Olee Otú Chineke Chọrọ Ka Ihe Dịrị Anyị?

IHE a na-akọkarị na tiivi, redio, na n’akwụkwọ akụkọ bụ gbasara ime mpụ, ịlụ agha, na imekpọ ndị mmadụ ọnụ. O nwekwara ike ịbụ na o nwere ọrịa gị na ya na-alụ ma ọ bụkwanụ na mmadụ nwụnahụrụ gị.

I nwere ike ịna-ajụ onwe gị, sị:

Ọ̀ bụ otú a ka Chineke chọrọ ka ihe dịrị mụ na ndị ezinụlọ m?
Gịnị ga-enyere m aka imeri nsogbu m?
Ò nwere mgbe udo ga-adị n’ụwa a?

Baịbụl zara ajụjụ a niile. Ọ zakwara ha otú ha ga-edo gị anya.

BAỊBỤL NA-AKỤZIRI ANYỊ NA CHINEKE GA-EWEPỤRỤ ANYỊ AHỤHỤ NIILE DỊ N’ỤWA A.

Ụmụ mmadụ agaghịzi na-aka nká ma ọ bụ na-anwụ anwụ. A gaghịzi enwe ihe mgbu.—Mkpughe 21:4
“Onye ngwọrọ ga-awụli elu dị ka oké ele.”—Aịzaya 35:6
“A ga-emeghe anya ndị ìsì.”—Aịzaya 35:5
A ga-akpọlite ndị nwụrụ anwụ.—Jọn 5:28, 29
O nweghịzi onye ga na-arịa ọrịa.—Aịzaya 33:24
Onye ọ bụla ga na-eriju afọ.—Abụ Ọma 72:16

IHE BAỊBỤL NA-AKỤZI GA-ABARA GỊ URU

Ebe Onyeàmà Jehova na-amụrụ otu nwoke Baịbụl

Ụfọdụ ndị nwere ike ịna-eche na ihe ndị ahụ e kwuru na peeji nke anọ na nke ise n’akwụkwọ a enweghị ike ime eme. Ma, Chineke kwuru na ya ga-eme ha n’oge na-adịghị anya. Baịbụl kwukwara otú ọ ga-esi eme ha.

Ma, ọ bụghị naanị ihe ndị ahụ Chineke ga-emere anyị ka Baịbụl kwuru. O kwukwara ihe anyị ga-eme ka anyị nwee ike ịna-enwe ezigbo obi ụtọ ugbu a. Chegodị gbasara ihe ndị na-echu gị ụra. O nwere ike ịbụ ụkọ ego, nsogbu ezinụlọ, ọrịa, ma ọ bụkwanụ na mmadụ nwụnahụrụ gị. Baịbụl nwere ike inyere gị aka imeri nsogbu ndị ahụ. Ihe ị ga-amụta na ya ga-akasikwa gị obi n’ihi na ọ ga-enyere gị aka ịmata azịza ajụjụ ndị a:

Gịnị mere anyị ji ata ahụhụ?
Olee otú m ga-esi merie nsogbu ndị bịaara m?
Olee otú anyị ga-esi na-enwe obi ụtọ n’ezinụlọ anyị?
Gịnị na-eme mmadụ ma ọ nwụọ?
Ò nwere mgbe anyị ga-ahụ ndị nke anyị nwụrụ anwụ ọzọ?
Olee ihe mere obi ga-eji sie anyị ike na Chineke ga-emere anyị ihe niile o kwere anyị ná nkwa?

Ọgụgụ ị na-agụ akwụkwọ a gosiri na ị chọrọ ịmata ihe Baịbụl na-akụzi. Akwụkwọ a ga-enyere gị aka. Paragraf ndị dị na ya nwere ajụjụ ndị e ji amụ ha. Ajụjụ ndị ahụ ga-enyere gị aka ịghọta Baịbụl nke ọma. Ọtụtụ ndị na-enwe mmasị ka ha na Ndịàmà Jehova na-amụ Baịbụl. Obi sikwara anyị ike na gịnwa ga-enwe mmasị ka anyị na gị mụwa Baịbụl. Ekpere anyị bụ ka Chineke nyere gị aka ịghọta ihe Baịbụl na-akụzi.

OTÚ E SI HAZIE BAỊBỤL

E NWERE akwụkwọ iri isii na isii dị na Baịbụl. Nke ọ bụla n’ime ha nwere isi na amaokwu. Otú a e si hazie ya na-eme ka ọ dịrị mmadụ mfe ịchọta amaokwu Baịbụl ọ na-achọ. Mgbe ọ bụla akwụkwọ a kwuru ebe a ga-agụ na Baịbụl, nọmba nke mbụ bụ isi akwụkwọ ahụ, nke abụọ abụrụ amaokwu ya. Dị ka ihe atụ, “2 Timoti 3:16,” pụtara akwụkwọ ozi nke abụọ e degaara Timoti, isi atọ, amaokwu nke iri na isii.

Ọ bụrụ na ị gbaa mbọ na-agụ amaokwu Baịbụl ndị e kwuru ka a gụọ n’akwụkwọ a, ọ ga-eme ka ịsapeta Baịbụl na-adịrị gị mfe. I nwekwara ike ibido gụwa Baịbụl kwa ụbọchị. Ọ bụrụ na ị na-agụ ihe dị ka isi akwụkwọ Baịbụl atọ ma ọ bụ ise kwa ụbọchị, i nwere ike ịgụcha Baịbụl n’otu afọ.