Ajama Oj’Uwo Karmẹl

Am’onu ẹbiẹnẹ wewe j’ọfẹ oji ọlọpu mẹgwa ojanẹ Israẹl. Amaa, Ehab ch’ẹnẹ ka ef’abo k’ọfẹ ma biẹnẹ tule. I n’ọya ẹbiẹnẹ ka ki arẹ Beal. Odu ọya-wñ lẹ che Jẹzẹbẹl. Ehab kpai Jẹzẹbẹl ọya-wñ jẹñwu arẹ Beal ki gbanẹ ny’ọwọ ojanẹ Israẹl, ma la kp’amakachẹ Jihofa wewe. Ẹñwu Jihofa che? Jihofa kpẹ akachẹ Ẹlaija ru Ehab.

Ẹlijah ka ñwu Onu Ehab kakini, todu ẹbiẹnẹ-wñ, omi anya lọ ojanẹ Israẹl n. I t’ọdọ mẹta le k’omi ma lọ ojanẹ Israẹl n, amonẹ la neke gb’ẹñwu duu n. E-lẹ jẹñwu ebi kpa nyọnyọ ojanẹ Israẹl. Jihofa dabi kpẹ Ẹlaija t’ugbo Ehab. Tak Onu Ehab ka ñwu kakini: ‘Uwẹ ma jẹñwu abo Israẹl n’uñmi ni! Abi-wẹ i che.’ Ẹlaija ka ñwu kakini: ‘I ch’omi ma jẹñwu omi ki lọ ni n, chai uwẹ; todu k’ẹ chanẹ erẹ Beal. K’a ch’ajama ẹnẹ ki ar’Ọjọ ochochi. Jẹñwu abo Israẹl chakaa kp’amakachẹ Beal ki jeju oj’Uwo Karmẹl.’

Amonẹ chakaa jeju oj’uwo Karmẹl. Taki Ẹlaija kakini: ‘Mẹ f’ibe mẹ mujọ. Ichẹñwu ki che Jihofa ch’Ọjọ ochochi, mẹ t’ọ ubi. Amaa, i che Beal, ẹgbalẹ mẹ t’ọ ubi. Ajama k’u na adu dago dẹ: Amakachẹ Beal onẹ 450 ki f’amẹñwu ichẹbọ ma ko jọ, ku ma la kwadọ ọjọ-ma. Omi onugo af’amẹñwu ichẹbọ ko jọ, u la akwadọ Jihofa. Ọjọ e-ẹnẹ ki m’una du dohi, ch’Ọjọ e-ochochi.’ Amonẹ lẹ la jẹ dama.

Tak amakachẹ Beal f’amẹñwu ichẹbọ ma ko jọ, ma la na akwadọ Beal kw’odudu gbogbo ny’anẹ kakini: ‘O Beal, dohi ñwu wa!.’ Alu ki Beal ma dohi ñwu ma n, Ẹlaija chanẹ edu ma ch’echia. Tak i kakini: ‘Mẹ kwa nyọnyọ ta, i neke che kak i alolu, ki la dukpẹ k’onẹ ki f’u j’olu.’ Anẹ lewa, amakchẹ Beal la dọmọ akwa kpọ, amaa ẹnẹ duu dohi ñwu ma n.

Ẹlaija m’amẹñwu ichẹbọ-wñ ko j’oji ubọ ichẹbọ, i la m’omi du da nyu lale. Ubilẹ, i ch’adua kakini: ‘O Jihofa, jẹñwu amonẹ duu ki ma kaki uwẹ ch’Ọjọ ochochi.’ Ẹrẹrẹ lẹ, Jihofa jẹñwu una ki kw’efojale, i la f’amẹñwu ichẹbọ lẹ gwujo. Tak amonẹ lẹ chanẹ ekwa kakini: ‘Jihofa ch’Ọjọ ochochi!’ Oñ Ẹlaija ka ñwu ma kakini: ‘Mẹ ki jẹñwu ẹnẹ kate ef’amakachẹ Beal ki ra n!’ Oñ ma f’amakachẹ Beal onẹ 450 lẹ kpa ọjọ lẹ gbagẹdẹ.

Alu k’akpa ree kpo dufu oji ohimini, Ẹlaija ka ñwu Ehab kakini: ‘Afu lile awa. Hika d’ọkogwu-wẹ kwanẹ k’ẹ na alo t’unyi-wẹ.’ Akpa ojale mud’edudu gbẹm, afu la chanẹ eju, tak omi lile la chanẹ elọ. Ọkpawñ lẹ lew’ukpoji mẹ. Ehab n’ọkogwu-wñ rule alu duu ki neke du rule kade! Amaa, Jihofa d’ukpahiu ñwu Ẹlaija k’i rule kpai ẹrẹ-wñ t’ọkogwu Ehab le! Am’ihianyi Ẹliaja muda lew’ukpoji mẹ? K’a tejanẹ.