Wat Matthew Wen Write
17 Six days layta, Jesus wen take ony Peter, James, an his braddah John wit him up one real big mountain. 2 Den da way Jesus look wen change in front dem, his face wen shine like da sun, an his clothes wen come white like da light. 3 An try look! Dey wen see Moses an E·liʹjah talking story wit him. 4 Den Peter sed to Jesus: “Lord, we happy we get fo be hea wit you guys! If you like, I goin put up three tents, one fo you, one fo Moses, an one fo E·liʹjah.” 5 Wen Peter wuz talking, one bright cloud cova dem, an try look! One voice come outa da cloud an tell: “Dis my Boy, da one I love, he make me real happy. Lissen to him.” 6 Wen his guys hea dis, dey drop to da groun fo show respeck an come supa sked. 7 Den Jesus go by dem an touch um an tell: “Get up. No need be sked.” 8 Wen dey had look up, nobody wuz dea but Jesus. 9 Wen dey wuz coming down from da mountain, Jesus told um: “No tell nobody wat you wen see til da Son of man* come back alive.”
10 But his guys ask him: “How come da scribes* tell dat E·liʹjah gotta come befoa da Christ?” 11 So he tell dem: “E·liʹjah goin come an make evryting da way suppose to be. 12 But I tell you dis, E·liʹjah wen come awready. An dey neva know wuz him an wen do wateva dey like wit him. Same lidat, dey goin make da Son of man suffa too.” 13 Den his guys wen undastan dat he wuz talking about John da Baptiza.
14 Wen dey go by all da peopo, one guy wen come by him. He go down on his knees an tell: 15 “Lord, show pity fo my boy, cuz he get seizures an he in real bad shape. All da time he fall in da fiyah an inside da watta. 16 I wen bring him to yoa guys but dey no could heal him. 17 Jesus tell: “You guys tinking iz way off an you no moa faith. How long I gotta put up wit you guys? Bring da boy ova hea by me. 18 Den Jesus wen scold da demon, an da demon wen come outa da boy. Right den an dea da boy wen come good. 19 Wen Jesus an his guys wuz by demself dey wen ask him: “How come we no could kick out da demon?” 20 He tell dem: “Az cuz you no moa nuff faith. I tell you dis too, even if you get faith da size of one mustard seed, you goin tell dis mountain, “Go move from hea to ova dea” an goin move, an no moa notting you no can do.” 21* ——
22 Wen dey wuz togedda in Galʹi·lee, Jesus tell dem: “Da Son of man goin get set up an turn ova to da guys dat hate um. 23 An dey goin kill um, an he goin come back alive on da third day.” An dey wuz supa sad fo hea dat.
24 Afta dey wen get to Ca·perʹna·um, da guys dat colleck da tax money go by Peter an tell: “Yoa teacha, he no pay da two drachma* tax o wat?” 25 He tell: “Yeah, he pay um.” But wen Peter go inside da house, Jesus wen talk to him firs an say: “Wat you tink, Simon? Wea da kings get all dea tax money from? From dea kids or odda peopo?” 26 Wen he sed: “From da odda peopo,” Jesus sed to him: “So da kids no need pay tax den. 27 But so dat dey no stumbo, go by da watta an throw out one line. Da firs fish you hook up, open da mout, an you goin see one silva coin.* Take um an pay da tax fo da both of us.”