Ugbalutanẹ Ki Jẹfta Che

Abo Israẹl dabi ñọ r’ẹrẹ ubi ñwu Jihofa, ma dabi chanẹ er’amọjọ omunẹ. Iko k’abo Amọn k’ogwu bọ abo Israẹl, am’ọjọ ọlemi lẹ neke chẹñwu duu ki ach’atẹko abo Israẹl ọna duu n. Abo Israẹl ch’ọbata ọdọ wewe. Otitala-wñ, ma ka ñwu Jihofa kakini: ‘A dure mẹ. A ch’ologwu b’ẹ k’ẹ m’uwa gbatanẹ b’ọwọ amẹnọla-wa tẹ.’ Abo Israẹl f’amojibo am’ọjọ omunẹ lẹ kpọfọ, ma la mu ko rinyọ b’efu ma tẹ, taku ma dabi chanẹ erẹ Jihofa. Jihofa tene ki na li ma alu ku ma defu ọbata lẹ alo n.

Jẹfta ch’agbiti ogwu ki n’ukpahiu, i la t’ọgba ogwu ñwu abo Israẹl alu ku ma nya j’ogwu kp’abo Amọn. Jẹfta ka ñwu Jihofa kakini: ‘Ichẹñwu k’ẹ jẹ ñwu mi ku du abo Amọn, na gbalu ñw’ẹ kakini ichẹñwu ku m’oji da, ẹnẹ duu ki akw’alugbọna unyi-mi dufu aledo mi ejodudu, ẹnẹ-lẹ ache e-Jihofa.’ Jihofa neti r’adua Jẹfta, i la jẹñwu ki du ef’ogwu lẹ.

Alu ki Jẹfta doji kw’oko ogwu w’unyi, ẹnẹ ejodudu ki led’o ch’ọma-wñ onobulẹ, ọma kate ki la nẹ dẹ. Ọma-wñ led’o, i n’eicha na agwo, i la n’ido ata. Ẹñwu Jẹfta anya che taa? I rewa ugbalutanẹ ki che, tak i kakini: ‘O ọma-mi! Ẹ f’umi che ache kpa ke-o. U gbalu ñwu Jihofa mẹ. Ku neke chẹñwu ku gbalu, na d’ẹ datẹ ñwu Jihofa ef’unyi-Ọjọ ki dẹ Shailo.’ Amaa, ọma-wñ ka ñwu kakini: ‘Ata-mi, ichẹñwu k’ẹ gbalu ñwu Jihofa mẹ, otila i che k’ẹ f’u de. Ẹñwu ku na tene k’ẹ che ñwu mi che kakini, na tene k’omi kp’abo igbẹlẹ mi k’a lo nya jọ dama ojuwo ochu meji, ubilẹ na lo.’ Ọma Jẹfta nya rẹ Jihofa ef’unyi-Ọjọ kp’ẹdọ-wñ chakaa gbogbo w’ọjọ ukwu-wñ. Ọdọ duu ab’igbẹlẹ-wñ awa dejudo unyi-Ọjọ ki dẹ Shailo.