Ọkẹkẹtẹ Belam Kọla

Abo Israẹl d’ajẹtachi dab ọdọ ọgbọ meji [40]. Ma f’amewo ẹgbiti wewe du ef’uja. Alu ku ma jọ ef egbili Moab ọwọ olu odudu Aji Jọrdan, iko lewa ku ma atefu anẹ k’Ọjọ gbalutanẹ ñwu ma mẹ. Balak, onu Moab, chanẹ ech’okpo kakini ma neke m’anẹ-wñ gba. Todulẹ, i f’ẹnẹkẹlẹ ka k’odu-wñ kọ Belam dọ ki w’ojanẹ Moab ki nama ñwu abo Israẹl.

Ama Jihofa ka ñwu Belam kakini: ‘Ẹ ki nama ñwu abo Israẹl n.’ Todulẹ, Belam kọ elo. Onu Balak dabi dọ onukeji, i la gbalu ñwu kak ẹñwu duu ki Balam atene owñ adu ñwu. Tabalẹ, Belam kọ. Ubilẹ Ọjọ kakini: ‘Ẹ neke lo, ama ẹñwu duu k’u ka ñwẹ k’ẹ ka oñ ẹ ka.’

Belam mutẹgwu oji ọkẹkẹtẹ-wñ, i la le t’ọwọ ojanẹ Moab. i dibe-wñ ki nama ñwu abo Israẹl ta dagba ki Jihofa ka ñwu ki we nama ñwu ma. Onuchẹ Jihofa ka d’ọla-wñ du tejugede onu mẹta ej’ọna. Belam muda li onuchẹ Ọjọ lẹ n, ama ọkẹkẹtẹ Belam che li onuchẹ lẹ. Ejodudu ọkẹkẹtẹ lẹ m’ejọna du tanẹ i la m’ọna oko du. Ubilẹ, ọkẹkẹtẹ lẹ m’ọla-wñ du na kwulu okwuta, i la m’ẹrẹ Belam du kwulu okwuta lẹ. Otitala-wñ ọkẹkẹtẹ lẹ kpo dachi alumeji ej’ọna. Onu mẹta k’amẹñwu-i che oñ Belam n’oli adu gwo ọkẹkẹtẹ lẹ.

Ubi onu kẹta-wñ, Jihofa jẹñwu ọkẹkẹtẹ lẹ ki kọla. Ọkẹkẹtẹ lẹ tu Belam ene kakini: ‘Ẹñwu chi k’ẹ gwo mi kw’eñini-i?’ Taki Belam kakini: ‘Ẹ che mi dabẹnẹ k’u ch’ẹnidada, ọkwọchageli ma defu ọwọ mi abajọ-i, u ma mẹ du kpa mẹ.’ Ọkẹkẹtẹ lẹ kakini: ‘I ch’omi tete ad’ẹ lo t’ugbo duu k’ẹ tene lo kw’ọdọ wewe-i n? U che ch’ẹ abẹ-i ma ma mẹ?’

Ubilẹ, Jihofa jẹñwu Belam ki li onuchẹ Ọjọ lẹ. Onuchẹ Ọjọ lẹ kakini: ‘Jihofa che d’ufeti ñwẹ k’ẹ we nama ñwu abo Israẹl.’ Taki Belam kakini: ‘U f’ẹbiẹnẹ che. Na dabi alo t’unyi.’ Ama onuchẹ Ọjọ lẹ ka ñwu kakini: ‘Ẹ neke lo ti Moab, ama ẹñwu duu ki Jihofa ka ñwẹ k’ẹ ka kate oñ ẹ ka.’

Belam che leb’ufeti ku ma du ñwu-i? Ehee, i leb’ọ no. Anubi lẹ, Belam ch’alu duu ki neke che ki nama ñwu abo Israẹl onu mẹta, ama Jihofa jẹñwu ki dẹnyọ ñwu ma. Ubilẹ, abo Israẹl kogwu b’abo Moab, ma la mu Belam du kpa. I ma nyọ ñwu Belam ichẹñwu ki netiru Jihofa akw’ẹgba ejodudu n?