Jihofa D’afu Ki Afọ Ñwu Amakọchẹ Jisọs

Ubi ọjọ mẹgwa [10] ki Jisọs dabi tef ojale, Ọjọ d’afu ki afọ ñwu amakọchẹ Jisọs. Iko lẹ ch’Ọjọ Ẹkoọje, ọdọ 33 I.K., amonẹ wewe la kw’ugbo ojoji ojoji wa Jerusalẹm todu uyọ lẹ. Amakọchẹ Jisọs ku ma jeju jọ dama ejefu unyi ojale ka, la dabu amonẹ ọgbọ mẹfa [120]. Achigili, ẹñwu awuwu ka lewa che. Ẹñwu ka ki dabẹnẹ k’una kpo dago oji okoke amakọchẹ Jisọs lẹ, ọgbọ ma la chanẹ ekọla alu ichi ojoji ojoji. Ef unyi ugbo ku ma jọ lẹ chakaa lewa kọ ñwu afu ki aju nana dabu obutu lile.

Amonẹ wewe ku ma wa Jerusalẹm lẹ chakaa gb’uchẹ afu lile ki dẹ-i, ma la ra lo t’unyi lẹ ku ma neke m’ẹñwu ki ache ọmọ lẹ. Awuwu fu ma mu alu ku ma gbọ k’amakọchẹ lẹ akọla alu ichi ojoji ojoji. Tak amonẹ lẹ kakini: ‘Abo ku ma jọ akọla ki dẹ-i ch’abo Galili ma che n? Abile ku ma akọla alu ichi wa?’

Taki Pita kpai amakọchẹ ki bọ kpo dago ọgba ọwọ amonẹ lẹ. Oñ Pita ka ñwu ma ọna ki Jisọs kwu le kpai alu ki Jihofa dabi du dajikwanẹ. Pita ka ñwu ma kakini: ‘Abajọ-i, Jisọs def ojale, i la gwugwu ọwọ awọtọ Ọjọ, i la d’afu ki afọ da b’uwa ma dabalu ki gbalu. Todulẹ oñ mẹ gbọ, oñ mẹ la li amẹñwu awuwu ki dẹ-i.’

Ọla ki Pita ka-i che tunyu amonẹ lẹ ẹdọ nyọnyọ, oñ ma t’ọ ene kakini: “Ẹñwu i dukpẹ k’a ache?” Taki Pita ka ñwu ma kakini: ‘Mẹ ribeda b’ẹbiẹnẹ mẹ tẹ, ku mẹ la che baptism ef odu Jisọs. Oñ amẹ onugo la agba ele afu ki afọ.’ Ọjọ lẹ ẹrẹrẹ, amonẹ ku ma che baptism dab ọnẹ icham nyọgwọkọ ugbo mẹta [3,000]. Kw’iko lẹ t’ọgba, amakọchẹ Jisọs chanẹ ewewe nyọgba ewo Jerusalẹm. Lefu atẹko afu ki afọ ki kw’ugbo Ọjọ, amẹnukpuchẹ chanẹ ejeju dama ku ma neke kọ amakọchẹ lẹ amẹñwu chakaa ki Jisọs d’ọda ñwu ma.