Iko Ki Jisọs Ch’imọtọ

Josẹf kpai Meri dodo ef’ewo Nazarẹt kpai Jisọs manyu amọma-ma ọnẹkẹlẹ kp’onubulẹ. Josẹf ach’ukọlọ ikapita, i la na kọ abo akwọra unyi-wñ lugbo Jihofa kpai am’Ọlọda-wñ. Owñ kp’abo akwọra unyi-wñ alo nya rẹ Jihofa ef’unyi Ọjọ iko t’iko, ma lach’alo ti Jerusalẹm ọdọ-ọdọ nya ch’uche Elaloji.

Ẹgba ki Jisọs ch’ọma ọdọ mẹgweji [12], owñ kp’abo akwọra unyi-wñ loti Jerusalẹm dabalu ku ma ch’ache kwobi. Jerusalẹm chẹ kọ ñwu amonẹ ki kw’ugbo ojoji ojoji wa todu ku ma wa ch’uyọ uche Elaloji. Alu ku ma kpoji uche lẹ, Josẹf kpai Meri chanẹ ulẹ edabi ti Nazarẹt, ma la neju kaki Jisọs defu uchẹ abo k’ama kp’ama adabi ti Nazarẹt. Amaa, alu ku ma tene-wñ alumeji am’efu-ma, ma li kaki Jisọs defu ma n.

Ma mu dabi loti Jerusalẹm, ma la na tejanẹ Jisọs gbogbo ọjọ mẹta. Ọjọ ẹkẹta-wñ, ma lo t’efu unyi Ọjọ, ọmọ lẹ ma li Jisọs ki gwanẹ alumeji amakonẹñwu. I na netiru ma, i la na t’uma am’ene ogbogaga. Ẹdọ amakonẹñwu lẹ chẹ bọ ru Jisọs, ma la na t’onugo-wñ ene. Ohi ki Jisọs adu ñwu ma la ache ma awuwu. Ma li kaki Jisọs che n’uma Ọda Ọjọ nyọnyọ.

Josẹf kpai Meri na dejiji nyọnyọ kw’ẹgba ku ma ma li Jisọs n. Meri kakini: ‘Ọma, a na tejanẹ wẹ ugbo duu, ugbo ẹ nya gwu?’ Jisọs dohi ñwu ma kakini: ‘Mẹ ma kaki i ch’otila k’u def unyi Ata-mi n?’

Oñ Jisọs t’ata kp’iye-wñ ubi t’unyi ma Nazarẹt. Josẹf kọ Jisọs alu ki neke ch’ukọlọ ikapita. Ọla ẹnẹ ẹ neju kaki Jisọs che ẹgba ki ch’okolobia? Alu ki na gba, abalẹ i na n’ibe-i, i la na li ejumomi kw’ugbo Ọjọ kp’amonẹ.