Wat Matthew Wen Write

28 Afta da Sabbath,* on da firs day of da week* jus befoa da sun come up, Mary Magʹda·lene an da odda Mary come fo look da grave.

2 An try look! Had one big earthquake, an Jehovah’s* angel wen come down from heaven an roll da rock away an sit on um. 3 He look jus like lightning, an his clothes wuz white like snow. 4 An da guys guarding da grave wen start fo shake an no could move cuz dey wuz sked of him.

5 But da angel sed to da wahines: “No be sked, I know you stay looking fo Jesus who wen get killed on da pos. 6 He no stay hea, cuz he wen come back alive, jus like he sed. Come look da place wea he wuz lying. 7 Den hurry up an go tell his guys dat he wen come back alive from da dead, an you know wat, he awready goin Galʹi·lee. You goin see him dea. I wen come hea fo tell you dis.”

8 So real fas dey take off from da tomb.* All sked but real happy too, dey run fo tell Jesus guys wat wen happen. 9 Den try look! Jesus meet dem an sed: “Howzit!” Dey go grab his feet an go on dea knees fo show um respeck. 10 Den Jesus sed to dem: “No sked! Go tell my braddahs wat you wen see, so dat dey can go Galʹi·lee fo see me.”

11 Wen da wahines wuz on dea way, some of da guards go inside da town an tell da main pries guys all da tings dat wen happen. 12 Afta da main pries guys an eldas get togedda fo talk about wat dey wuz goin do, dey give da soldiers plenny money* 13 an sed: “Try tell, “His guys had come steal his body night time wen we wuz sleeping.” 14 An if da govna hea about dis, no worry, we can talk to him.”* 15 So dey take da money an did wat dey wuz told. An dis story wen spread to all da Jews down to dis day.

16 Meantime, Jesus 11 guys wen go to da mountain in Galʹi·lee wea Jesus sed he wuz goin meet dem. 17 Wen dey see him, dey go down on dea knees fo show respeck, but some guys no wuz shua if wuz him. 18 Jesus go up to dem an tell: “God wen give me da right fo be in charge ova evryting in heaven an on da earth. 19 So go teach peopo from all ova how fo come followas of me, baptizing da guys dat get respeck fo* da Faddah, an fo da Son, an fo wat God’s powa* can do. 20 Teach dem fo do all da tings I wen tell you fo do. An try look! I goin be wit you guys evryday til da end of dis world.”*