Jisọs Kọ Amakọchẹ-wñ Alu Ku Ma Ach’adua

AmiFarisi ch’uchẹ abo ka ku ma achẹñwu todu k’amonẹ ki jẹnyu ñwu ma. Ichẹñwu ku ma chẹñwu ẹnyọ ñw’onẹ, ma ache todu k’abomunẹ ki li ma. Ma añeju ech’adua ef’ọja ugbo k’amonẹ wewe ana li ma. Ma akọchẹ am’adua ki jiji, ma adu ch’akatoji, ma la ach’adua lẹ ache-ñọ-che ef’ugwẹta ọna kp’unyi ujeju todu k’amonẹ ki neke gbọ ma. E-lẹ jẹñwu awuwu f’amonẹ mu alu ki Jisọs ka ñwu ma kakini: ‘Mẹ ki ch’adua dabu amiFarisi n, todu ma neju kak’Ọjọ agb’adua-ma ichẹñwu ku ma ad’ọla wewe chekwu ef’adua ma, amaa i dabalẹ n. Adua eche ch’ade uwẹ kpai Jihofa i dukpẹ ki che. Ẹ ki na kọla aka-ñọ-ka ef’adua-wẹ n. Jihofa atene k’ẹ kọla ñwu owñ alu ki dẹ ef’ẹdọ-wẹ.

Jisọs kakini: ‘Alu ku mẹ ach’adua dẹ: ‘Ata-wa ki def ojale, odu-wẹ ki na fọ. Ojanẹ ọfẹ-wẹ ki wa. Unekwu-wẹ ki che ef ilẹ-i alu ki dẹ ef ojale.’’ Jisọs ñọ ka ñwu ma ku ma ch’adua oji ujẹñwu ku ma ajẹ ọjọ duu, ku ma ch’adua k’Ọjọ ki d’adure-ma ba ñwu ma, ku ma la ch’adua lugbo amẹñwu omunẹ ki d’ẹdọ-ma gẹ.

Jisọs kakini: ‘Mẹ ki d’ọwọ n’adua eche n. Mẹ la na bi amẹñwu ekwu-mẹ kwugbo Jihofa Ata-mẹ. Ata kp’iye duu atene ed’amẹñwu ọmẹmẹlẹ ñw’ọma-ma. Ẹnẹ ọma-wñ abi’u brẹdi ki ad’okwuta ñwu? Abẹk ichẹñwu ki bi’u ẹja k’i ad’ejo ñwu?’

Jisọs la kanẹreju ukọ ki def’ọla-i: ‘Ichẹñwu k’amẹ che ma alu ku mẹ ad’ẹñwu ọmẹmẹlẹ ch’amọma-mẹ ele, abalẹ gẹ Jihofa Ata-mẹ ad’Afu-wñ ki Afọ ñwu abo ku ma abi kwugbo-wñ. Ẹñwu ki dukpẹ k’ẹ che che ebi’u’. Ẹ dọmọ alebọ am’ibe ki Jisọs du ñwu wa-i lugbo adua? Ẹñwu ch’amẹñwu k’ẹ ch’achadua oji-wñ?