹnyọ k’ẹ la kọla ki ajẹñwu ẹdọ amonẹ-i bọ, ma adẹ kp’uwẹ ogbegbelẹ.’ Amaa abokolobia Rẹhoboam ka ñwu kakini: ‘Ẹ ki b’ọwọ lọ ñwu ma n! Jẹñwu ma ku ma ch’ukọlọ ẹgbiti t’akwobi le!’ Rẹhoboam leb’ibe k’abokolobia-wñ du ñwu. Taki Rẹhoboam chanẹ ech’amonẹ lẹ ọbata. E-lẹ jẹñwu amonẹ lẹ mu l’ubi ubi b’ọ tẹ. Ma mi Jẹroboam du j’onu oji ọlọpu mẹgwa ki ch’ọfẹ ojanẹ Israẹl. Ọlọpu meji ki bọ ch’e-ojanẹ Juda, ma la dabi kw’ubi Rẹhoboam tẹ n. Alu k’ọlọpu Israẹl mẹgweji [12] kpẹru le dẹ.

Jẹroboam tene k’abo-wñ ki na gw’Ọjọ Jerusalẹm ki ch’ojanẹ Rẹhoboam n. Ẹ che m’ẹñwu ki chi? Jẹroboam ach’okpo kaki ma anya l’ubi ubi b’owñ tẹ ku ma la lebọ Rẹhoboam. Todulẹ i f’ojibo ọmokwunọ ọjamalia meji bọ tak i ka ñwu abo-wñ kakini: ‘Jerusalẹm chẹ jiji ololo. Mẹ neke r’Ọjọ emi.’ Amonẹ lẹ la chanẹ er’ojibo am’ọmokwunọ lẹ, ma la dabi fu Jihofa gbenyọ.