Ọjọ Ny’ojale Kpai Anẹ Ilẹ

Jihofa nyi wa-i. Owñ la nyi ẹñwu duu, t’amẹñwu k’a ali kpai amẹñwu k’a ma neke li n. Tak i nyi amẹñwu k’a neke li, i nyi amonuchẹ-wñ wewe. Ẹ che m’abo ku ma adọ k’amonuchẹ Ọjọ? Amonuchẹ Ọjọ ch’abo ki Jihofa nyi ma ku ma dab’owñ. A neke li ma n, dabalu k’a ma neke li Ọjọ n. Onuchẹ ka ki Jihofa nyi ejodudu mu d’ẹnẹ ki ach’atẹko-wñ. Onuchẹ Ọjọ lẹ la ch’atẹko Jihofa iko ki nyi am’ilawo, ochu, olu, kpai amẹñwu omunẹ. Oka ef’amẹñwu lẹ ch’anẹ ilẹ-i ki ch’unyi-wa ọmẹmẹlẹ.

Jihofa f’ilẹ-i che tẹ ñwu am’ẹla kp’amonẹ ku ma neke dodo efu-wñ. I jẹñwu olu ki na fu oji anẹ-ilẹ. I nyi am’uwo, ohimini abadi, kp’amaji.

Ẹñwu che ubilẹ? Jihofa kakini: ‘Na nyi egbe kpai am’oli.’ Tak am’ẹro oli ojoji-ojoji, emi ku ma ajẹ, kpai am’ododo chanẹ etiga dufu. Ubilẹ Jihofa nyi amẹñwu ki awi, amẹla ki def omi, amẹla ki alulẹ kpai ab’e-ki afa. I nyi ab’e-kẹkẹ dabu akoto, i la nyi ab’e-ki nana onugo dabu adagba. Ugbo ẹla e-k’ẹ ñeju tule dẹ?

Ubile, Jihofa ka ñwu onuchẹ-wñ ki nyi ejodudu kakini: “Awa ki ny’one.” Amonẹ ach’ojoji ñwu amẹla, ma aneke na ch’ọna amẹñwu kp’ọla-ma, ma aneke na kọla, na ny’anyi kpai ech’adua. Ma na dejutẹ anẹ ilẹ-i kpai amẹla. Ẹ che m’ẹnẹ ki ch’ọnẹkẹlẹ ejodudu? A nya li.