Hana Ch’adua Ki Jihofa Ki D’ọma Ñwu

Ọnẹkẹlẹ ẹnẹ Israẹl ka k’odu-wñ kọ Ẹlkana n’ọya meji, odu-ma che Hana kpai Pẹnina. I muda afẹdọ Hana tule. Pẹnina anyi Hana anyinacha todu ki Hana ma n’ọma n, owñ la che n’amọma wewe. Ọdọ duu, Ẹlkana ak’abo akwọra unyi-wñ nya r’Ọjọ unyi-Ọjọ ki dẹ Shailo. Iko ka ku ma j’ọmọ, i li kaki ẹdọ Hana ọya ufẹdọ-wñ chẹ kpabiẹ. Oñ i ka ñwu kakini: ‘Ẹ ki r’akwu n, Hana. U d’emi ñw’ẹ, u la afẹdọ wẹ nyọnyọ.’

Ubilẹ, Hana kw’ọmọ lẹ, i le nya ch’adua. I na r’akwu alu ki abi ki Jihofa ki ch’atẹko-wñ. I la gbalu ñwu Jihofa kakini: ‘Jihofa, ichẹñwu k’ẹ m’ọma ọnẹkẹlẹ du ñwu mi, na du datẹ ñwu Jihofa gbogbo w’ọjọ ukwu-wñ.’

Agboji Atama k’odu-wñ kọ Elai na g’alu ki Hana na r’akwu. Elai neju kak’ọtẹ i ñmọ-i. Oñ Hana dohi ñwu kakini: ‘I ch’abalẹ i dẹ no ondu-mi. U ñm’ọtẹ no, onobulẹ k’ẹdọdudu-wñ chẹ nana u che. Akanya-mi oñ na adu daj’anẹ ọgba Jihofa-i.’ Tak Elai fu li kaki ẹñwu ki ka ñwu Hana lẹ ch’eju-wñ n. Oñ i ka ñwu Hana kakini: ‘Ọjọ ki d’ẹñwu k’ẹ bi’u lẹ ñw’ẹ.’ Ẹdọ Hana lew’anẹ tak i kw’ọmọ le. I t’ọdọ ka n, i f’ọma ọnẹkẹlẹ ka bi, i la d’odu-wñ kọ Samuẹl. Ẹ neke kpibẹ alu k’ẹdọ Hana bọ kade?

Hana gbenyọ ugbalutanẹ ki che ñwu Jihofa n. Alu ki Samuẹl d’alu ẹnya, Hana mu du le ti Shailo, i la f’u datẹ ñwu Jihofa. Hana ka ñwu Elai kakini: ‘Ọma ku ch’adua ru Jihofa todu ñwu-i dẹ. Na du mẹ ñwu Jihofa. Gbogbo w’ọjọ ukwu-wñ, u mu du ñwu Jihofa.’ Ẹlkana kpai Hana awa d’ejudo Samuẹl ọdọ duu, ma la ag’afẹ wa ñwu ọdọ duu ku ma wa. Jihofa la d’amọma ọnẹkẹlẹ mẹta kpai onobulẹ meji manyu ñwu Hana.