Gidiọn F’abo Midian Du

Alu ki dẹ pẹẹ, Abo Israẹl dabi ti Jihofa nọ, ma la chanẹ er’amọjọ omunẹ. E-lẹ jẹñwu abo Midian ku ma j’oji amẹñọrẹ ma, ku ma la kpa amẹñwu ku ma gbẹ oko biẹ ọdọ mebie. Todulẹ, abo Israẹl chanẹ emaja ñwu abo Midian ef’awo ojuwo. Taku ma kwadọ Jihofa ki mu ma gba. Oñ Jihofa kp’onuchẹ-wñ ka w’ugbo Gidiọn, i ka ñwu kakini: ‘Jihofa f’uwẹ chi k’ẹ ch’ajogwu lile ki n’ukpahiu.’ Oñ Gidiọn t’onuchẹ Ọjọ lẹ ene kakini: ‘Abu na neke jadu abo Israẹl ke, ẹnẹ omi che?.’

Ẹñwu ajẹñwu Gidiọn ma kaki Jihofa f’owñ chi mẹ? Gidiọn m’edudu ẹla ko janẹ tak i ka ñwu Jihofa kakini: ‘Ichẹñwu k’ọjọ mu ñwa odudu, k’eli ki chi b’edudu lẹ ma, ama k’anẹ ki chẹ gbẹ, taku na ma jalii kak ẹ tene k’u jadu abo Israẹl.’ Odudu ọjọ ñwa, eli chi b’edudu lẹ ma, anẹ la chẹ gbẹ! Amaa, Gidiọn dabi ka ñwu Jihofa odudu ọjọ ñwa lẹ kak i jẹñwu edudu lẹ ki chẹ gbẹ, ki la jẹñwu eli chẹ kọ anẹ. Jihofa ñọ jẹñwu ki che abalẹ. Ubilẹ taki Gidiọn ma jalii kaki Jihofa f’owñ chi ki gb’abo Israẹl tanẹ mẹ. Gidiọn f’amisoja-wñ ko jọ dama ku ma nya k’ogwu b’abo Midian.

Jihofa ka ñwu Gidiọn kakini: ‘Na jẹñwu abo Israẹl ki du. Amaa, todu k’amisoja wẹ chẹ wewe, mẹ neke na kpibe kakini amẹ du abo Midian kp’ọla mẹ-i. Ka ñwu ẹnẹ duu ki ach’okpo ki dabi t’unyi-wñ.’ Am’isoja ki dabi t’unyi dabu onẹ icham ny’ọgwọkọ ugbo ogwu ny’oke meji [22,000], am’isoja ki la bọ dabu onẹ icham ny’ọgwọkọ ugbo mẹgwa [10,000]. Taki Jihofa ñọ ka ñwu kakini: ‘Am’isoja ki j’ugbo wẹ chẹ wewe kpọ. Mu ma ko gwọru w’ugbo omi ki acha, k’ẹ la ka ñwu ma ku ma ñmọ kwef omi ki acha lẹ. Abo e-ki adeju tanẹ ag’emi g’anumọ alu ku ma añm’omi lẹ kate owñ ẹ chi.’ Amonẹ ogwu mẹlu ugbo mẹta [300] kate la defu ọla ẹmu alu ku ma añm’omi-i. Oñ Jihofa gbalu kak amonẹ gwẹẹ ki dẹ-i anya du am’isoja Midian ki ch’amonẹ icham ny’ọgwọkọ ugbo ọgbọ mẹfa ny’ẹgwẹlu [135,000].

Odu ọjọ lẹ Jihofa ka ñwu Gidiọn kakini: ‘Iko lewa k’ẹ k’ogwu b’abo Midian mẹ!’ Taki Gidiọn m’ọkakachi du ny’ẹnẹnẹnẹnẹ-ma ọwọ manyu ugege, ẹmu la j’efu ugege lẹ. Oñ i ka ñwu ma kakini: ‘Mẹ go mi, ku mẹ la che alu k’u che.’ Gidiọn f’ọkakachi fa, i f’ugege ki d’ọwọ-wñ kpọfọ, i n’ẹmu ọwọ i la kpogwu kakini: ‘Ọbẹchageli Jihofa kpai e-Gidiọn!’ Abogwu-wñ onẹ ogwu mẹlu ugbo mẹta [300] lẹ onugo la ch’alu ki Gidiọn che lẹ. Tak abogwu Midian chanẹ ech’okpo, ma la chanẹ era ukpatukpa. Ma ñọ chanẹ ek’uja b’ọla-ma. E-i ch’iko omunẹ ki Jihofa dabi ñọ ch’atẹko abo Israẹl ku ma du am’ẹnọla-ma.