Ntsuj Rog Hauv Teb Chaws Yus Khees Tsim Kev Tshaib Nqhis

Nyob rau lub 5 Hlis tim 19 xyoo 2022 lub United Nations Security Council (UN lub rooj saib xyuas kev thaj yeeb thoob ntiaj teb) tau nrog 75 tug thawj coj sab laj ua ke. Cov thawj coj ntawd tau hais tias “thoob ntiaj teb, zaub mov twb tsawg zuj zus lawm vim tus kab mob COVID-19 thiab vim huab cua hloov tsis zoo li qub. Tiam sis ntsuj rog hauv teb chaws Yus Khees tseem yuav haj yam tsim kom muaj kev tshaib kev nqhis thoob ntiaj teb.” Tsis ntev tom qab rooj sab laj ntawd, phau ntawv xov xwm hu ua The Economist tau tshaj tawm tias “ntsuj rog no yuav tsim kev tshaib nqhis thoob ntiaj teb.” Phau Vajlugkub twb hais ua ntej lawm tias nyob rau lub caij no yuav muaj kev tshaib kev nqhis, thiab phau Vajlugkub kuj qhia tias yuav ua li cas peb thiaj nyiaj dhau lub caij ntawd.

Phau Vajlugkub hais tias yuav muaj kev tshaib kev nqhis

•  Yexus tau hais tias: “Yuav muaj ib haiv neeg sawv tawm tsam ib haiv neeg thiab ib lub teb chaws sawv tawm tsam ib lub teb chaws. Yuav muaj kev tshaib kev nqhis.”—Mathais 24:7.

•  Phau Tshwmsim hauv phau Vajlugkub piav txog plaub tug txiv nees. Ib tug piv txog kev tsov kev rog. Tus lawv tus ntawd qab piv txog kev tshaib kev nqhis. Lub sij hawm ntawd zaub mov yuav kim heev. Tshwmsim 6:5, 6 hais tias, “Kuv pom ib tug txiv nees dub tawm plaws los. Tus uas caij tus txiv nees dub ntawd txhais tes tuav rawv ib rab teev. Kuv hnov ib lub suab . . . hais tias, ‘Cov neeg uas ua luag zog, yog yuav txhuv mas ib hnub twg ib taig txhuv, yog yuav pias ces ib hnub peb taig pias.’”

Tej uas phau Vajlugkub tau hais txog no tab tom muaj tiav rau lub caij uas phau Vajlugkub muab hu ua “tiam kawg.” (2 Timaute 3:1) Yog xav paub ntxiv txog “tiam kawg” thiab plaub tug txiv nees hauv phau Tshwmsim, mus saib zaj yeeb yaj kiab Txij Xyoo 1914 Los Lub Qab Ntuj No Tsis Zoo Li Qub Lawm thiab mus nyeem zaj “The Four Horsemen—Who Are They?”

Phau Vajlugkub pab tau peb li cas

•  Phau Vajlugkub muaj tej tswv yim uas yuav pab tau peb nyiaj dhau tej kev txom nyem zoo li thaum zaub mov nce nqi los sis thaum muaj kev tshaib kev nqhis. Mus saib zaj “How to Live on Less” seb muaj tej tswv yim twg.

•  Phau Vajlugkub pab tau peb muaj kev vam kev cia siab tias ib hnub twg tej kev txom nyem yuav ploj mus. Phau Vajlugkub cog tseg tias yuav “muaj nplej ntsu nplua mias” hauv lub ntiaj teb no, thiab txhua leej txhua tus yuav noj seem noj so. (Phau Ntawv Nkauj 72:16) Yog koj xav paub ntxiv txog phau Vajlugkub tej lus cog tseg ntawd thiab seb ua li cas koj thiaj ntseeg tau, mus nyeem zaj “Muaj Kev Cia Siab Rau Lub Neej Yav Pem Suab.”