Am’onuchẹ Ọjọ Du Kpogo Kaki Ma Fu Jisọs Bi Mẹ

Iko ka dọmọ ki Sisa Ọgọstọs d’ọda todu ku ma f’odu abo duu ku ma j’ojanẹ ugbo ki Rom n’ọda kade kọ ny’ef ọtakada. Josẹf kpai Meri le ti Bẹtlẹhẹm todu ku ma f’odu ma kọ, ugbo k’ọlọpu Josẹf kwo. Ẹgbalẹ, Meri la mẹru ọma ebi mẹ.

Ẹgba ku ma wa Bẹtlehẹm, ugbo kate ku ma li ku ma neke gwugwu ch’ugbo ku ma ak’amẹñwọrẹ jọ. Ọmọ lẹ Meri bi ọma-wñ ọnẹkẹlẹ k’odu-wñ kọ Jisọs. I f’ukpo weny’ọla tak i mu du dachi ef akpati ujẹñwu amẹñwọrẹ.

Amadidala j’egbili ki mẹru ewo Bẹtlẹhẹm adide amala-ma odu. Tak onuchẹ Ọjọ ka lewa adago ọgba ma, oñ ojima Ọjọ la m’anẹ nẹ l’uma daka. Ailo f’amadidala lẹ mu nana. Amaa, onuchẹ lẹ ka ñwu ma kakini: ‘Mẹ ki railo n. Uchẹnyọ ki ajẹñwu amonẹ duu ku ma yọ nana oñ na ajẹ r’umẹ-i. Todu eñini-i ma f’ẹnajadu bi ñwu mẹ ef’ewo Bẹtlẹhẹm.’ Ẹrẹrẹ lẹ, am’onuchẹ Ọjọ wewe le wa jọ ef’akpa ajẹnyu ñw’Ọjọ kakini: ‘Ojima ki che-i Ọjọ ki d’atatẹ, urẹdọ ki la che-i abo-wñ anẹ ilẹ-i.’ Ubilẹ am’onuchẹ Ọjọ lẹ takpa ranẹ. Abu amadidala lẹ che le?

Oñ amadidala lẹ ka ñwu ọla-ma kakini: ‘Mẹ kanyi k’a loti Bẹtlẹhẹm ugbogbolo.’ Ma le ẹrẹrẹ lẹ nya kẹrẹbọ Josẹf kpai Meri ugbo ku ma ak’amala jọ. Ma j’ọmọ kpai ọma-ma ki def akpati ugbo ku ma ak’ujẹñwu amẹñwọrẹ jọ.

Awuwu f’abo duu ku ma gb’ọla k’onuchẹ lẹ ka ñwu amadidala lẹ mu. Meri na kpibe nyọñẹñẹnẹ lugbo ọla k’onuchẹ Ọjọ lẹ ka, i la gbenyọ am’ọla lẹ n. Amadidala lẹ mu dabi t’efuchẹ ugbo k’amala-ma jọ, ma la na ch’ugbede Ọjọ oji ẹñwu ku ma gbọ kp’ẹñwu ku ma n’eju-ma li.