Pemesai Reti Dibaptisa

1. Baka ni kitai nemu pengawa baptisa siti ajar Bup Kudus ti amat penting?

KITAI amat gaga ati lebuh meda orang baru dibaptisa. Orang Kristian ti keterubah ke meda mayuh orang dibaptisa ba Pentikos 33 M., mega bisi asai ati ti sama. Maya nya, Rasul Peter meri siti cheramah ke nerangka kebuah nya penting dibaptisa. (SKR. 2:​38, 40, 41) Udah nya, Rasul Paul nulis, “pekara asas ke bekaul enggau Kristus” mega nyengkaum ajar “pasal baptisa.” (Heb. 6:​1, 2) Taja pan pekara pasal pengawa baptisa engka dikumbai pekara asas, tang kitai patut meretika nya enggau manah. Nama kebuah?

2. Nama kebuah kitai patut mereti enggau manah pasal pengawa baptisa?

² Enti sesiku orang deka ngembuan rumah ti teguh, iya patut nirika rumah nya ba asas ti tegap. Baka nya mega, enti sesiku orang deka ngembuan pengarap ti tegap, iya patut nentuka diri faham pemendar Bup Kudus, ke nyadi asas pengarap iya. Tu nyengkaum nemu pemendar pasal pengawa baptisa. Nyadi, enda ngira kitai udah lama dibaptisa tauka bedau dibaptisa, semua kitai patut nemu kebuah pengawa baptisa nya amat penting. Dalam artikel tu, kitai deka berandauka tanya tu: Nama reti pengawa baptisa? Nama utai ti disengkaum ba pengawa baptisa? Nama kebuah kitai dibaptisa dalam nama Apai, Anak, enggau kuasa kudus Petara?

NAMA RETI PENGAWA BAPTISA?

3. Pengawa baptisa ngambarka nama?

³ Lebuh nuan dibaptisa, nuan nunjuk ngagai orang mayuh nuan udah nerima pemendar pasal Petara Jehovah enggau Jesus Kristus, nesal ati ke dosa nuan, sereta ngubah gaya pengidup nuan ngambika ulih nyembah Jehovah. Pengawa baptisa mega nunjukka nuan pechaya nuan semina ulih diselamatka nengah Jesus, lalu nuan mega udah besemaya ngagai Jehovah dalam sampi pasal pengingin nuan ti deka ngereja peneka Iya enggau gerempung Iya. Pengudah nuan ngaga semaya nya tauka nyerahka pengidup nuan ngagai Jehovah lalu dibaptisa, nuan berengkah bejalai ba jalai ti nuju ngagai pengidup ti meruan belama iya.

4. Nama reti iya lebuh sesiku orang diselam dalam ai lebuh dibaptisa? (Peda mega gambar.)

⁴ Lebuh nuan dibaptisa, nuan diselamka dalam ai, lalu udah nya nuan pansut ari ai nya.a Kekadang tu disemaka baka nuan udah dikuburka lalu udah nya diangkatka idup baru. (Banding Kolosi 2:12.) Nama kebuah tu sempama ti manah? Lebuh nuan diselamka dalam ai, nuan nunjukka diri udah badu nitihka jalai pengidup nuan suba. Lebuh nuan pansut ari ai, tu nunjukka nuan ngepunka jalai pengidup ti baru ke ngenuluka peneka Petara.

5. Baka ni pengawa nyediaka diri deka dibaptisa ulih disemaka baka pengawa Noah ke ngaga bandung? (1 Peter 3:​18-21)

⁵ Bacha 1 Peter 3:​18-21. Kitai ulih nyemaka pengawa nuan ke nyediaka diri deka dibaptisa enggau pengawa ke dikereja Noah kena ngaga bandung. Enti nuan baru berengkah belajar pasal Jehovah, nuan engka ngumbai pengawa ke patut dikereja nuan ngambika ulih dibaptisa nya amat besai sereta tusah. Tang kati nuan patut ngereja semua pengawa nya? Au. Nama kebuah kitai madah munyi nya? Perundingka pasal Noah. Petara meri iring ti silik ngagai Noah pasal chara deka ngaga bandung, lalu Noah patut nitihka iring nya enggau nyemetak ngambika ulih selamat lebuh Bah Besai datai. Noah ulih ngaga bandung nya laban iya arapka Jehovah, ngasika Jehovah, sereta bulih sukung ari Jehovah. Baka Noah, nuan mega ulih mujur “ngereja semua utai ke diasuh Petara.”—P-kal. 6:22.

6. Nama reti utai ku Peter lebuh iya madahka: ‘Baptisa nyelamatka kita’?

⁶ Ba ayat 21, Rasul Peter madahka: ‘Baptisa nyelamatka kita.’ Tang tu ukai reti iya kitai semina patut dibaptisa aja ngambika dosa kitai diampun. Semina genselan tebus Jesus aja ulih ngasuh kitai nyadi tuchi ari semua dosa. (1 Jhn. 1:7) Taja pia, pengawa baptisa nya amat penting laban Jehovah ke ngasuh kitai dibaptisa. Lalu lebuh kitai dibaptisa, kitai “minta ati ti beresi ari Petara.” Lalu Jehovah gaga ati ngampunka dosa kitai nengah tebus Jesus. Nyadi baptisa nyelamatka kitai laban iya muka jalai ngambika kitai ulih idup belama iya.

NAMA UTAI TI DISENGKAUM BA PENGAWA BAPTISA?

7. Baka ni pengawa baptisa patut dipejalaika?

⁷ Bup Kudus madahka, lebuh sesiku orang dibaptisa, iya patut diselam dalam ai. Tang Bup Kudus enda entu madahka penerang bukai pasal baka ni pengawa baptisa patut dipejalaika. Taja pia, Bup Kudus bisi meri sekeda iring pasal sekeda ulah ti sesuai maya pengawa baptisa dipejalaika. Ambika chunto, prinsip Bup Kudus nulung chalun baptisa nemu gari ke patut dikena sereta mega nulung sida ke meda pengawa nya nemu ulah ke patut diayanka maya pengawa baptisa dipejalaika. (1 Kor. 14:40; 1 Tim. 2:9) Kemayaharitu, kesuah iya siku tuai gempuru deka ngereja pengawa maptisa nya. Kitai nyeliahka diri ari meri perhatian ti spesial ngagai tuai gempuru nya. (1 Kor. 1:​14, 15) Pia mega, pengawa baptisa nya agi sah, enda ngira orang ke meda pengawa nya mimit tauka mayuh.—SKR. 8:36.

8. Nama dua iti utai ke ditanya ngagai chalun baptisa? Lalu nama kebuah chalun baptisa patut nyaut tanya nya ba mua orang mayuh? (Surat Kereja Rasul 2:​38-42) (Peda mega gambar.)

⁸ Sebedau sesiku orang dibaptisa, iya ditanya dua iti tanya ba mua orang mayuh. Tanya keterubah nya: “Kati nuan udah nesal ati ke dosa nuan, nyerahka diri ngagai Jehovah, sereta nerima chara Iya nyelamatka kitai nengah Jesus Kristus?” Tanya tu betumpu ba utai ti udah dikereja sesiku orang ngambika ulih dibaptisa. Peter mega nyebut utai ti sama ba Pentikos lebuh iya ngasuh orang nesal ati lalu dibaptisa. Tanya kedua nya: “Kati nuan nemu pengawa nuan ke dibaptisa nunjukka nuan nyadi siku ari Saksi-Saksi Jehovah, lalu begulai enggau gerempung Jehovah?” Tanya tu betumpu ba utai ti deka dikereja chalun baptisa nya, iya nya iya besemaya deka nitihka iring ari gerempung Jehovah, sereta nyembah Jehovah begulai enggau bala menyadi Kristian. Tu mega sama enggau utai ti dikereja sida ba Pentikos pengudah sida dibaptisa. (Bacha Surat Kereja Rasul 2:​38-42.) Sida ke ulih nyaut “Ya” ngagai dua iti tanya tu ulih dibaptisa. Tang nama kebuah sida patut nyaut tanya nya ba mua orang mayuh? Bup Kudus madahka, kitai patut ‘nusui pesan nya ngagai orang mayuh, lalu nya ngasuh kitai diselamatka.’ (Rom. 10:​9, 10) Kitai “nusui pesan nya ngagai orang mayuh,” ukai aja lebuh kitai nginjil ngagai orang bukai, tang kelebih agi ba hari kitai dibaptisa. Lalu pengawa nya amat penting ngambika kitai ulih diselamatka. Nya kebuah dua iti tanya nya ditanya ngagai chalun baptisa ba mua orang mayuh.

9. Nama utai ti patut digaga semua orang ngambika ulih ngembuan kaul ti manah enggau Petara?

⁹ Indah sebedau nuan belajarka pemendar, nuan engka bisi pengidup ti manah sereta nadai kala ngereja dosa ti besai. Tauka nuan engka dibesaika apai indai ke Saksi, ke nulung nuan rinduka Jehovah. Kati nuan agi patut nesal ati sereta dibaptisa ngambika ulih ngembuan kaul ti manah enggau Petara? Au, nuan patut. Semua kitai mensia ti bedosa. Ketegal nya, kitai enda ulih nyadi kaban Petara. (Mas. 51:5) Tang lebuh kitai belajar mayuh agi pasal Jehovah, kitai mutuska deka ngereja utai ti dikedekaka Iya, ukai utai ti dikedekaka diri empu. Udah nya, kitai nesal ati ke penyalah ti udah dikereja kitai, badu agi ngereja utai ti enda dikerinduka Jehovah, lalu berengkah idup nitihka jalai ti dikerinduka Iya. Udah nya, baru meh kitai ulih dibaptisa.—SKR. 3:19.

10. Nama patut digaga nuan enti nuan kala dibaptisa ba jalai pengarap bukai?

¹⁰ Enti nuan kala dibaptisa ba jalai pengarap bukai, nuan agi patut dibaptisa nyadi siku ari Saksi-Saksi Jehovah. Nama kebuah? Laban suba nuan enda entu faham pemendar pasal Petara Jehovah enggau Jesus. Lalu, indah enti nuan udah nyerahka diri ngagai Petara dalam sampi, semaya nuan nya ukai bepelasarka penemu ti betul pasal peneka Iya. Ambika chunto, Rasul Paul betemu enggau sekeda lelaki ba Epesus. Sida dibaptisa taja pan enda entu faham pemendar pasal Jesus. Nya alai, Paul ngatur ngambika sida ulih dibaptisa baru.b (SKR. 19:​1-5) Baka nya mega, pemaptisa sesiku orang semina sah enti orang nya dibaptisa pengudah iya nemu utai ti bendar pasal peneka Petara.

“DALAM NAMA APAI, ANAK, ENGGAU KUASA KUDUS PETARA”

11. Nama reti dibaptisa “dalam nama Apai, Anak, enggau kuasa kudus Petara”? (Matthew 28:​18-20)

¹¹ Jesus madahka, sida ke baru deka nitihka iya patut dibaptisa “dalam nama Apai, Anak, enggau kuasa kudus Petara.” (Bacha Matthew 28:​18-20.) Nama reti utai ku iya? Dalam Bup Kudus, leka jaku “nama” kesuah iya merujuk ngagai reputasi sesiku orang. Leka jaku nya mega ulih merujuk ngagai penuduk sereta kuasa ke dikembuan sesiku orang. Nyadi, lebuh kitai dibaptisa dalam nama Jehovah enggau Jesus, tu reti iya kitai nemu seduai iya bisi hak enggau kuasa kena madahka utai ti patut dikereja kitai. Lalu, lebuh kitai dibaptisa dalam nama kuasa kudus Petara, tu reti iya kitai nitihka iring kuasa kudus nya. Aram kitai beratika enggau silik agi chara kitai ulih ngereja nya.

12. Nama reti dibaptisa dalam nama Apai? (Pemandang 4:11) (Peda mega gambar.)

¹² Dalam nama Apai. Tu reti iya kitai yakin Jehovah nya Apai kitai ke ba serega, ke udah meri kitai pengidup. Iya Petara ti pemadu bekuasa, ke udah ngaga semua utai. (Bacha Pemandang 4:11.) Kitai nemu Iya ningaka sampi, lalu kitai mega ngena nama Iya lebuh besampi sereta lebuh kitai madah ngagai orang bukai pasal Iya. (Mas. 65:2) Tang, bisi siti agi utai ke mesti dikeandalka kitai. Sida ke ningaka Peter ba Pentikos udah nemu pasal Jehovah. Tang sida patut faham Jehovah semina meri pengidup ti meruan belama iya nengah Jesus Kristus.—Rom. 5:8.

13. Nama reti dibaptisa dalam nama Anak? (Peda mega gambar.)

¹³ Dalam nama Anak. Tu reti iya kitai yakin Jesus nya Anak Petara. Kitai mega yakin Jesus aja “jalai” ke patut ditengah kitai ngambika ulih ngembuan kaul ti manah enggau Jehovah. (Jhn. 14:6) Kitai mega pechaya Jesus nya Penebus kitai, ke udah mati ke kitai ngambika kitai ulih ngembuan pengidup. Nya kebuah kitai deka neladan iya sepemanjai pengidup kitai, ukai semina ba hari kitai dibaptisa. (1 Jhn. 2:6) Baka Jesus, kitai enda nejuka sebarang utai nagang kitai ari nginjil. (Luk. 4:43) Kitai mega sanggup diperinsa ketegal nitih Jesus sereta tetap ati nyembah Petara. (2 Tim. 3:12) Kitai mega bebasaka Jesus ke nyadi “kepala raban gempuru.” Nya alai, kitai ngasika iring ari sida ke udah diasuh iya ngiring sereta nyaga bala nembiak iya.—Eps. 4:​8, 11, 12; 5:23.

14. (a) Nama reti dibaptisa dalam nama kuasa kudus Petara? (Peda mega gambar.) (b) Nama pemaptisa bukai ke sida ti dipilih ke serega? (Peda kutak “Pemaptisa ke Sida ti Dipilih ke Serega.”)

¹⁴ Dalam nama kuasa kudus Petara. Tu reti iya kitai nerima pemendar pasal kuasa kudus Petara. Kuasa kudus nya ukai orang tauka sebagi ari Triniti, tang nya kuasa Petara. Kitai nemu kuasa kudus ngiring bala nabi enggau bala penulis Bup Kudus. Nyadi, kitai macha Bup Kudus ninting hari sereta nitihka ajar nya. (2 Pet. 1:​20, 21) Lalu kitai mega nyeliah ari ngereja dosa ti besai, laban tu ulih nagang kitai enggau raban gempuru Jehovah ari nerima kuasa kudus Petara.—Eps. 4:30.

15. Nama utai ti patut keran dikereja kitai?

¹⁵ Enti nuan udah dibaptisa, terus meh ngingatka diri empu pasal kebuah pengawa baptisa nya amat penting,c sereta terus meh ngamatka semaya ke udah digaga nuan ngagai Jehovah lebuh nuan nyerahka diri ngagai Iya sereta dibaptisa. Tang baka ni enti nuan bedau agi dibaptisa? Kati bisi utai ke nagang nuan? Artikel ke nangkanka tu deka berandauka utai ti ulih dikereja nuan ngambika ulih dibaptisa.