Jihofa Jẹñwu Samsin N’ukpahiu

Abo Israẹl wewe mu dabi t’efu erẹ am’ojibo. Todulẹ, Jihofa t’ọwọ nọ ñwu abo Filistia ku ma n’ọda oji am’anẹ ma. Amaa, i che n’uchẹ abo Israẹl ka ku ma afẹdọ Jihofa. Ẹnẹ ka ef’abo lẹ che Manoa, owñ kp’ọya-wñ n’ọma duu n. Ọjọ ka Jihofa kp’onuchẹ-wñ ka r’ọya Manoa. Onuchẹ lẹ ka ñwu kakini: ‘Uwẹ abi ọma ọnẹkẹlẹ, owñ la achanẹ ejadu abo Israẹl kwef ọwọ abo Filistia, i la ach’ẹnẹ Nazirait.’ Ẹ che m’abo ku ma adọ Nazirait? Abo Nazirait ch’amẹnẹ ogbogaga ñwu Jihofa. Abo Nazirait la cha l’oji ma n.

I gbanẹ n, Manoa f’ọma-wñ ọnẹkẹlẹ bi, i la d’odu-wñ kọ Samsin. Alu ki Samsin gba, Jihofa jẹñwu ki n’ukpahiu nyọnyọ. I n’ọwọ ofo nẹ kpa idu. Iko ka, Samsin kate la kpa abo Filistia onẹ ogwu ẹgwa [30]. Todulẹ, abo Filistia ach’ulaka-wñ, ma la atene ọna ku ma adu kpa. Odu ọjọ ka, alu ki Samsin dẹ Gaza al’olu, ma le t’alakwu ewo lẹ nya nede-wñ todu ku ma du kpa odudu. Amaa alumeji odu, Samsin kwanẹ, i le t’alakwu ewo lẹ, i la m’alakwu lẹ wu oñ i mu du n’ojika le t’ojuwo Hẹbrọn!

Ubilẹ, abo Filistia le t’ugbo Dilaila ki Samsin afẹdọ, ma la ka ñwu kakini: ‘A d’ẹyọkọ ajifa nana ñw’ẹ ichẹñwu k’ẹ tejanẹ ẹñwu ki chi ki Samsin bẹtẹma n’ukpahiu nana abẹ-i. A tene k’a f’u mu, k’a la mu du t’unyidudu.’ Dilaila jẹ kp’ama todu ki atene gb’ọkọ lẹ. Ẹgba ejodudu Samsin kọ eka ñwu Dilaila ẹñwu ki ch’ẹtẹ ukpahiu-wñ. Amaa, alu ki na d’ihianyi ñwu Samsin iko t’iko, tak i f’ẹtẹ ukpahiu-wñ ka ñwu. Samsin ka ñwu kakini: ‘Abẹ kadoji-mi mama ta n todu k’omi ch’ẹnẹ Nazirait. Ichẹñwu ku ma f’oji-mi la, ukpahiu mi akwo b’umi tẹ.’ Ọla ki Samsin ka lẹ n’akanya lile wa, i ch’abalẹ n?

Dilaila hika nya ka ñwu abo Filistia lẹ kakini: ‘U f’ẹtẹ ukpahiu-wñ ma mẹ!’ Diliala jẹñwu Samsin m’olu du n’oji ẹrẹ-wñ, i la jẹñwu ẹnẹ ka lewa f’oji-wñ la. Taki Dilaila d’omu nyatẹ kwa kakini: ‘Samsin, abo Filistia lewa mẹ!’ Alu ki Samsin m’olu ji kwanẹ, i li kakini ukpahiu-wñ le b’ọ tẹ mẹ. Abo Filistia lẹ fu mu, ma f’eju-wñ mejeji kpọfọ, ma la mu du t’unyidudu.

Ọjọ ka abo Filistia wewe jeju jọ dama unyi ọjọ-ma ku ma adọ Dagọn, ma la na kwa nana kakini: ‘Ọjọ-wa jẹñwu ọwọ wa fu Samsin mu mẹ! Mẹ dọ Samsin dufu wa, mẹ jẹñwu ki wa chiya ñwu wa go.’ Ma jẹñwu kpo dago agbade oli ugbogaga ki gb’unyi lẹ dago, ma la adu ch’iyachi. Taki Samsin d’omu nyatẹ ch’adua ru Jihofa kakini: ‘O Jihofa, agba dabi d’ukpahiu ñwu mi onukate-i ta.’ Ẹgba-lẹ, iloji Samsin dabi mu fu mẹ. Oñ Samsin gwọnyu oli ugbogaga meji ki j’alumeji unyi ki gb’unyi lẹ dago, i la kọ ẹchẹ kp’ukpahiu-wñ chakaa. Oñ unyi lẹ mu gwulọ ab’amonẹ ki j’ọmọ chakaa ma, i la fu ma kpa gbaa. Samsin onugo la lekwu.