Ukọla Ojuwo Lẹ

Ubi ki Jisọs chi amẹnukpuchẹ-wñ mẹgweji [12], Jisọs kpo tanẹ kw’ojuwo w’ugbo k’amonẹ wewe jeju jọ. Amonẹ lẹ wa kwugbo ojoji ojoji dabu Galili, Judia, Taya, Saidọn kpai ọwọ ẹkeji Jọrdan. Ma k’amonẹ ojoji ojoji ku ma ach’ọga kpai abo k’amebili ad’ihianyi ñwu ma wa. Jisọs ch’ọga ma kpa chakaa. Ubilẹ, Jisọs kpo gwanẹ iba uwo, i la chanẹ ekọla ñwu ma. I kanẹreju ẹñwu ki dukpẹ k’onẹ ki che tak i neke ch’onukwu Ọjọ. I ch’otila k’a ma kaki ekwu Ọjọ akwu wa, k’a la na fẹdọ-wñ. Amaa, ichẹñwu k’a ma fẹdọ abomunẹ n, a neke fẹdọ Ọjọ n. Otila i che k’a na ch’ali ọmẹmẹlẹ kpai amonẹ duu dagba ki ch’amẹnẹbi wa.

Jisọs kakini: ‘Efẹdọ amonukwu-wẹ kate bọjọ n, i ch’otila k’ẹ fẹdọ amẹnẹbi-wẹ, k’ẹ la na du ba ñwu amonẹ kwefu ẹdọ-wẹ chakaa. Ichẹñwu k’onẹ aw’ẹdọ b’ẹ, lo t’ugbo-wñ ẹrẹrẹ k’ẹ nya ch’ologwu b’ọ. Na che kp’amonẹ ọna k’ẹ tene ku ma che kp’uwẹ gbagẹdẹ.’

Jisọs che d’ibe ọmẹmẹlẹ ñwu amonẹ lẹ chaka lugbo ẹñwu anana. I kakini: ‘Ech’onukwu kpai Jihofa ch’ogbogaga t’ọkọ enẹ nana le. Oji neke wa d’ọkọ-wẹ, amaa ẹnẹ duu neke d’onukwu ọmẹmẹlẹ k’ẹ nẹ kpai Jihofa oji n. Ẹ ki dejiji lugbo ẹñwu k’ẹ jẹ abẹk ẹñwu k’ẹ ñmọ abẹk ukpo k’ẹ nẹ n. G’amẹwẹ, Jihofa ajẹñwu ma ku ma n’ẹñwu ku ma ajẹ ki la abu ma jọ iko duu. Na rewa kakini Jihofa che m’amẹñwu ekwu-wẹ.’

Amonẹ lẹ li ẹnẹ duu ki akọla tunyu onẹ ẹdọ dabalu ki Jisọs aka ku ma agbọ lẹ mama ta n. Amagboji ọna-Ọjọ-egwa ma kọ ma amẹñwu ki Jisọs akọ ma lẹ mama ta n. Ẹñwu jẹñwu Jisọs ch’akonẹwñ ọmẹmẹlẹ taa? Jisọs ch’akonẹwñ ọmẹmẹlẹ todu ẹñwu ki akọ amonẹ chakaa ch’ugbo Jihofa i kwo.