Baka Ni Kitai Ulih Nulung Kaban Belayan Kitai ke Enda Arap?

1-2. Nama sekeda utai ke engka udah ngachau kaul kitai enggau kaban belayan kitai ke enda arap?

JESUS madah ngagai siku lelaki ke deka nyadi murid iya: “Pulai ke rumah ngagai kaban belayan nuan, lalu padahka ngagai sida semua utai ti udah dikereja Jehovah ke nuan.” (Mrk. 5:19) Jesus nyebut utai nya laban iya nemu, kesuah iya orang deka bekunsika utai ti manah enggau kaban belayana sida.

² Kati nuan agi ingat terubah iya nuan belajarka Bup Kudus? Nuan tentu amat gagit lalu deka bekunsika utai ti dipelajarka nuan enggau kaban belayan nuan! Tang sida engka enda rindu nuan belajar enggau Saksi-Saksi Jehovah. Tauka engka chara nuan bekunsika pemendar enggau sida ngasuh sida ringat. Enti utai tu nyadi ba nuan, baka ni nuan ulih ngemanahka baru kaul nuan enggau sida tang ba maya ti sama mengkang tetap ati ngagai Jehovah?

3. Nama deka dikerandauka kitai dalam artikel tu?

³ Dalam artikel tu, kitai deka berandauka: (1) Baka ni pengasih ulih nulung kitai ngayanka pengibuh ngagai kaban belayan kitai ke enda arap,b taja pan sida enggai belajar pasal Jehovah, (2) nama ulih digaga kitai lebuh kaban belayan kitai nyebut tauka ngereja utai ti enda manah ngagai kitai, (3) baka ni kitai ulih nulung kaban belayan kitai enti kitai sabar sereta ngembuan runding ti positif, enggau (4) baka ni kitai ulih ngayanka diri rinduka sida.

AWAKKA PENGASIH MERANSANG NUAN NULUNG SIDA

4. Nama reaksi Jesus lebuh orang enggai nerima pesan ke ditusui iya?

⁴ Taja pan orang enggai nerima pesan ke ditusui Jesus, tang iya enda putus asa enggau sida. Jesus nyemaka diri enggau siku pekereja ba kebun ke bebendar berusaha nulung siti pun kayu ara mansutka buah. (Luk. 13:​6-9) Lebuh Jesus meri sempama nya, iya udah bebendar nulung orang Judah arapka iya sereta nyadi murid iya. Iya ngereja tu pengelama lebih ari tiga taun. Nama kebuah Jesus enda ngetu nulung sida? Laban Jesus kasihka sida, lalu nya nulung iya sabar enggau sida.

5. Nama kebuah Jesus kasihka orang Judah?

⁵ Jesus kasihka orang Judah laban bala tuai pengarap enda nulung sida nemu pemendar pasal Jehovah. Jesus meda sida “baka bedus ti nadai orang ngibun.” (Mrk. 6:34) Enda lama sebedau Jesus mati, iya nyabak lebuh iya meda nengeri Jerusalem. Iya nemu mayuh ari orang Judah deka mati laban sida enda arapka iya enggau Jehovah. (Luk. 19:​41-44) Baka Jesus, lebuh kitai berundingka kebuah kaban belayan kitai patut ningaka Berita Manah, nya deka meransang kitai nulung sida.

6. Nama kebuah kitai patut sabar enggau kaban belayan kitai ke enda arap? (Galatia 6:9)

⁶ Bacha Galatia 6:9. Taja pan kaban belayan kitai enggai belajar pasal Jehovah diatu, tang kitai patut sabar enggau sida lalu enda ngetu “ngereja utai ti manah.” Kitai nemu orang begunaka awak ngubah utai ti dipechaya sida sereta arapka Jehovah. Suba, nuan pan engka baka sida ke nadai harapan sereta “enda ngelala Petara.” (Eps. 2:12) Tang bisi orang sabar enggau nuan sereta nulung nuan. Nyadi, enti nuan sabar enggau kaban belayan nuan, nuan deka bisi peluang nulung sida belajar mayuh agi pasal Jehovah.

LEBUH KABAN BELAYAN NYEBUT TAUKA NGEREJA UTAI TI ENDA MANAH

7. Nama engka kebuah bala menyadi Jesus enda pechaya iya Messiah?

⁷ Bala menyadi Jesus tentu bisi ninga pasal utai ti luar biasa ke dikereja Jesus ba Galili. (Luk. 4:​14, 22-24) Terubah iya, sida enda pechaya iya Messiah. (Jhn. 7:5) Nama kebuah? Bup Kudus nadai nyebut kebuah iya. Tang Bup Kudus bisi nerangka kebuah sekeda orang Judah enggai nitihka Jesus. Sekeda takut sida deka diperinsa enti sida arapka Jesus. (Jhn. 9:​18-22) Ke bukai ngelala Jesus kenyau ari iya agi mit, nyadi sida tusah deka pechaya orang biasa baka Jesus ulih nyadi Messiah. (Mrk. 6:​1-4) Bala menyadi Jesus mega engka bisi runding ti sama baka sida. Kati runding ke baka tu mega engka ulih ngachau kaban belayan kitai?

8. Nama kebuah kaban belayan kitai engka nyebut tauka ngereja utai ti enda manah ngagai kitai?

⁸ Perundingka kebuah sida nyebut tauka ngereja utai ti enda manah nya. Bala menyadi Jesus engka entara kaban belayan ke madah Jesus “nyau udah gila.” (Mrk. 3:21) Nama kebuah bala menyadi Jesus nyebut utai ti enda manah nya? Bup Kudus madahka, Jesus amat kisuk nginjil sereta ngeraika orang nyentukka kekadang iya enda sempat makai. (Mrk. 3:20) Nyadi, bala menyadi Jesus engka ngumbai Jesus enda seimbang. Kaban belayan kitai mega engka bisi runding ti sama lalu ngumbai kitai ngena kelalu mayuh awak ba sembah ngagai Jehovah. Enti sida bisi runding ke baka nya, kitai ulih nunjukka diri seimbang ari utai ti disebut sereta dikereja kitai.

9. Nama ulih nulung kaban belayan kitai ngubah runding sida pasal Saksi-Saksi Jehovah? (1 Peter 3:​1, 2) (Peda mega gambar.)

⁹ Terus ngayanka pemanah ati sereta nemu berunding. Lebuh kitai nyebut tauka ngereja utai ti manah ngagai kaban belayan kitai, sida engka ngubah runding sida pasal Saksi-Saksi Jehovah. (Bacha 1 Peter 3:​1, 2.) Ambika chunto, siku menyadi indu engka bisi laki ke enda arap. Laki iya engka berasai sunyi tauka ringat lebuh bini iya pansut nginjil tauka ngagai gempuru. Ketegal menyadi indu nya enggai laki iya berasai baka nya, iya ngaga sekeda ubah ba jadual rohani iya ngambika ulih ngena mayuh agi awak begulai enggau laki iya. Ambika chunto, iya engka pansut nginjil lebuh laki iya benung kisuk tauka nadai ba rumah. Lebuh bini nemu berunding sereta sedia deka ngaga ubah, iya engka ulih nulung laki iya ngembuan runding ti manah pasal Saksi-Saksi Jehovah.

10. Baka ni kitai ulih neladan Jesus lebuh orang nyebut utai ti enda manah pasal kitai?

¹⁰ Nuan enda ibuh nyaut tiap iti utai ti enda manah ke dipadah orang. Lebuh orang nyebut Jesus bam sereta ngirup kelalu mayuh wain, Jesus enda ringat tauka nguji deka ngetanka diri empu. Tang iya meransang orang meda ari utai ti digaga iya kena nentuka jaku ke dipadah nya amat tauka enda. (Mat. 11:19) Nambahka nya, ari teladan Jesus, iya nunjukka diri bisi runding ti seimbang. (Banding John 2:​2, 6-10.) Baka Jesus, lebuh orang nyebut utai ti enda manah pasal kitai, kitai enda ibuh betimbal jaku enggau sida. Tang ari ulah kitai, kitai ulih nunjukka kitai bisi pengidup ti seimbang sereta ngagaka ati. Lalu lebuh kaban belayan kitai meda utai nya, sida engka sedar utai ti enda manah ke disebut pasal kitai nya bula magang.

SABAR SERETA NGEMBUAN RUNDING TI POSITIF

11. Baka ni Jesus ngelayan bala menyadi iya ke enda arap?

¹¹ Bup Kudus madahka, Jesus mengkang sabar enggau bala menyadi iya ke enda arap. Ambika chunto, sida bisi ba Kana lebuh Jesus terubah kali ngereja utai ti luar biasa. (Jhn. 2:​11, 12) Taja pan sida udah meda Jesus ngereja utai ti luar biasa, tang sida agi enda pechaya Jesus nya Messiah. Taja pia, Jesus agi ibuhka sida. Kira-kira tiga taun pengudah nya, Bup Kudus madahka, Jesus bejaku enggau nelap ngagai bala menyadi iya.—Jhn. 7:​5-8.

12. Nama ulih nulung kitai mengkang arap kaban belayan kitai engka deka nyembah Jehovah dudi hari?

¹² Kitai udah belajar mayuh pasal pengasih Jehovah. Lebuh pengarap ti pelesu dirusakka, kaban belayan kitai engka ingat baru utai ti dipadah kitai pasal pekara tu.c (Pem. 17:16) Sida engka berengkah nyembah Jehovah begulai enggau kitai, indah pengudah Penusah ti Besai berengkah! Nya alai, tu ulih nulung kitai mengkang arap engka kaban belayan kitai deka nyembah Jehovah dudi hari. Lalu enti sida napi penusah diatu, kitai ulih enggau naka ulih nulung sida. Lebuh sida sedar kitai amat sayauka sida, ati sida engka tebuka deka belajar pasal pemendar.

AYANKA DIRI RINDUKA SIDA

13. Taja pan kitai amat kisuk ba pengawa ke Jehovah, tang nama utai ke patut diseliahka kitai?

¹³ Taja pan kitai amat kisuk ba pengawa ke Jehovah, tang kitai enggai kaban belayan ngumbai kitai nadai hari begulai enggau sida tauka kitai enda agi sayauka sida. (Mat. 7:12) Nyadi baka ni kitai ulih nunjukka kitai agi ibuhka sida? Peratika sekeda chara tu.

14-15. Nama siti chara kitai ulih ngayanka pengerindu ngagai kaban belayan kitai ti enda arap? Beri siti chunto.

¹⁴ Suah berandau enggau sida sereta ngayanka pengerindu ngagai sida. Siti chara kitai ulih ngayanka pengerindu ngagai kaban belayan kitai, iya nya suah berandau enggau sida. Ambika chunto, kitai ulih nganjung mesej tauka gambar pasal utai ti ngagaka ati ke udah nyadi ba pengidup kitai baru-baru tu. Kitai ulih meri sida hadiah tauka nulis kad ngagai sida. Tu nunjukka kitai ibuhka sida sereta deka ngasuh sida berasai gaga ati. Lebuh kitai ngereja semua utai ke ulih kitai, sida deka sedar kitai agi sayauka sida.

¹⁵ Peratika teladan Anna, siku menyadi indu ba Armenia. Sida sebilik suah begulai, kelebih agi lebuh ngintu hari pengada enggau pengerami bukai. Lebuh Anna nyadi siku ari Saksi Jehovah, kaban belayan iya irau iya deka badu agi begulai enggau sida. Sida mega irau enti pemutus iya deka ngasuh pengidup iya nyadi tusah agi. Nama digaga Anna kena mutarka pengirau kaban belayan iya? Ku Anna: “Lebuh aku ngabas kaban belayan aku, aku madah ngagai sida sekeda utai ke benung nyadi ba pengidup aku sereta sekeda utai ke benung digaga aku. Aku mega mai sida ngagai rumah aku lalu betemu enggau sekeda ari kaban aku. Ketegal nya, mayuh ari kaban belayan aku ngelala bala kaban aku sereta rindu berandau enggau sida. Mayuh ari kaban belayan aku madah sida ulih meda aku amat gaga ati, lalu sida enda agi irau pasal aku.”

16. Baka ni Jesus nunjukka iya ibuhka menyadi iya James? (Peda mega nota kaki.)

¹⁶ Tunjukka nuan ibuhka utai ti nyadi ba pengidup sida. Pengudah Jesus diangkatka idup baru, iya nunjukka diri ibuhka menyadi iya James lebuh iya mandangka diri ngagai James. (1 Kor. 15:7) James tentu berasai amat gaga ati lebuh iya sedar Jesus agi ibuhka iya. Engka tu meh maya iya James amat yakin Jesus nya Messiah. Pengudah Jesus betemu enggau James, James engka nulung kaban belayan iya ke bukai faham Jesus nya Messiah.d—SKR. 1:14.

17. Nama ulih dipelajarka kitai ari Rome 12:15? (Peda mega gambar.)

¹⁷ Bacha Rome 12:15. Enti kitai ngayanka pengibuh ngagai kaban belayan kitai, enda ngira ba maya ti senang tauka ba maya ti tusah, nya engka ulih nulung sida ngembuan runding ti manah pasal kitai.e Ambika chunto, lebuh bisi kaban belayan ke baru beranak, kitai ulih meri hadiah kena nunjukka kitai gaga ati ke sida. Tauka lebuh bisi orang ti dikesayauka sida udah nadai, kitai ulih ngaum sida. Kitai ulih nganjung kad tauka ngiga chara bukai kena nulung sida. Lalu lebuh sida napi penusah bukai, kitai ulih suah kol, mesej, tauka ngabas sida.

18. Baka ni kitai ulih neladan Andrew?

¹⁸ Bai sida bekelala enggau bala menyadi bukai. Lebuh Andrew nemu Jesus nya Messiah, iya jejampat madah ngagai menyadi iya Peter, lalu ngasuh Peter datai betemu enggau Jesus. (Jhn. 1:​40-42) Kitai mega ulih ngereja utai ti sama. Ambika chunto, kitai ulih mai siku ari kaban belayan kitai datai ngagai gempuru tauka mai iya makai begulai enggau bala menyadi Kristian. Lebuh iya betemu enggau bala menyadi kitai, iya engka sedar bala menyadi kitai mega orang biasa aja.

19. Taja pan kaban belayan enda entu faham utai ti dipechaya kitai, tang baka ni kitai patut ngelayan sida? (1 Peter 3:15)

¹⁹ Bacha 1 Peter 3:15. Kaban belayan kitai engka enda seruran faham kebuah kitai enda ngereja sekeda utai. Tang sida deka seruran ingat lebuh kitai ngayanka pemanah ati sereta basa ngagai sida. Taja pan kitai enda agi enggau sida ngintu pengerami tauka ngereja sekeda adat ke bukai, tang sida tentu gaga ati lebuh kitai meri awak begulai enggau sida ba maya bukai. Ambika chunto, kitai ulih ngabas sida, makai begulai, sereta meri hadiah ba maya bukai.

ANANG PUTUS ASA

20. Nama kebuah teladan James ulih meransang kitai?

²⁰ James nadai nitih Jesus lebuh Jesus nginjil ba dunya. Taja pia, nyau kelama iya nyadi siku ari murid Jesus. Iya mega belematika mayuh utai ke udah diajar Jesus ba dunya. (Gal. 1:​18, 19; 2:9) Ambika chunto, iya nulis siti surat ngagai bala menyadi Kristian. Dalam surat nya, iya madahka sekeda utai ti nyauka sama enggau utai ti diajar Jesus ba Jaku Ajar ba Atas Bukit.f

21. Nama kebuah kitai enda patut putus asa enggau kaban belayan kitai ke bedau arap?

²¹ Taja pan kitai udah bebendar berusaha, tang kaban belayan kitai engka agi enda ngelayan kitai enggau manah tauka enggai belajar pasal Jehovah. Tang nama kebuah kitai enda patut putus asa nulung sida? Laban tiap kali kitai ngayanka pemanah ngagai sida, kitai benung neladan Jehovah, Petara ti pengasih, enggau Anak Iya, Jesus. (Luk. 6:​33, 36) Enti kitai enda ngetu ngayanka pengerindu ngagai sida, nyau kelama sida engka ngubah runding sida pasal kitai. Lalu kitai engka enda sedar, sida engka agi ingatka utai ti dipadah kitai pasal Jehovah enggau utai ti dipechaya kitai. Enti kitai enda ngetu nulung kaban belayan kitai sereta ngayanka pemanah ngagai sida, sida engka mutuska deka nyembah Jehovah begulai enggau kitai. Lalu nya tentu deka ngasuh kitai amat gaga ati!