Rutu Kpai Naomi

Iko ukpọta ojanẹ Israẹl, ẹnẹ Israẹl ka k’odu-wñ kọ Naomi mu ñọ t’ojanẹ Moab kp’ọkọ-wñ manyu amọma-wñ ọnẹkẹlẹ meji. I dẹ pẹẹ, ọkọ-wñ lekwu. Amọma-wñ ọnẹkẹlẹ mejeji la nẹ Rutu kpai Ọpa ku ma ch’abo Moab. I muda chẹñwu ẹdọdudu kak i lewa t’iko ka, amọma Naomi mejeji lekwu.

Alu ki Naomi gbọ kaki ukpọta ki d’ojanẹ Israẹl takpa mẹ, i f’ibe kpẹ ki dabi t’ojanẹ-wñ. Rutu kpai Ọpa leb’ọ, amaa alu ku ma d’ejọna Naomi ka ñwu ma kakini: ‘Mẹ ch’amọya ọmẹmẹlẹ ñwu amọma-mi, mẹ la ch’amọya-ọma ọmẹmẹlẹ ñwu mi. Na tene k’ejeji mẹ ki dabi n’ọkọ. Mẹ dabi t’ojanẹ Moab.’ Ma muda dohi kakini: ‘A fẹdọ wẹ! A tene t’uwẹ nọ n.’ Naomi f’ọla gbiti na ka ñwu ma ku ma na lo. Ukpoji-wñ, Ọpa mu dabi, ama Rutu kọ edabi. Naomi ka ñwu kakini: ‘Ọpa mu dabi alo t’ugbo abo-wñ kpai am’ọjọ-wñ mẹ. Uwẹ onugo ki t’Ọpa ubi alo k’ẹ dabi t’ojanẹ wẹ.’ Amaa, Rutu kakini: ‘U dabi kwubi wẹ n. Abo-wẹ ach’abo mi, Ọjọ-wẹ la ach’Ọjọ mi.’ Abu ẹ neju kaki ẹdo Naomi dẹ alu ki Rutu kọla lẹ?

Rutu kpai Naomi lewa ojanẹ Israẹl iko ku ma achanẹ ekp’ọka bali. Ọjọ ka, Rutu lo nya ja inanẹ ẹñwu oko ef’uchẹ ẹnẹ ka ku ma adọ ki Boaz ki ch’ọma Rehab. I gbọ kaki Rutu ch’ẹnẹ Moab i che, kak’i la gwọnyu Naomi kp’ẹdọ ka. I ka ñwu abo ku ma ach’ukọlọ ñwu ku ma t’aminanẹ nọ ubi todu ki Rutu ki neke wa fiyẹ.

Anẹ ọjọ lẹ, Naomi tẹ Rutu ene kakini: ‘Ugbo ẹ nya fiyẹ ọka eñini?’ Rutu kakini: ‘Odu ẹnẹ k’u ch’ukọlọ oko-wñ eñini kọ Boaz.’ Naomi ka ñwu kakini: ‘Boaz ch’efu ọkọ-mi i che. I che nyọ k’ẹ na lebọ abo igbẹlẹ ny’oko-wñ. Abo duu anya d’ihianyi ñwẹ ọmọ n.’

Rutu na ch’ukọlọ ef’uchẹ Boaz gbogbo w’iko k’ẹñwu oko w’ukpoji. Boaz li kaki Rutu ad’ukpahiu-wñ kp’ẹdọ-wñ chaka tefu ech’ukọlọ, kak’i la ch’onobulẹ ọmẹmẹlẹ. Adiko lẹ, ichẹñwu k’ọnẹkẹlẹ lekwu ki ma la n’ọma n, efu-wñ ad’ọya-wñ ọya-ogwu. Todulẹ, Boaz fi Rutu nẹ. Ma bi ọma k’odu-wñ kọ Obẹd, ki ch’oukwọ Onu Defid. Ẹdọ amonukwu Naomi bọ nyọnyọ. Ma kakini: ‘Ejodudu, Jihofa di Rutu ñw’ẹ, i la ach’ali enyọ kp’uwẹ. Abajọ-i, ẹ f’aju ọnẹkẹlẹ nẹ mẹ. Jihofa ki n’ele.’