Ọjọ Ny’ọnẹkẹlẹ Kp’onobulẹ Ejodudu

Jihofa f’ẹñwu gbẹ ugbo ku ma adọ ki Idẹn. Uchẹ lẹ chẹ kọ ñwu am’ododo, am’oli kp’amẹla ojoji ojoji. Ubilẹ, Ọjọ nyi Adam ki ch’ọnẹkẹlẹ ejodudu, kwef ebutu tak i f’afu ny’efu iñmọ-wñ. Ẹ m’ẹñwu ki wa che ubilẹ? Tak ọnẹkẹlẹ lẹ mu d’onugo onẹ ki deju! Jihofa mu uchẹ lẹ du ñwu Adam ki dejut’ọ. I la ñọ ka ñwu ki d’odu ñwu amẹla duu ki dọmọ.

Jihofa d’ọda ogbogaga ka ñwu Adam. I ka ñwu kakini: ‘Ẹ neke jẹ kwef am’oli chakaa, ama ooka defu-wñ, ẹ ki j’e-lẹ n. Todu ọjọ duu k’ẹ f’e-lẹ jẹ, ekwu ẹ kwu.’

Anubilẹ Jihofa kakini: ‘Omi anya ch’ọna ẹnẹ ki ach’abunẹ Adam.’ Tak Ọjọ jẹñwu Adam m’olu lile du. Ubilẹ Ọjọ m’ikeli Adam ka du, owñ i mu du ch’ọna ọya ñwu Adam. Odu-wñ kọ If. Adam kpai If ch’akwọra unyi ejodudu ef’ilẹ-i. Abu ẹdọ Adam dẹ le alu k’Ojọ d’ọya ñwu? Ẹdọ Adam bọ nyọnyọ tak i kakini: ‘G’onẹ ki Jihofa che kw’ikeli mi! Ihi-i! Onẹ ki dabu omi dẹ.’

Jihofa ka ñwu Adam kpai If ku ma bi amọma ku ma la wewe nyọgba. I atene ku ma ch’ukọlọ dama k’anẹ-ilẹ-i ki neke mudi paradais abẹk uchẹ ọmẹmẹlẹ dabu uchẹ ki dẹ Idẹn. Ama, i dẹ alu k’Ọjọ tene ki dẹ n. Ẹñwu chi ki dabalẹ? A nya kọchẹ manyu efu ukọchẹ ki rọno e-i.