Jihofa Kọla Ñwu Samuẹl

Elai Agboji Amatama che n’amọma meji ku ma ach’ukọlọ atama ef’unyi-Ọjọ. Odu ma che Họfni kpai Finehas. Ma leb’ọda Jihofa n, ma la ach’amonẹ ẹbiẹnẹ nyọnyọ. Ichẹñwu k’amonẹ m’ẹñwu ichẹbọ ko wa ñwu Jihofa, Họfni kpai Finehas ad’ukpẹ ẹla ki ch’e-ọmẹmẹlẹ kwefu-wñ ñwu ọla-ma. Elai che gb’inabali lugbo amẹñwu k’amọma-wñ ache, ama i chẹñwu duu oji-wñ n. Jihofa ajẹ k’ẹñwu-i ki na che abalẹ alo?

Samuẹl ch’imọtọ agbade Họfni kpai Finehas. Amaa, dagba ki dabalẹ, i ch’awọli ma n. Ẹdọ Jihofa che bọ ru Samuẹl. Odu ọjọ ka alu ki Samuẹl alolu, i gb’omukọla ki ad’odu-wñ. I kwanẹ, i ra lot’ugbo Elai tak i kakini: ‘Omi dẹ!’ Amaa, Elai ka ñwu kakini: ‘U d’ẹ no. Mu dabi nya dachi.’ Samuẹl mudabi nya dachi. Ubilẹ, i ñọ dabi gb’omukọla lẹ gẹ. Iko ki Samuẹl dabi gb’omukọla lẹ onukẹta, Elai fu ma kakini Jihofa ch’ẹnẹ ki adọ Samuẹl. I ka ñwu Samuẹl kakini ichẹñwu ki dabi gb’omukọla lẹ, k’i kakini: ‘Kọla ke Jihofa. Adu wẹ aneti.’

Samuẹl mu dabi nya dachi. Ubilẹ, i gbọ ọmukọla lẹ ki kakini: ‘Samuẹl! Samuẹl!’ Taki Samuẹl dohi kakini: ‘Kọla ke Jihofa, todu adu wẹ aneti.’ Oñ Jihofa ka ñwu kakini: ‘Ka ñwu Elai kakini na anya d’olefi ñwu Elai kp’abo unyi-wñ todu ki che m’ẹñwu ki lugbo ẹbiẹnẹ k’amọma-wñ ache ef’unyi-Ọjọ, ki ma la chẹñwu duu oji-wñ n.’ Odudu ọjọñwa-wñ Samuẹl f’ọna unyi-Ọjọ bi dabalu ki cha che kwobi. I na ch’okpo eka ñwu agboji amatama lugbo ẹñwu ki Jihofa ka ñwu. Amaa, Elai fu dọ i la t’ọ ene kakini: ‘Ọma mi, ẹñwu ch’ọla ki Jihofa ka ñw’ẹ taa? Ẹ ki d’ẹñwu duu maja ñwu mi n.’ Taku Samuẹl f’ọla lẹ gbaa ka ñwu.

Samuẹl na gbọkonẹ alo waa, Jihofa la d’ugbo-wñ. Kw’ukpoji ọwọ ka at’ukpoji ọwọ ekeji abo Israẹl chakaa f’u ma kaki Jihofa fu Samuẹl chi ki ch’akachẹ kpai akajọ mẹ.