Ọya Ohene

Ahị ọ-ka yé apyobwuna bwu ugbinyịrọ bala ịwọ nya iJisosi ahị baba nyọka la ọmyịmyị u-uhye nya iya ọkịlaa-kila nyamwụ. (Efe. 1:7) Angịlẹ ká iJisọsị wụrụ ‘ịkpịlọ ịkịla’ á ri ịkaa bala ọ-nwa ere lụka nya Ang Oriri nya Obyi nya Ọngọlahị lụka ọkẹkpẹ ka, ị́ tị kaa ri ka daalẹ wẹẹ. (Jọn. 10:16) Ọ tị lịnyị lẹ, ị kaa yé apyobwuna bwu ugbinyịrọ bala ịwọ nya iJisọsị ịKịrayịsị. Ị kaa yé apyobwuna ọọwa bwula ọmyịmyị ọlala u-uhye nya iya ọkịlaa-kịla nya iJisọsị bala ang ịlẹ kọ họ chịkpẹẹ. (Jọn. 6:53) Ọdatị tị ri, angịlẹ kị ka ye oriri ịgọgọ ri angịlẹ mẹjẹ nyori ị ri ụpa nya iro ọnwanwa onyeewe bala ọ-la ẹhị ọrịrịị-rịrị nyọka kpeji ị-Ịpyị Adịrahụ. Lẹ, kori kahị ri angịlẹ ká Ohe ya ida wụ lee ịkpịlọ ịkịla, ahị baba nyọka la ọmyịmyị chajị kahị ka la ọhịhị ọmyịmyị-ka. w24.12 13 ¶14, 16

Lụka nya Ang Oriri nya Obyi nya Ọngọlahị, iJisọsị ya ịkaa ọmyịrịị-mịrị ka ha alẹrụ nyamwụ lẹ, o byaa nyori nyị ku ọmwakpa nya ugbinyịrọ nya ọwa lẹlẹ. Ọ tị ya nyori ere ọlẹ kọ ya haa nyọka nwà nyị ku ọmwakpa nya “ịwọ . . . nya iro ọnwanwa onyeewe.” (Mak. 14:22-25; Luk. 22:20; 1 Kọr. 11:24) “Ala Isirẹlụ” nya olegu, ịlẹ kị ka juwa “ị-ịpyị Adịrahụ nya Ohe Oluhye,” Ohe à nwà iro ọọwa ta lẹ. (Hib. 8:6, 10; 9:15) “Ịkpịlọ ichiche” iJisọsị à ya ẹla ta lụka nya Ang Oriri nya Obyi nya Ọngọlahị lẹ. Alẹrụ nyamwụ ịlẹ kị họ kpẹẹkpẹẹ, kị juwa i-ijata ụka kọ ya ẹlẹwẹ à ri angị họhẹ ẹ-ẹpwụ nya ebwo ochiche ọwẹ lẹ. Ịwa à ri angịlẹ kị ka juwa bala iJisọsị e-epwoohe lẹ. w24.12 11 ¶9-10

Ị pyịrị iJisọsị ha, ị woo, doo ido, chị ala bọọ, ya eje woo kịrọrọ, bala ọ-yọọ akama ịnyịnyị. Alisoja myị́myị́ kpọọ ka ẹga kị ka nwọọ, ọọwa ị gwoo ilo ba okoji lẹlẹ. Ọ jụ Ohe Oluhye Adamwụ yẹẹyẹẹ nyọka yẹ jaabwọ kọ wẹẹ bọhụ la ọmyịmyị ẹ-ẹpwụ nya ajụjụ ọwẹ wuu. IJihova la ọngịrị nyọka chewu ke Ọnyị nyamwụ hi akama ọwẹ, ma ọ tị wu ọngịrị ọtụka nyamwụ ọọwa kpa. Ịyẹ tị́ du? Ọháha ịnyị. Iya ọkịlaa-kịla nya iJisọsị à ri ang ọlẹ kọ mẹjẹ gụ́gụ wuu nyori à há iJihova yẹẹyẹẹ lẹ. Ọ hu Ọnyị ọlịkẹjẹ nyamwụ kịliya, bọhụ ẹ-ẹpwụ nya ọjụjụ ọtụka-ọtụka chajị nyọka chịng da bwu ẹpwụ nya ọhọbịrị bala igu. (1 Jọn. 4:9, 10) Nyịlẹhị-ịlẹhị, ọ tịtọ nyọka da ọngọngọọng nyahị ụbwọ nyọka ma uya ta ọhọbịrị, kahị tị ka kụrụ! w24.08 6 ¶13-14

Ahị ka jẹ́ jaabwọ kahị há iJihova gụ́ ọọwa kori kahị kụ irya nya abwọlẹ kọ jwọọ kaka ba nyọka yẹ Ọnyị nyamwụ kọ ja yẹ akama. Olegu Onyobyi ya nyori ọnchẹ nya Ohe ọhẹ-lọhẹ nyị́ ka myị-ị godayị giri-giri ha Ohe kori kị nyị lujwo nyọka họ ịnyị ka. Nyọka mẹjẹ nyori Olegu Onyobyi me ọnọọkịla, iJihova ya ẹga da ká iJisọsị yẹ akama gbee kọọ gbu. (Job. 2:1-5) IJihova kpa ẹhị yẹ jaabwọ ká ala ịgba ọgbagba ịlẹ kịị tụ iJisọsị pyịpyị juwa kpọọ họ, alisoja nyoo enyiri, ene kịị gwoo ilo ba okoji. IJihova kpa ẹhị yẹ ịnyịnyị jaabwọ ká Ọnyị nyamwụ yẹ akama gbee kọọ gbu igu onyuujujwo. (Mat. 27:28-31, 39) IJihova la ọngịrị nyọka wu ang ịwẹ wuu kpa la ọ-ka họ myị́. (Mat. 27:42, 43) Ma, ó-ri ká Ohe á họ ịnyị ụka ọwẹ lẹ, iJisọsị á ka jẹ́-ẹ rahị kpehe kaka, áhị tị ka la ẹhị ọrịrịị-rịrị kaka ịnyịnyị. Lẹ, iJihova ya iwe da ká Ọnyị nyamwụ ka yẹ akama gbee kọọ chị ẹjẹ. w25.01 22 ¶7

Ahyẹẹnụ ọwẹ ri iNisan 16, ẹka 33 nyọlẹ kị ma ịKịrayịsị kpá. Ejiri bala uhi myị ẹpwụ nya angịjụgbẹyị nya iJisọsị. Angịmiiye la ẹpwụ nyaa rụ bwu iJerusalẹm wẹẹ jẹ ka epweji nya Ẹmayọsị. Ọlẹng ọhẹ jẹ ka waa ọyị lẹ, o juwa bajẹ balaa lẹlẹ. Angịjụgbẹyị ịịwa wẹẹ ja oja nya abwọlẹ ká ẹla ọlẹ kọ họ ta iJisọsị jwaa kaka ba. Ọọwa ọngga ọwẹ à dọmwụ nyọka ya ẹla balaa u-uhye nya ang ịlẹ kị ka jẹ́-ẹ deeri kaka lẹlẹ. Ọ dọmwụ nyọka da ụpwụ ịgọgọ wụlẹ “bwu ụka nya iMosisi gbee ju ka ụka nya alọmwụ,” u-uhye nya ang odudu ká iMesaya ka yẹ akama gbee kọ ka gbu. Ụka ká ịwa angị ịta-ịta pwụ Ẹmayọsị lẹ, angịwẹ à jẹ́ nyori iJisọsị nya-à wẹ ká Ohe wuleji bwula igu lẹlẹ! (Luk. 24:13-35) IJisọsị mẹ ịlọmwụ jẹ angịjụgbẹyị nyamwụ ugbabwọ ịmanyị tị́ ẹ-ẹpwụ nya ahyẹẹnụ 40 ihyẹẹkpẹ nyamwụ ịlẹ kọ hụ odehe ọlẹ. Lụka ọwẹ, ọjụjụ bala uhi ọlẹ kọ myị ẹpwụ nya angịjụgbẹyị ịwẹ ene-ene yẹ ka ri ọkẹkẹnị, ọọwa tị du kị la ugbodu ojuju nyọka kịnyaa la o-ya ẹrụ ọnyịịla nya Ịpyị-Adịrahụ je angịnyị bala ọ-mẹ ang jaa. w24.10 12 ¶1-3

Jaabwọ ká ụka á ja jẹ, onjwo kaa nwà ka ri ọngọgbahị, ma ọngịnyị á kaa la gbẹgbịlẹ ẹ-ẹpwụ nya ang nya olegu chajị nyori ụka tị́ wẹẹ jẹ lẹ pyii ka. Ọ-chụ pwokwita, aanahị ịla ịKọrịntị ye ẹrụ ọnyịịla myị, hu enyi Ohe, ye ahị nya olegu ịgọgọ, bala o-yé apyobwuna yẹẹyẹẹ bwu ẹla ọlẹ ká ọlẹrụ ịPọlụ mẹjáa. (Ụkụr. 18:8-11) Ma, ẹka lụmẹ-lụmẹ nyọlẹ kị hu enyi Ohe kpá, angịhyẹ nyaa juwa kị họ ẹla lala anjwo wẹẹ. (1 Kọr. 3:2) Nyọka jẹ́-ẹ nwà ka la gbẹgbịlẹ, o ri o-pyii kahị ka tịtọ nyọka la gbẹgbịlẹ ene. Angịlẹ kị tịtọ nyọka “nụwa ẹ-ẹpwụ nya uchi,” kọ háa gụ́ nyọka ri ọnyị ọlụbwọ ẹ-ẹpwụ nya ang nya olegu, á kaa nwà kịlahị ka. (Etu 1:22) Áhị tịtọ nyọka lala angịlẹ kị nwà ọlam-ọlam kpá wuu lẹ, kị tị kaa kịnyaa la ọ-kpụnịrọ adaa bala ịnaa nyọka cheje nya ẹla haa ka. Ọkọkọ nya ọọwa, ahị tịtọ nyọka hu olo nya ịlọhị kpa bala ọ-họ ká igu oriri nyahị bala iJihova ka nwà kịlahị. Kori ká ja maga nyọka la gbẹgbịle wẹẹ, raabwọ ká iJihova ka ‘hu imyi nya ụkụrwọ ọhọhọ họọ dang bala ọ-ya ọngịrị ọ-kpa họ ụkụrwọ ọọwa myị́ hang.’—Filip. 2:13. w24.04 4 ¶9-10

IJihova họ kahị jẹ́ jaabwọ kọ kaa lọọ, ụka kọ ja ka la angịnyị eje. (Isi. 33:11) IJihova-á kaa chị agaga ka ta ọngịnyị ayịreji gbangbang ka, kori kọ yẹ nyori ọbaba nya ọọwa jị mẹ ịnyị. Ahyẹẹrwẹrwa nyamwụ lụmẹ yẹẹyẹẹ, ọ tị kaa mẹ ahyẹẹrwẹrwa jẹ ụka ká ọbaba nyamwụ-ụ́ ji. Ẹlịyẹ ahị tị jẹ́ u-uhye nya angịlẹ kị ka wuleji bwula igu ka? ỊBayịbụụ gu ẹnyị nya angị ịmanyị-ịmanyị ịlịnyị. IJisọsị ya nyori iJudasị nyị́ ja wuleji bwula igu ka. (Mak. 14:21; yẹ ịJọn 17:12 bala ang ọjẹ́jẹ ọlụwa ịnyịnyị.) IJudasị jẹ́ nyori ang ọlẹ ká ọwa nyị wẹẹ ka họ nyị́ há ka, ma ọ tọchị-tọchị họ ẹla wu iJihova bala Ọnyị nyamwụ ẹjẹ. (Yẹ ịMakị 3:29 bala ang ọjẹ́jẹ ọlụwa ịnyịnyị.) Ịnyịnyị, iJisọsị ya nyori angịhyẹ ẹ-ẹpwụ nya alegbeju nya ịgba ọgbagba ịlẹ kị bọọ ẹtẹ nyị ka gbu la ọ-ka la iwe nya owuleji bwula igu ka. (Mat. 23:33) Ọlẹrụ ịPọlụ tị ya nyori angị ji ẹkpẹ da ogu ịlẹ kị myị yẹ irya da ka nyị́ ka wuleji bwula igu ka.—Hib. 6:4-8; 10:29. w24.05 4 ¶10-11

Kori kahị rụ lụrụ hi iJihova ka aalẹ, Olegu Onyobyi á ka jẹ́-ẹ họ ịngịngịhyẹ ọlẹ kọ ka họhị ang gboyi myị́ oyi kaka. (1 Jọn. 3:8) Ẹ-ẹpwụ nya odehe onyeewe, iJihova ka kịnyaa la ọ-chewu ke aligu nyamwụ ịlẹ kị họ kpẹẹkpẹẹ bwu ang myị́ ang ọlẹ kọ ka bịrị igu oriri nyaa balọọ, ọ tị ka chewu kaa hi igu ịnyịnyị. (Ọwụ. 21:4) Ọ ri ihi ọtụka hahị nyọka ri ọngga ọ-ọdụ nya iJihova—kahị ka ri igu o-chii balọọ pyịyọọ gboyi myị́ oyi. (Isi. 37:27) Ányị ahị tị́ ka kpa ịlọhị kori kahị tịtọ nyọka kịnyaa la o-ri ọngga ọ-ọdụ nyamwụ? Kori ká ọngịnyị á wụrụng wẹ ẹpwa nyamwụ, à ka tịtọ nyọka họ ẹla ọlẹ kọ ka kpọọ ịpyọ. Ụ-ụgbẹyị ọlịnyịnyị, ọ ka háahị nyọka jẹ́ ang ọlẹ ká iJihova tịtọ bwu ẹga nya angịlẹ kị tịtọ nyọka kịnyaa la o-ri angga nyamwụ. Ọháha ọlẹ kahị la ẹ-ẹga nya iJihova dudu kahị kaa họ jaabwọ kahị ka họ myị́ nyọka “kpụ Ọngọlahị Ohe Oluhye ayịdang ịpyọ yẹẹyẹẹ.” (Kol. 1:10) Lẹ ahị ka jwoo ihi hiigu-hiigu. Ihi okpori-kpori ọọwa ka dahị ụbwọ nyọka cheji ba hi abwẹla ọlẹ kọ ka wọọ ẹjẹ. Ọ ka háahị nyọka ‘kpa ịlọhị keji dụmwọ ha Ohe Oluhye nyahị’ ụka wuu.—May. 6:8. w24.06 4 ¶8-9

IJihova byi Ebiraham nyị hu Ayịsiki ọnyị nyamwụ kịliya. Ẹlẹwẹ ka lujwo ha Ebiraham yẹẹyẹẹ. Kpọkpọọkpọ, ọ nwụlanọ nyọka họ jaabwọ ká Ohe byoo. Ma Ohe tị hwoo abwọ ụka ọlẹ kọ wẹẹ ka nwụ ọnyị nyamwụ. Oja ọwẹ tị mẹ ẹlẹhẹ ọlẹ ká iJihova ka họ jẹẹhị. IJihova nwụlanọ nyọka hu Ọnyị ọlịkẹjẹ nyamwụ kịliya. Angịnyị ehe há iJihova yẹẹyẹẹ. (Ọmwụ. 22:1-18) Ẹka ohu ịmanyị tị́ ka ịlahị nyọọwa, ká Ohe ya Ehile ha ala Isirẹlụ, o byaa nyị ya iyo kịliya chajị kị ka yé ọ-hịnyọhi nya ịhọbịrị nyaa. (Liv. 4:27-29; 17:11) Iya ịkịlaa-kịla ịịwa mẹjẹ nyori iJihova ja ka họ ang ọtụka ọlẹ kọ há gụgụ wuu nyọka chị angịnyị ehe da bwu ọhọbịrị gbang-gbang. Ohe ya irya ha alọmwụ nyamwụ nyọka da ẹla u-uhye nya ọnyị ọlẹ kọ myọnụ, kọ tị wẹ ka ri Ọnyị ọlẹ kọ há Ohe gụgụ wuu nyori nyị ka yẹ akama gbee kị ka nwọọ chajị kọ ka chị angịnyị ehe da bwu ẹpwụ nya ọhọbịrị bala igu!—Ayị. 53:1-12. w24.08 4 ¶7-8

Ụka ọnyị myị́ ọnyị kọ háng nyọka kpa wa ịBayịbụụ, maga ká kpa ẹla ọlẹ ká wa họ ụkụrwọ. Ụka ká ja wa ụpa nya ịBayịbụụ ọhẹ, tọ ịlọng wo, ‘Ányị m tị́ ka kpa ẹlẹwẹ họ ụkụrwọ ẹ-ẹpwụ nya ọhịhị nyam lẹẹlẹẹ lee ụ-ụwa ị-ịlahị?’ Ọ-chụ pwokwita, ọhẹka ịBayịbụụ ọwawa nyang kpang pwụ ụpwụ nya 1 Ala ịTẹsalonika 5:17, 18. Ụka ká wa ịgba imiiye ịwẹ kpá, à ka jẹ́-ẹ chị dayị a ka kụ irya u-uhye nya abwọlẹ ká kaa raabwọ hyaa-hyaa kaka ba bala abwọlẹ ká abwọ ọrịrị nyang kaa bwu ọkịlẹtụ kaka ba myị́. À ka jẹ́-ẹ kụ irya u-uhye nya ang ịlẹ ká ka ji Ohe obe u-uhye nyaa ịnyịnyị myị́. Ọhẹka à cheje nyọka ji iJihova obe u-uhye nya ang ịta ịkpọnchị ịhyẹ. Kori kọ dọmwụ ri iminiti ịmanyị-manyị ká kpa kụ irya ju ang ọlẹ ká wa bwu ịBayịbụụ, ọ kaa dang ụbwọ wo etu nya ẹla ọlẹ ká wa bala ọ-ka jẹ́ jaabwọ ká ka kpa họ ụkụrwọ. Kori ká ja kpa ẹla ọlẹ ká wa bwu ịBayịbụụ họ ụkụrwọ ẹnụ myị́ ẹnụ, ọ́ ka nọ chẹẹ lẹ a ka wẹ ka ri oligu nya iJihova ọlam-ọlam lẹlẹ. w24.09 4-5 ¶9-10

IJihova họhị la abwụma ọdatị. Nanana nyori ahị kaa chị ọkẹkẹnị ụka ká ọngịnyị á gahị āhị, ọkẹkẹnị nyahị tị kaa gụ́ ụka kahị hu ha angịkịla. Ugbodu kaa kpụhị nyii ụka kahị da aanahị ụbwọ. Ahị tị kaa chị ọkẹkẹnị ụka kị jihi obe ọhọhọ. Ma, kori ká ọngọlẹ kahị họ ọnahị á ji obe ọhọhọ lee ọ-họ nyị ka wẹwẹ, ahị ka jẹ́-ẹ chị ọkẹkẹnị chajị nyori ahị họ ang ọnyịịla. A deeri ka, ịngịngịhyẹ ọlẹ ka hu ha, “[iJihova] ka ya ọ-gụ ọọwa gụ hang tịrẹkpẹ myị.” (2 Ego. 25:9) Ahị-ị́ ka jẹ́-ẹ hu ha lala iJihova ẹnẹnẹhẹ kaka! Ịngịngịhyẹ-ẹ́ tị ji ọ ka ya ọkẹkẹnị hahị lala iJihova ọ-nwụhị uri la ịlọmwụ kaka. Lẹ ahị cheje nyọka gbịla Adahị ọla epwoohe ọlẹ kọ kaa hu ha pyẹ ụbwọ maa mẹ. w24.09 31 ¶20-21

IJihova ri Ohe nya ahyẹẹrwẹrwa. (Eje. 103:13; Ayị. 49:15) Ụka ká ẹla ọjụjụ á họ tahị, ọ kaa jwọọ ịnyịnyị. (Sẹk. 2:8) Ọ họ ọ chịkpẹẹ ahị ka jẹ́-ẹ tụ jwoo chwẹẹ lala aligu. (Eje. 25:14; Ụkụr. 17:27) Ọ kaa kpịlọmwụ keji; “ọ tịị hiri ẹhị kpẹẹ kaka yẹ uhye-ọgba bala odehe. Ọọ wule okpehika eji hi ịpyị.” (Eje. 113:6, 7) Ịyẹ à tị́ ka du ká ọngịnyị ka tịtọ nyọka ya ogbo ha Ohe ọtụka nyahị ka? Ahị kaa ya ogbo ha iJihova chajị ahị tịtọ ká angịkịla ka jọ́ọ. Iru nya angịnyị á jẹ́ ẹlịlẹhị u-uhye nya iJihova ka. Ịyẹ tị́ du? Chajị Olegu Onyobyi kpaa idu ẹ-ẹpwụ nya ọkịlẹtụ bwula ịnịịkịla ịlẹ kọ kaa me ba Ohe, ká angịnyị tị kaa myị jwoo. (2 Kọr. 4:4) Olegu Onyobyi họ ká angịnyị myị nyori iJihova nyị ri Ohe o-ju agbama, nyị́ kpahị ju angịnyị ka, bala o-ri ọwa nya-à ju ọmwụ nya iru nya akama ilodehe ọlẹ lẹ. Ma ahị tị jẹ́ ẹlịlẹhị u-uhye nya Ohe nyahị! Ahị la iwe nyọka jẹ́-ẹ ya je angịkịla ụma nya Ohe ọlẹ kọ ri, chajị kị ka ya ogbo họọ ịnyịnyị.—Ayị. 43:10. w25.01 3 ¶6-7

Nanana nyori Ọnyị nya Ohe la kpẹẹkpẹẹ bala ọ-kaa họ akụrwọ ẹbyẹbyị lụmẹ-lụmẹ, Olegu onyobyi kpa alabẹkpẹ nyamwụ me ịnịịkịla lụmẹ-lụmẹ bọọ. Ọ-chụ pwokwita, alegbeju nya ịgba ọgbagba ịlụka ọwẹ byi angịnyị nyori iJisọsị nyị yé ọngịrị nyọka ku alegu inyibyi dodehe bwu ẹga nya “olegbeju ọgbahị nya alegu inyibyi” ịnyị. (Mak. 3:22) Ụka kị wẹẹ la iJisọsị eje, alegbeju nya ịgba ọgbagba chị ẹla bọọ nyori nyị kaa ya ala inyibyi ba Ohe, ọọwa lẹ, ị du angịnyị ju kị ka byi olegbeju nyị nwụ iJisọsị ẹẹ. (Mat. 27:20) Nyọlẹ kọ nọ chẹẹ ká alabẹkpẹ nya ịKịrayịsị wẹẹ kpa ẹrụ ọnyịịla pyẹ, aluji nyaa “kele kaka du ala iJentayịlị ju, bwula o-juwa ju irya nya ala iJentayịlị ịịwa ụhwa jahị da” angịnyị nya ịKịrayịsị kị ka taa pyịpyị. (Ụkụr. 14:2, 19) Ẹpwang ọ-Kụ Gbeji nya ahyẹẹnụ 1 nya Ọya Ọkụrụ Oheeye nya 1998 ya ẹla ọlẹ u-uhye nya ụpwụ nya Ụkụrwọ nya Alẹrụ 14:2: “Ọ́ ba o-ori yẹkẹẹ, ala iJuu ịlẹ kị ri aluji nya Ohe á tịtọ nyọka wo ẹla nyaa ka lẹ ka, ị họ ụkụrwọ la ọngịrị-ọngịrị nyọka bịrị ẹnyị nyaa ị-ịlahị nya ala iJentayịlị, chajị ká Angịnyị nya ịKịrayịsị ka waa ẹjẹ, kị ka myị ke ụrụ wo ẹla nyaa ka.” Daalẹ Olegu Onyobyi wẹẹ kịnyaa la “pịrị alodehe ọlẹ wuu ju.” w24.04 11 ¶15-16

Ọngịnyị ọ-ka ye ọhịhị ọmyịmyị-ka á kpụnịrọ ụka ọlẹ kọ gbu ka. IJihova ri ọngọ la eje ọkpẹẹkpẹẹ—ọ ja cheje ọnyịịla ọlẹ kọ la kpakpa. (Eje. 33:4, 5) Ahị la ahị ọdahile nyori “Agaba ọ-cheje ọtụka-ọtụka nya alodehe wuu” ka cheje ọlẹ kọ chịla pyii lẹ. Ahị tị ka jẹ́-ẹ ya ịnyịnyị nyori ọngịnyị ọ-ka yé ọhịhị ọmyịmyị-ka á kpụnịrọ ẹga ọlẹ kọ kụ ka. IJihova á ka myị-ị la ala ẹpwụma lee epweji ịlẹ ká ẹrụ ọnyịịla á wu ọyị lẹka eje nya “embiri” ẹnẹnẹhẹ ka. (Mat. 25:46) Agaba ọ-cheje ọtụka-ọtụka nya alodehe wuu kpahị ju angịlịnyị gụ́ụhị ahị wẹẹ. Áhị jẹ́ jaabwọ ká iJihova ka họ ụka nya akama ọtụka okpelego kpangga ka. Ma angịhyẹ ka la iwe nyọka jẹ́ ang u-uhye nya iJihova, la ọmyịmyị ẹ-ẹga nyamwụ, bala ọ-ka ji oye nyamwụ ụka kọ ka chị ịgọgọ ju ẹnyị nyamwụ ẹ-ẹhị nya alodehe wuu.—Isi. 38:16. w24.05 12 ¶14-15

Ọ kaa há anchẹ nya iJihova nyọka da awụlẹ ụbwọ. (2 Kọr. 8:4) Ma, ụka ọhẹ, ọ kaa baba nya ugbodu ojuju nyọka họ ịnyị. Ọ-chụ pwokwita, ụka ká ẹwụ á kpeji, angịgbahị nya ọjịra-jịra ịlụwa kaa jẹ́ nyori aanahị alẹng bala anyang nyị baba nya ọhụ ojuju, ụbwọ ọdada, bala ang nya olegu tụ ịnya ugbinyịrọ. Chajị nya ọháha ọlẹ ká angịgbahị ịwẹ la ẹ-ẹga nya ịkpịlọ nya Ohe, ị kaa hu ọhịhị nya ịlaa ju odo chajị nyọka họ ịbaba nya aanaa haa. Ẹ-ẹpwụ nya iwe-ahụrụ ịlịịwẹ, ọ ka baba nya ahị ọ-ka chebwo hi awụlẹ ẹnẹnẹhẹ ka. Ju ihi nya ẹla ọlẹ ká egbeju ẹpwa ọla oye nyang mẹjẹ. (Hib. 13:17) Angịgbahị nya ọjịra-jịra ka kụ ẹhị yẹ ẹla ọmẹjẹ ọnyị kọ ji u-uhye nya abwọlẹ kị ka bwu nwụlanọ gbe ayịreji o-bwu agaga bala ẹla ọlẹ kị ka họ ụka kọ ji. (1 Kọr. 14:33, 40) Ju ugbodu ma tị dụmwọ-dụmwọ. (Etu 22:3) Kụ irya ene ká ka họ ẹla. A gba ju ka ẹpwụ nya ẹla ododdu ka. Kpụnịrọ iJihova. Kpịtịya nyori iJihova ka dang ụbwọ nyọka jẹ́-ẹ da aanang ụbwọ la ewu ọ-chike. w24.07 4 ¶8; 5 ¶11

Adirahu iDevidi jẹ́ iJihova bala ọ-kaa kpụnịrọọ yẹẹyẹẹ. Ụka ọlẹ ká Adịrahụ ịSọlụ bala angịkịla lẹẹ maga nyọka nwụ iDevidi, ọ raabwọ bịlẹ iJihova nya ụbwọ ọdada. Ụka ká iJihova wo abwọ ọrịrị nya iDevidi kọ chọọ da kpá, ọ ya nyori iJihova “juwa hịhị” ịlẹhị! (Eje. 18:46) Bwula omyi ẹla ọwẹ, iDevidi á wẹẹ mẹjẹ nyori ọ jẹ́ ká Ohe ji ịịwẹ kem ka. Ụpwụ ọhẹ ya nyori iDevidi nyị wẹẹ ya jaabwọ kọ dahịhile iJihova kaka ba nyori “o juwa hịhị bala ọ-kaa da angịnyị nyamwụ ụbwọ ụka wuu.” Ee, iDevidi jẹ́ bwụla ang ịlẹ kị họ ọ-ọhịhị nyamwụ nyori Ohe nyị juwa hịhị, ọ-jẹ́ myị̀myị̀ ọọwa du kọ cheje nyọka kịnyaa la ọ-gbịgba ha iJihova bala ọ-ka ya ogbo họọ lẹ. (Eje. 18:28, 29, 49) Ahị ọ-jẹ́ myị̀ymyị̀ nyori iJihova ri Ohe ọlẹ kọ jụwa hịhị kaa gụhị gbịlaa nyọka gbịgba họọ la ila ọchịchị. Ahị ka la ọngịrị nyọka bọhụ ẹ-ẹpwụ nya ịmayẹ bala ọ-ka cheri kịnyaa ẹ-ẹpwụ nya ụkụrwọ nyamwụ ọhọhọ. Ahị tị ka jẹ́-ẹ cheje nyọka tụ́ ju iJihova chwẹẹ. w24.06 20-21 ¶3-4

Ẹlịyẹ ahị tị́ ka jẹ́ bwu ẹla nya ọlẹrụ ịPọlụ ọlẹ kọ da kịla ala ịTẹsalonika wẹ? Ụka kahị wo ẹla ọlẹ kọ pwoku ẹla ọlẹ kahị jẹ́ bwu ịBayịbụụ ka lee ụka kahị wo oja ọlẹ kọ gbuhị ịnyịrọ wọọ, ahị ka kpa ẹla ọjẹ́jẹ nyahị họ ụkụrwọ. Lụka nya Soviet Union onyogo, aluji nyahị ya ileta ọhẹ ha aanahị ọlẹ kọ lala o-ri nyị bwu egbeju ẹpwa nyahị ọla odehe wuu. Ileta ọọwa ju aanahị ịhyẹ ọhụ nyọka chebwo kaka ri ogu ọdatị ọlẹ kọ ka họ ang ọlẹ kọ háa myị lẹ. Ileta ọọwa la ịlọmwụ me ẹlịlẹhị. Ma ileta ọọwa á pyịrị aanahị ịlẹ kị godayị giri-giri ju myị́ ka. Ị jẹ́ nyori ẹla ọla ileta ọọwa nyị́ pwoku ẹla ọlẹ kị kaa mẹjáa ene-ene ka. Alẹ, aluji nya ẹlịlẹhị kaa kpa ang-abwọ nya ichene maga nyọka hụhị ahị bala ọ-chịhị ebwo. Ọkọkọ kahị ka myị ká ‘ọkịlẹtụ nyahị ka juwa hụ́ jigi-jigi,’ ahị ka chewu ke ịlọhị bwula ọ-kụ irya ju ẹla ọlẹ kahị wo lee kahị wa, nyọka jẹ́ kori ká ẹla ọọwa á pwoku ẹlịlẹhị ọlẹ kahị jẹ́ ene lẹ.—2 Tẹs. 2:2; 1 Jọn. 4:1. w24.07 12 ¶14-15

Eje nya ẹla ọlẹ kọ la kpọnchị gụ́ wuu ká ọngịnyị kaa chị à ri eje nyọka hu ịlọmwụ ju iJihova ụ-ụbwọ bala ọ-ka ri ụpa nya ugbiyegu nya angị kaa gbịgba họọ lẹ. O ri irya nya iJihova ká ọng myị́ ọng ka họ ịnyị. Ịyẹ tị́ du? Ọ tịtọ kị ka ri igu balọọ bala ọ-ka hịhị gboyi myị́ oyi. (Ehile. 30:19, 20; Gal. 6:7, 8) Ma, iJihova á tị kaa gbile ọngọngọhẹ la agbụrụ kaka gbịgba họọ ka. Ọ kaa ya iwe da ha ọngịnyị nyọka chụ ẹla ọlẹ kọ tịtọ nyọka họ. Ọ́ tị ri ká Ọngịnyị nya ịKịrayịsị ọlẹ kọ hu enyi Ohe lẹ á bịrị ehile nya Ohe bwula ọ-họ ọhọbịrị ọtụka bẹẹ? Kori kọ yẹ irya da ka aalẹ, ị ka gbọọ hi ọjịra-jịra pyii. (1 Kọr. 5:13) Ma, ọ tị lịnyị odu lẹ, iJihova kaa ya ẹhị rịrị ká ọlọhọbịrị ka tịrẹkpẹ wẹ ẹga nyamwụ. Ọọwa à dọmwụ ri ẹla ọkpọnchị ọlẹ kọ du ko ya Ọnyị nyamwụ kịliya lẹ, chajị nyọka họ ká ọ-hịnyọhi ka ji ha alịhọbịrị ịlẹ kị yẹ irya da. IJihova ri Ohe nya ọháha ọlẹ kọ kaa bịlẹ alịhọbịrị nyọka yẹ irya da.—Sẹk. 1:3; Rom. 2:4; Jem. 4:8. w24.08 14 ¶1-2

Lụka ọlẹ ká ọlẹrụ ịJọn da ileta ọhata nyamwụ, angịhyẹ juwa kị kaa mẹ ẹla nya ọnọọkịla jẹ du ká o-wo lawụlẹ ka ji ẹpwụ nya ọjịra-jịra. Ma, angịkịla tị kịnyaa la ọ-jẹdịyẹ “ẹ-ẹpwụ nya ẹla nya ịlẹhị ọhọhọ.” Ị ju ihi nya iJihova bala ọ-kaa ‘kpa ehile nyamwụ.’ (2 Jọn. 4, 6) Angịnyị nya ịKịrayịsị ịlẹ kị la ọmyịmyị ịịwẹ kpa ọkẹkẹnị kịla ịJọn bala iJihova ayịdang. (Etu 27:11) Ẹlịyẹ ọwẹ à tị́ mẹjẹẹhị? Ọmyịmyị ọ-lala kaa kpa ọkẹkẹnị wahị bala angịkịla. (1 Jọn. 5:3) Ọ-chụ pwokwita, ahị kaa chị ọkẹkẹnị nyori ahị jẹ́ họ ká iJihova chị ọkẹkẹnị. Ọ kaa kpụ iJihova ịpyọ ụka kọ yẹ kahị ja cheji ba ang ịtịpyọ ịla odehe ọlẹ bala o-juwa jwoo ihi. Alegu-ẹrụ ịla epwoohe tị kaa chị ọkẹkẹnị ịnyịnyị. (Luk. 15:10) Ahị ịnyịnyị kaa chị ọkẹkẹnị ụka kahị yẹ ká aanahị ịkịla á mẹ ọmyịmyị jẹ. (2 Tẹs. 1:4) Ụka ká odehe nya Olegu Onyobyi á tị ta ayịreji kpá, ahị ka chị ọkẹkẹnị nyori ahị jẹ́ godayị giri-giri ha iJihova pwụ ocheju. w24.11 12 ¶17-18

Ányị a tị́ ka wụla abwẹla nya ọngịnyị yẹ tata ka ba ene ká ka ya irya nyang joo? Kori ká ya irya nyang je ọngịnyị hyaa, ọ ka lala o-ri ahụ nyị kụ irya yẹẹyẹẹ ene ká wẹẹ cheje ka. (Etu 29:20) Kori ká tị dayị tata lụmẹ ene nyọka ya irya nyang je ọngọọwa, ọ ka lọọ lala o-ri ahụ nyị́ kaa cheje nya ẹla hyaa ka, ọgụgụ kori ká ọngọọwa á jẹ́ nyori ahụ nyị la irya ẹ-ẹga nyọwa. (Ọngọ. 11:4) Kpịtịya nyori, ene ká wẹẹ ka jẹ ta ọngịnyị, ó ri o-pyii nyori à ka rụrwọ ọngọọwa lẹka. Ma à baba nyọka jẹ́ myị̀myị̀ nyori à nwụlanọ nya ọrụ ọrwọrwọ lẹ bala o-ri ọngọọwa ri ọngịnyị ọlẹ kọ pwokung ịnyịnyị. Kori ká tị yẹ nyori ẹla nyang ja há ọngọhẹ bẹẹ? Kori ká ọngọọwa á háng jaabwọ ká họ́ọ ka aalẹ, họ kọ jẹ́ bwula ọhọhọ nyang ẹ-ẹga nyamwụ. Ọ ka tịpyọ kori kahị ja họ lala o-ri iwe nyị ji nya ọngịnyị ọ-ka ri igu balahị kahị tị jẹ́ nyori ọ lịnyị ịlẹhị ka.—Efe. 4:25. w24.05 22-23 ¶9-10

Angịlẹ ká Ohe ya ida wụ́ ịnyịlẹhị kị tị họ kpẹẹkpẹẹ ịwa iJisọsị à ka ye jụ ka Ịpyị-Adịrahụ ọla epwoohe lẹ. Ọngọnyị kọ gbeji giri-giri lẹpwụ nya angịlẹ ká Ohe ya ida wụ́ ka, Ohe-é ka kpọọ kaka jịra bala angịlẹ kọ “chụchụ ha ịlọmwụ” ka. (Mat. 24:31) Angịlẹ wuu kị tị la ẹhị ọrịrịị-rịrị nyoka hịhị odehe ọlẹ ka kụ la ahị kị ka gbeji giri-giri ịnyịnyị. Ahị jẹ́ iJihova yẹẹyẹẹ lẹ, ahị kaa dahịhile eje ọchịchị nyamwụ. Kori kọ chụ nyọka ya ida wụ́ angịhyẹ la ẹka ịkpanjẹ aalẹ, áhị ka chuko u-uhye nya ọọwa ka. Ahị ka kpịtịya nya angịlẹ ká iJisọsị ya ẹla rụ nyị họ ụkụrwọ lụka nya awa iwo kụrụ ookpokpo, lee oje ịrụ, ẹ-ẹpwụ nya oja ọ-kpịta nya ẹrụ ọlẹ ká iJisọsị ja. (Mat. 20:1-16) Angịlẹ kị wụrụ lụka ohyẹẹkpẹ ye uri ta angịlẹ kị wụrụ jene meme. Ịnyịnyị-ịnyịnyị, ụka myị́ ụka ká Ohe á chụ nyọka ya ida wụ ọngịnyị, ị ka ye uri nyaa e-epwoohe kori kị kpa ọmyịmyị nyaa kpọọ. w24.09 24 ¶15-17

IJisọsị ya ọgụ-ẹpẹtẹ ọkpẹẹkpẹẹ deeji u-uhye nya abwọlẹ kahị ka bwu bọhụ ẹ-ẹpwụ nya ẹla ọ-họ kịrọrọ. Iru nya angịnyị họọ ẹla ọtịpyọ tụ́ alugbiyegu nyamwụ ịhyẹ. Aanamwụ ya nyori nyị ja hyụla, alegbeju ị-mẹ ẹla nya Ohe jẹ ya nyị yé ọngịrị nyamwụ bwu ẹga nya alegu inyibyi, isoja nya ala iRom tị kpọọ họ, yọọ akama bala ọ-nwọọ ịnyịnyị. (Mak. 3:21, 22; 14:55; 15:16-20, 35-37) IJisọsị bọhụ ẹ-ẹpwụ nya ang ịtịpyọ ịwẹ wuu bala ịkịla la ọ-họ kwiwa ka. Ẹlịyẹ ahị tị́ ka jẹ́ bwu ọgụ-ẹpẹtẹ nyamwụ? (1 Pit. 2:21-23) IJisọsị ya ọgụ-ẹpẹtẹ ọkpẹẹkpẹẹ deeji hahị nyọka dịrẹ ụka kị họhị ẹla ọkịrọrọ. Ọ jẹ́ ụka kọ ka hu ujiji bala ụka kọ ka ya ẹla. (Mat. 26:62-64) Ẹ-ẹla ọnyị myị́ ọnyị kị chị bọọ, ọ kaa wẹ ẹla u-uhye nyamwụ ka. (Mat. 11:19) Ụka kọ tị ka ya ẹla, ọ́ kaa do angị tọọ pyịpyị ido lee ọ-chị uhihi jwaa ka. w24.11 4-5 ¶9-10

Kụ irya nyori à ya āhị ọlahịchịng ọhẹ ọlẹ kọ há ụhị yẹẹyẹẹ bala o-ju apyobwuna ha ọngịnyị ọlẹ kọ háng yẹẹyẹẹ wẹẹ. Ọ ka jụng yẹẹyẹẹ kori ká ọngọọwa á kpa ka nọ ang kem la ọ-kpịtịya nyamwụ kpong-kpong ka! Ma ọ́ tị ri ká oligu nyang ọọwa á kpa āhị nyang ọọwa họ ụkụrwọ kọ mẹjẹ nyori ọ myọọ lẹhị, ọ ka kpụng ịpyọ yẹẹyẹẹ. Ẹlịyẹ ahị tị́ wẹẹ ya? IJihova hu Ọnyị nyamwụ ha chajị nyahị. IJihova ka chị ọkẹkẹnị yẹẹyẹẹ kori kahị mẹjẹ nyori āhị ọnyịịla ọwẹ bala ọháha ọlẹ kọ gwoo gbịla nyọka ya Ọnyị nyamwụ hahị nyị myịhị lẹhị! (Jọn. 3:16; Rom. 5:7, 8) Ma jaabwọ ká ụka wẹẹ chịpwụrụ, ọ chịkpẹẹ myị́ nyori áhị ka yẹ ọ-ra kpehe lala āhị ọnyịịla-ọnyịịla kaka. Ọ ka lala o-ri ahị nyị kpa āhị nya Ohe kaka kpụ ịbaa. Ahị chị ọkẹkẹnị nyọlẹ kọ ya hahị, ma ahị-ị́ ya nọ ẹ-ẹga ọlẹ kahị ka jẹ́-ẹ yọọ ka. Nyọka họ kọ ka lịnyị ka lẹ, o-ri opyii kahị ka kụ irya ụka myị́ ụka ju ang ọlẹ ká Ohe bala ịKịrayịsị họ hahị. w25.01 26 ¶1-2

Ọọnahị ọlẹng ọlẹ kọ nwà nyọka ri ọngọgbahị nya ọjịra-jịra á ka ri “ọngọ onyeewe ẹ-ẹpwụ nya ẹla nya Ohe Oluhye ka.” Ịlẹhị lẹ, ọ́ ri o-pyii nyori a ka hu enyi Ohe la ẹka lụmẹ-lụmẹ ene kị ka chụng ka, ma a baba nya ụka nyọka jẹ́-ẹ ju igu oriri nyang bala iJihova ọngịrị bala ọ-jẹ́ jaabwọ ká ka kpa ẹla ọla ịBayịbụụ cheje ịnyịịla. Ene kị ka chụng nya ọngọgbahị nya ọjịra-jịra, o ri o-pyii ká ka kpịlọng keji lala iJisọsị bala ọ-nwụlanọ nyọka họ ụkụrwọ ha iJihova ụ-ụgbẹyị ọnyị myị́ ọnyị. A kaa ju ugbodu bala o-godayị gbe iJihova nyọka ya akụrwọ ịkịla hang ọọjịra-jịra. (Mat. 20:23; Filip. 2:5-8) À ka mẹjẹ nyori à “la ọhịhị ọlẹ kọ la ịgọgọ” bwula ọ-ya ụbwọ chị iJihova bala ehile nyamwụ u-uhye nya abwẹla ọnyịịla giri-giri bala ọ-ba ụgbẹyị ọkpakpa ọnyị myị́ ọnyị ká ogu nyamwụ á ya hahị jẹ. Ụpwụ Ịgọgọ ya gbagbịla nyori ọngọgbahị nya ọjịra-jịra nyị ka ri ọngọ jẹ́-ẹ mẹ ang jẹ. Ọọwa ri à ka ri ọngọ jẹ́-ẹ mẹ ang jẹ ụ-ụgbẹyị ọtụka-ọtụka a-ahị nya alụma ene? Ehe. A-angịgbahị nya ọjịra-jịra wuu à ri angị jẹ́-ẹ jụ ẹla ya lụmẹ ẹ-ẹpwụ nya alụma ka. Ma, ị tị jẹ́-ẹ da ẹla ọla ịBayịbụụ wụlẹ ụka kị ja kpa ẹrụ ọnyịịla pyẹ lee ụka kị ju aanahị ụga nyọka jwaa ọhụ. w24.11 23-24 ¶14-15

Ụka ká gbachị ẹla ọlẹ ká wo etu nyamwụ nwà ka ị-ịBayịbụụ, mwahị nya ẹla u-uhye nyamwụ. Ẹ-ẹpwụ nya ahyẹẹnụ ọọwa wuu, maga ká kụ irya kpori-kpori ju ẹla ọlẹ ká jẹ́ bala ẹla ọlẹ kọ mẹjẹng u-uhye nya iJihova, Ọnyị nyamwụ, bala ọháha ọlẹ kị la ẹ-ẹga nyang. (Eje. 119:97) Kori ká jẹ́ ịngịhyẹ onyeewe lee ang ọkpịpyọ ọhẹ ụka ká wa ịBayịbụụ lee ọ-jẹ́ ang nyịlọng ka wẹwẹ, ọkịlẹtụ a kpụng enyi ka. Ụka ọlịnyị, à ka jẹ́-ẹ yẹ ịlọng lala ọngọlẹ kọ ja mwahị nya okpoko ịgọm myị́. Angịlịnyị kaa bịrị awa lee ahyẹẹnụ ịmanyị tị́ la ugbodu ojuju juwa mwahị ene kị dọmwụ ka yé okpoko ịgọm ochiche-ochiche. Ma, abwọ á tị kaa chaa pyẹpyẹ ka, chajị okpoko ịgọm ju apyobwuna haa jaabwọ myị́ abwọ kọ ri ochiche kaka ba. Ang onyeewe ọnyị kahị jẹ́ bwu ịBayịbụụ tị ju apyobwuna gụ́ wẹẹ! (Etu 8:10) Lẹ, ju ugbodu ká kịnyaa la ịBayịbụụ ọwawa bala ọ-mwahị nya ẹla u-uhye nyamwụ.—Eje. 1:2. w25.01 25 ¶14-15

IJihova ya ahị guru kahị ka nwụlanọ nyọka hịnyọhi ha angịlẹ kị họ ẹla wụụhị ẹjẹ. (Eje. 86:5; Luk. 17:4; Efe. 4:32) Ẹla ọlẹ ká ọngịnyị ya lee ọ-họhị ka jụhị ọtụka-ọtụka myị́, ọgụgụ kori ká ọngọọwa á ri oligu o-chii lee olugbiyegu nyahị. (Eje. 55:12-14) Ụka ọhẹ, ọjụjụ nya ẹla ọlịnyị kaa lala abwọlẹ ká ẹma kaa gu ọngịnyị. (Etu 12:18) Ahị ka maga nyọka wu ọjụjụ ọọwa damile lee o-gu ahị gboo hoo myị́. Ma ọ-họ ịnyị ka lala abwọ ká ẹma á gu ọngịnyị kị tị pẹhyoo dụrọọ nụwa. Ụ-ụgbẹyị ọla ịnyịnyị, áhị ka jẹ́-ẹ ya ahị guru nyori ọjụjụ ọlẹpwụ nyahị ka myị́ kori kahị gu ahị gboo hyoo ịịwẹ kem ka. Ụka ká ọngịnyị á họ ẹla wụụhị ẹjẹ, ang ọlẹ kọ kaa wẹ ẹpwụ nyahị họhẹ-họhẹ ri agbama ojuju. ỊBayịbụụ dọmwụ ya nyori ahị nyị ka ju agbama myị́. Ma, ọ tị dahị ọna nyori ahị nyị ya iwe da ká agbama ọọwa á yehi la ka. (Eje. 4:4; Efe. 4:26) Ịyẹ tị́ du? Agbama á tị kaa họ ang ọnyịịla ọhẹ ka. (Jem. 1:20) Kpịtịya, ẹla à du ká ọngịnyị kaa ju agbama lẹ, ma ọ-ka kịnyaa la agbama ọọwa lee ọ-ka họ ịnyị ka tị ji ụbwọ nya ọngọọwa kọ ka chụ. w25.02 15 ¶4-6

IJisọsị ja oja ọhẹ ọlẹ kọ mẹjẹ nyori ọngịnyị ọlẹ kọ tụ́ okpoko guru kọ tị “kpụ ụdụ nya ẹla nya Ohe Oluhye” ka, nyị ri oluchi. (Luk. 12:16-21) Ọngọngọhẹ-ẹ́ jẹ́ jaabwọ ká ijuju ka la ka. (Etu 23:4, 5; Jem. 4:13-15) IJisọsị tị ya ịnyịnyị nyori angịlẹ wuu kị tịtọ nyọka ri angịjụgbẹyị nyamwụ nyị ka nwụlanọ nyọka “tụụbwọ hi” ang-ụdụ ịlẹ kị la. (Luk. 14:33) Ẹla ọlịnyị họ ta angịjụgbẹyị nya iJisọsị ịla iJudiya lụka nya oyi ọhọhẹ. Ị tị nwụlanọ nyọka tụụbwọ hi ang myị́ ang ịlẹ wuu kị la ịnyịnyị. (Hib. 10:34) Lụka nyahị ọlẹ, ụkụrwọ nya aanahị lụmẹ-lụmẹ gwaa myị ọọlajị nyọlẹ kị myọnụ nyọka kpa ụbwọ ka akpa ha ebwo nya upe ọhẹ-lọhẹ ka. (Ọwụ. 13:16, 17) Ịyẹ à tị́ daa ụbwọ nyọka jẹ́-ẹ họ ịnyị myị́? Ị dahịhile ọnụ ọmyịmyị nya iJihova la ọkịlẹtụ nyaa wuu. Ọnụ ọmyịmyị ọọwa ri: “Am Ohe Oluhye á ka kpanụ anụ angịnyị nyam keji kpong-kpong ka lee ọ-tụụbwọ hiinu kpá ẹnẹnẹhẹ kaka.” (Hib. 13:5) Lẹ, ahị kaa họ jaabwọ kahị ka jụ họ ba myị́ nyọka nwụla ang nọ gbe ijuju. Ahị tị kaa dahịhile la ọkịlẹtụ nyahị wuu ịnyịnyị nyori kori ká ẹlẹhẹ ọlẹ kahị yahị me ka á họ tahị wẹwẹ, iJihova ka kpẹhị rịrịịhị. w25.03 29 ¶13-14

IJihova á ya ahị guru kahị ka nwà ka la gbẹgbịlẹ la ọngịrị nya ịlọhị ka. Angịlẹ kị ri angịgbikpịlọ bala angịmẹjẹ ẹ-ẹpwụ nya ọjịra-jịra nwụlanọ nyọka dahị ụbwọ nyọka jẹ́-ẹ nwà ka ri “adam ọlẹng” bala “ọ-nwa kaka tọ ịKịrayịsị meme ẹ-ẹpwụ nya ọngịnyị nya Ohe Oluhye oriri.” (Efe. 4:11-13) IJihova kaa ya olegu ịgọgọ nyamwụ hahị nyọka dahị ụbwọ “la irya ọlẹpwụ nya ịKịrayịsị.” (1 Kọr. 2:14-16) Da ọọwa u-uhye, Ohe ya Apwụ nya Ẹrụ Ọnyịịla ine hahị, ịlẹ kị ya ẹla u-uhye nya abwọlẹ ká iJisọsị mẹ ang jẹ, ya ẹla, bala ọ-họ ẹla ụka kọ jam odehe kaa kpa ẹrụ ọnyịịla pyẹ. Bwula ọ-gbịla ụgbẹyị ọlẹ ká iJisọsị kaa kụ irya bala ọ-họ ẹla, à ka jẹ́-ẹ nwà ka la gbẹgbịlẹ ẹ-ẹpwụ nya Ọngọnyị nya ịKịrayịsị oriri. Nyọka jẹ́-ẹ nwà ka ri ọngọgbahị, o ri o-pyii kahị ka jẹ́ ang kpoye nya ang ịlẹ kahị jẹ́ họhẹ-họhẹ u-uhye nya ịKịrayịsị. w24.04 4-5 ¶11-12

Ahyẹẹnụ ọnyị myị́ ọnyị ahị kaa baba nyọka cheje nya ẹla. Ịhyẹ kaa chịkpẹẹ pwụ ẹgẹhẹ, lala ang ọlẹ kahị ka ri lụtụrụ lee ụka ọlẹ kahị ka rụ ka ube ka nune. Ala ịkịla tị kaa lujwo la ọ-ka cheje u-uhye nyaa. Ị ka gu ịnyịrọ ogogo nyahị, ọkẹkẹnị nyahị, angị háahị-há, lee ịgba ọgbagba nyahị myị́. Ahị tịtọ ká eje ọchịchị nyahị ka dahị ahị bala alugbiyegu nyahị ụbwọ. Ọlẹ kọ tị gụ́ wuu ri, ahị kaa tịtọ ká eje ọchịchị nyahị ka kpụ iJihova ịpyọ. (Rom. 12:1, 2) Ang ọlẹ ká ọngịnyị ka họ nyọka jẹ́-ẹ cheje ọnyịịla ri ọ-ka jẹ́ ẹlịlẹhị oluhye nya ẹla ọọwa. Ịyẹ tị́ du kọ baba? Kụ irya nyori ọngịnyị ka ẹga nya ọngọ họ utoji chajị nya ẹdụrụ ọhẹ ọlẹ kọ kpọọ la ọngịrị-ọngịrị wẹẹ. Ọngọ họ utoji ọọwa ka cheje nyọka họọ utoji ọlẹ kọ họ́ọ la ọ-wụlọọ yẹ lee ọ-tọọ ịtọ ẹla wo ene ka? Ọ́ ka jẹ́-ẹ lịnyị ka. Ahụ ịnyịnyị ka jẹ́-ẹ cheje nya ẹla gụ́ kori ká jene kụ irya u-uhye nya ẹlịlẹhị ịlẹ kị gu iwe-ahụrụ ọọwa. w25.01 14 ¶1-3

Ẹlịyẹ ahị tị́ jẹ́ u-uhye nya ahyẹẹrwẹrwa nya iJihova? Ányị ọ tị́ mẹjẹ nyori ọwa “ayịdang á tịtọ ká ọngọngọhẹ ka ta ayịreji” ka? (2 Pit. 3:9) Ahị yẹ jaabwọ kọ mẹ ahyẹẹrwẹrwa jẹ ẹ-ẹga nya angịlẹ kị họ ọhọbịrị ọtụka bọọ wẹẹ. Adịrahụ iDevidi họ ụya bala ọ-nwụ ọngịnyị, kị ri ịhọbịrị ịtụka-ịtụka. Ma iDevidi yẹda, iJihova tị hịnyọhi họọ. (2 Sam. 12:1-12) Ị jẹ́ Adịrahụ ịManasẹ nya ọlọkwọ ẹ-ẹpwụ nya ọhịhị nyamwụ. Ẹ-ẹpwụ nya iwe-ahụrụ ọwẹ, iJihova jẹ́ hịnyọhi ha ịManasẹ chajị ọ yẹda bwu ịhọbịri nyamwụ. (2 Ego. 33:9-16) Ọ-chụ pwokwita ịwẹ mẹjẹ nyori iJihova kaa mẹ ahyẹẹrwẹrwa jẹ ụka ká ọbaba nya ọọwa á ji. Ọ ka wule angịlịịwẹ eji chajị ị jẹ́ nyori ịwa nyị họ ọhọbịrị, ị tị yẹda bwu ịhọbịrị nyaa ịịwa. w24.05 4 ¶12