Jisọs Mu Dabi Tefu Ojale

Ẹgba ki Jisọs dẹ kp’amakọchẹ-wñ Galili, i d’ọda ogbogaga ka ñwu ma kakini: ‘Mẹ lo t’ugbo amonẹ ef ucheichi uchẹichi chakaa k’u mẹ ko ma ch’amakọchẹ-mi. Mẹ kọ ma amẹñwu k’u kọ mẹ, ku mẹ la na che ma baptism.’ Ubilẹ, i gbalu ñwu ma kakini: ‘Mẹ rewa, na ad’ugbo-mẹ iko duu.’

Jisọs d’ọla-wñ ñ’amonẹ gbogbo ọjọ ọgbọ meji [40] ubi ki dajikwanẹ. I d’ọla ñ’amakọchẹ-wñ wewe Galili kpai Jerusalẹm. I che kọ ma am’ukọ ogbogaga, i la ch’ukọlọ awuwu wewe. Ubilẹ, Jisọs d’ọla ñ’amẹnukpuchẹ-wñ ẹgba otitala oj’Uwo Olif. I ka ñwu ma kakini: ‘Mẹ kwo bi Jerusalẹm tẹ n. Mẹ na dede ẹñwu k’Ata gbalu-wñ tanẹ lẹ.’

Amaa, ẹñwu ki aka nẹru amẹnukpuchẹ-wñ eju n. Oñ ma t’ọ ene kakini: ‘Ẹgba k’ẹ nya j’Onu Israẹl dẹ-i?’ Jisọs dohi ñwu ma kakini: ‘I w’iko ki Jihofa atene ku j’Onu ta n. Amaa, ichẹñwu ki dẹ pẹẹ, mẹ agb’ukpahiu ẹgba ki afu ki afọ lewa abu mẹ ma, oñ mẹ ach’amẹnibenu-mi. Mẹ lo nya takoya uchẹnyọ Jerusalẹm, Judia, Samaria kpai am’ugbo ki jiji tule anẹ ilẹ-i.’

Ubilẹ, Jisọs chanẹ etẹgwu tef ojale gbogbo gbẹgba k’akpa fu gwebo. Amakọchẹ-wñ na go alo, gbẹgba ku ma ma li gẹ n.

Tak amakọchẹ lẹ kw’oji Uwo Olif, ma la mu dabi le ti Jerusalẹm. Ma muda ajeju jọ dama ejefu unyi ojale ka iko t’iko ach’adua. Ma na nede ki Jisọs ki ka ñwu ma ẹñwu ku ma ache.