Jisọs D’ọla-wñ Tejugede Ñwu Am’akpẹja

Ọjọ gwẹẹ ubi ki Jisọs d’ọla ñ’amẹnukpuchẹ-wñ, Pita lo t’Ohimini Galili ki nya kpẹja, Tọmas, Jemis, Jọn kpai uchẹ ka ef’amakọchẹ kpo ti Pita ubi. Ma tene ẹja kw’odu gbogbo gb’ọjọ ñwa, ma muda kpẹja duu n.

Odudu odudu ọjọ ekeji, ma li ọnẹkẹlẹ ka ki dago ọgb’ẹga. I n’omu dala tu ma ene kakini: ‘Mẹ che m’ẹja duu?’ Oñ ma dohi ñwu kakini: “Ehee!” Tak ọnẹkẹlẹ lẹ ka ñwu ma kakini: “Mẹ r’iga t’ọwọ awọtọ ọkọ.” Alu ku ma f’iga rọ t’ọwọ awọtọ ọkọ lẹ, ma neke f’iga lẹ dufu n todu iga lẹ kọ ñwu am’ẹja. Taki Jọn fu ma ẹrẹrẹ lẹ kak ọnẹkẹlẹ lẹ che Jisọs d’ọmọ. Oñ i kakini: “Ondu dẹ!” Ẹrẹrẹ lẹ, Pita mu rọ tef’aji tak i gwaji lo t’ọgb’ẹga. Amakọchẹ ki bọ onugo la chanẹ egw’ọkọ aw’ọgb’ẹga.

Alu ku ma lewa ọgb’ẹga, ma li ibrẹdi kpai ẹja ki n’oji una. Jisọs ka ñwu ma ku ma d’ẹja gwẹẹ wa kwef ẹja ku ma kpa ku ma du manyu ujẹñwu. Ubilẹ, Jisọs ka ñwu ma kakini: ‘Mẹ lewa ku mẹ kpuchọ.’

Ubi ku ma f’ukpuchọ jẹ kpa, Jisọs ti Pita ene kakini: ‘Ẹ fẹdọ mi t’ẹja ekpa le?’ Pita dohi kakini: ‘Iii, Ondu, ẹ chema ku na afẹdọ wẹ.’ Taki Jisọs ka ñwu kakini: ‘I dabalẹ, d’ujẹñwu ñw amala-mi jẹ.’ Jisọs ñọ dabi ti Pita ene kakini: ‘Pita, ẹ fẹdọ mi?’ Pita ñọ dohi ñwu kakini: ‘Ondu, ẹ chema ku na afẹdo wẹ.’ Jisọs ka ñwu kakini: “D’eju t’amala-mi.” Jisọs ñọ dabi ti Pita ene onukẹta. Tak ẹdọ Pita mu kpabiẹ, owñ i kakini: ‘Ondu, ẹ chema ẹñwu duu. Ẹ chema ku na afẹdọ wẹ.’ Oñ Jisọs ka ñwu kakini: “D’ujẹñwu ñw amala-mi ku ma jẹ.” Ubilẹ, oñ i ka ñwu Pita kakini: ‘Na t’umi ubi.’