Jihofa Dide Jisọs

I che n’abo ku ma d’ojanẹ ka ki jiji r’ojanẹ Israẹl ku ma kẹdọno kaki awo an’onẹ le. Anẹ ọjọ ka, abokẹlẹ ku ma kw’ojanẹ ọnajiji lẹ li ẹñwu ka ki dabu awo ki afanẹ odu, ki la alulẹ efu akpa, oñ ma kpo t’ọ ubi. Ẹñwu ki dabu awo lẹ la nẹ ma loti Jerusalẹm. Abokẹlẹ lẹ chanẹ etene kakini: ‘Ugbo ọma ku ma bi ki anya j’onu amiJu dẹ taa? A wa k’a dojikanẹ ñwu.’

Ẹgba ki Herọd ki ch’onu Jerusalẹm gbọ ẹñwu ki lugbo onu etitọ ki dẹ-i, i chanẹ ech’ẹdọ ñwañwala. Oñ i n’agboji am’atama ene kakini: ‘Ugbo i dukpẹ ku ma bi onu lẹ-i taa?’ Oñ ma ka ñwu kakini: ‘Amakachẹ che ka kakini ma nya bi efewo Bẹtlẹhẹm.’ Oñ Herọd f’abokẹlẹ ki kw’ọjanẹ ọnajiji lẹ dọ, i la ka ñwu ma kakini: ‘Mẹ lo ti Bẹtlẹhẹm ku mẹ tene ọma-lẹ, ku mẹ dabi wa ka ñwu mi ugbo ki dẹ. Omi onugo atene k’u dojikanẹ ñwu.’ Amaa, e-lẹ ch’emi i che.

“Awo” lẹ ñọ dabi chanẹ elulẹ. Abokẹlẹ lẹ la t’ọ ubi loti Bẹtlẹhẹm. “Awo” lẹ lewa dago oji unyi ka, abokẹlẹ lẹ la mu gwudu tef unyi lẹ. Ma li Jisọs manyu Meri iye-wñ ejefu. Ma dojikanẹ ñwu Jisọs, ma la k’amẹñwu ele ñwu dabu ọjamalia, frankinsẹns kpai mọr. Jihofa kpẹ abo-i ku ma wa tene Jisọs-i? Ehee.

Odu ọjọ lẹ, Jihofa ka ñwu Josẹf ef’ọna kakini: ‘Hẹrọd atene ki du Jisọs kpa. M’ọya-wẹ kp’ọma-wẹ du ku mẹ ra lo t’Ijipt. Mẹ j’ọmọ gbẹgba k’u na aka ñwu mẹ ku mẹ dabi.’ Ẹrẹrẹ lẹ, Josẹf kp’abo akwọra unyi-wñ le t’Ijipt.

Jihofa ka ñwu abokẹlẹ ku ma kw’ọjanẹ ọnajiji lẹ ku ma we edabi t’ugbo Hẹrọd. Alu ki Hẹrọd f’u ma kaki abokẹlẹ lẹ dabi w’ugbo-wñ n, ẹdọ-wñ mu kpabiẹ nyọnyọ. Alu ki ma neke li Jisọs gẹ n, i m’ọda du ku ma f’amọma duu ki dẹ Bẹtlẹhẹm ki ch’ẹgọ Jisọs chakaa kpa rinyọ. Ẹñwu duu muda kẹrẹbọ Jisọs ugbo ki dẹ Ijipt n.

I dẹ pẹẹ, Hẹrọd lekwu. Taki Jihofa ka ñwu Josẹf kakini: ‘Abajọ-i, anẹ chẹ bọ k’ẹ dabi mẹ.’ Josẹf kpai Meri manyu Jisọs mu dabi t’Israẹl ma la nya dodo ewo Nazarẹt.