Solomọn F’unyi Kọ Ñwu Jihofa

Alu ki Solomọn f’onu jẹ ojanẹ Israẹl, Jihofa t’ọ ene kakini: ‘Ẹñwu ẹ tene k’u du ñw’ẹ?’ Oñ Solomọn kakini: Omi ch’imọtọ, u la m’ẹñwu k’u na ache n, uwẹ ki d’ibe ñwu mi todu k’u du n’abo-wẹ le.’ Jihofa dohi ñwu kakini: Todu k’ẹ bi k’ẹ n’ibe, na jẹñwu’ẹ n’ibe k’ẹnẹ duu ma la an’ibe dab uwẹ ef’ilẹ n. Na añọ jẹñw’ẹ ch’anana lile. Ichẹñwu k’ẹ la agbomu mi gbọ, na jẹnw’ẹ kpojologbo.’

Taki Solomọn chanẹ ek’unyi-Ọjọ. I d’ọjamalia, ajifa, oli kpai amokwuta ọmẹmẹlẹ k’unyi lẹ. Abokẹlẹ manyu abobulẹ wewe ku ma m’eju ukọlọ nyọnyọ ch’ukọlọ unyi-Ọjọ ekọ. Ubi ọdọ mebie, i lew’iko ku ma atene ed’unyi lẹ datẹ ñwu Jihofa. I che n’ubọ ichẹbọ k’amẹñwu ichẹbọ j’oji-wñ. Taki Solomọn danyekwu ọgba ubọ ichẹbọ lẹ. Oñ i ch’adua kakini: O Jihofa, unyi ki dẹ-i nana bọjọ n, i la nyọ bọjọ ki neke gb’ẹ n. Agba gb’arẹ wa k’ẹ la netir’adua wa.’ Ẹñwu ch’ibe ki Jihofa kpẹ lugbo unyi ki Solomọn kọ ñwu kpai adua ki Solomọn che-i? Ẹrẹrẹ ki Solomọn na ch’adua kpa, una kwef ojale wanẹ. I la m’amẹñwu ichẹbọ ki j’oji ubọ ichẹbọ lẹ ko jo. Jihofa m’unyi lẹ gba. Alu k’abo Israẹl li ẹñwu-i, ẹdọ-ma bọ, ma la chanẹ eyọ.

Amonẹ che m’Onu Solomọn nyọnyọ ugbo duu ojanẹ Israẹl kpai ojanẹ ọnajiji. Amonẹ aw’ugbo Solomọn todu ki ch’atẹko ma ichẹñwu ku ma n’ihianyi. Onu onobulẹ Shiba onugo wa ki fu Solomọn jama kpai am’ene ẹgbiti ojoji ojoji. Alu ki gb’ohi ki Solomọn du, i kakini: ‘Tak u w’emi, u kẹdọno ẹñwu k’amonẹ ka ñwu mi lugbo wẹ n. Ama, u che li abajọ-i kakini ma ke k’ukpẹru-wñ ñwu mi n. Ibe-wẹ kpai uwohi-wẹ chẹ t’alu ku gbọ le. Jihofa Ọjọ wẹ m’ẹnyọ ko wẹ mẹ.’ Ẹñwu chẹ ra ñwu abo Israẹl, ẹdọ ma chakaa la chẹ bọ. Ama, i ch’abalẹ i dẹ ñwu ma alo n.