Gịnị Ka Baịbụl Kwuru Gbasara Ite Ntecha na Iyi Ọla?
Ihe Baịbụl kwuru
Ọ bụ eziokwu na Baịbụl ekwughị ọtụtụ ihe gbasara ite ntecha, iyi ọla, ma ọ bụ iji ihe ndị ọzọ achọ mma, ma o kwughị na ime ihe ndị a dị njọ. Baịbụl kwuru na ihe Chineke ji kpọrọ ihe abụghị otú mmadụ dị n’elu ahụ́, kama ọ bụ ‘mbọ onye ahụ na-agba ka ọ bụrụ onye obi ruru ala na onye dị nwayọọ.’—1 Pita 3:3, 4.
Baịbụl ekwughị na mmadụ ịchọ mma dị njọ
Ụmụ nwaanyị fere Jehova n’oge ochie chọrọ onwe ha mma. Ribeka, onye Aịzik nwa Ebreham lụrụ, na-agba ọla imi e ji ọlaedo mee, ọla aka e ji ọlaedo mee, nakwa ọla ndị ọzọ dị oké ọnụ nna di ya nyere ya. (Jenesis 24:22, 30, 53) Esta natakwara “ihe ọ ga-eji na-achọ mma” mgbe a na-ele ma ọ̀ ga-abụ nwunye eze na-achị Alaeze Ukwu Peshia. (Esta 2:7, 9, 12) Ọ ga-abụ na ụdị ihe dị iche iche a na-ete n’ihu nakwa n’anya so n’ihe ndị ahụ ọ natara.
E ji ọla mee ihe atụ ndị dị mma na Baịbụl. Dị ka ihe atụ, e ji onye na-enye ezigbo ndụmọdụ tụnyere “ọla ntị e ji ọlaedo rụọ.” (Ilu 25:12) Chineke jikwa otú o si meso ndị Izrel ihe tụnyere di ji ọla aka, ihe olu, na ọla ntị chọọ nwaanyị ọ na-alụ ọhụrụ mma. Otú a o si chọọ ha mma mere ka ha “bụrụ asampete.”—Ezikiel 16:11-13.
Ihe ndị na-abụghị eziokwu gbasara ite ntecha na iyi ọla
Ụgha: Na 1 Pita 3:3, Baịbụl akwadoghị “ịkpa isi na iyi ihe ndị e ji ọlaedo mee.”
Eziokwu: Ihe e kwuru n’amaokwu ndị ọzọ dị na 1 Pita isi 3 gosiri na ihe Baịbụl na-ekwu ebe ahụ bụ na mmadụ ịchọ obi ya mma bara uru karịa ịchọ mma elu ahụ́. (1 Pita 3:3-6) E kwukwara ihe yiri ihe a n’ebe ndị ọzọ na Baịbụl.—1 Samuel 16:7; Ilu 11:22; 31:30; 1 Timoti 2:9, 10.
Ụgha: Ite ntecha dị njọ ebe ọ bụ na Jezibel obi tara mmiri, bụ́ nwunye eze, tere “uri anya.”—2 Ndị Eze 9:30.
Eziokwu: Ihe mere e ji gbuo Jezibel bụ maka na ọ gbara afa, gbuokwa ndị mmadụ, ọ bụghị maka na ọ na-ete ntecha.—2 Ndị Eze 9:7, 22, 36, 37.