Poob Hauj Lwm—Phau Vajlugkub Tej Hauv Paus Ntsiab Lus Yeej Pab Tau Koj
Thaum ib tug poob hauj lwm yuav ua rau nws thiab nws tsev neeg nyuaj siab ntxhov plawv vim tsis muaj nyiaj los yug nws lub cuab lub yig. Yog koj raug li no, phau Vajlugkub tej hauv paus ntsiab lus nram qab no yeej pab tau koj.
Qhia koj tej kev nyuaj siab rau lwm tus paub.
Phau Vajlugkub qhia tias: “Tus tseem phooj ywg yeej hlub koj txhua lub sij hawm.”—Pajlug 17:17, New World Translation of the Holy Scriptures.
Tom qab koj poob hauj lwm, yuav ua rau koj tu siab, npau taws, thiab tsis pom qab yuav ua zaj twg. Los sis yuav ua rau koj xav tias koj yog ib tug uas ua tsis tsheej dab tsi li. Yog koj qhia koj tej kev nyuaj siab rau koj tsev neeg thiab koj tej phooj ywg ces lawv yuav nplig tau koj. Lawv kuj yuav pab tau koj nrhiav hauj lwm thiab.
Tsis txhob txhawj dhau.
Phau Vajlugkub qhia tias: “Txhob txhawj txog tag kis, rau qhov tag kis tseem yuav muaj lwm yam kev nyuaj siab.”—Mathais 6:34.
Phau Vajlugkub txhawb kom peb ua tib zoo npaj ua ntej. (Pajlug 21:5) Thiab kuj qhia kom tsis txhob muab txhawj dhau txog yav tom ntej. Ntau zaus tej uas peb txhawj txhawj twb tsis muaj tshwm sim. Yog li ntawd, zoo rau peb daws peb tej teeb meem ib hnub rau ib hnub xwb.
Phau Vajlugkub kuj pab tau koj thaum koj muaj kev nyuaj siab. Yog koj xav paub ntxiv, mus nyeem zaj “Yuav Thev Taus Kev Nyuaj Siab Li Cas.”
Paub txuag nyiaj.
Phau Vajlugkub qhia tias: “Kuv paub txog . . . thaum muaj nplua mias thaum tu ncua.”—Filipis 4:12.
Thaum koj lub neej hloov lawm koj yuav tau txuag nyiaj es txhob siv phum lam ntsuav. Zoo rau koj tsis txhob mus qev mus txais xwv koj thiaj tsis tshuav luag nqi.—Pajlug 22:7.
Yog koj xav paub ntxiv seb yuav txuag nyiaj txiag li cas, mus nyeem zaj “How to Live on Less” ua lus Askiv.
Siv koj lub sij hawm kom muaj nuj nqis.
Phau Vajlugkub qhia tias: “Cia li siv tswvyim . . . , thiab siv txhua lub sijhawm kom muaj qabhau.”—Kaulauxais 4:5.
Txawm koj lub sij hawm ua hauj lwm pheej hloov tas zog los koj yuav tau siv koj cov sij hawm kom zoo. Yog koj ua li no, koj lub neej thiaj muaj ntsiab rau thiab koj thiaj saib koj tus kheej muaj nuj nqis.
Txhob xaiv hauj lwm.
Phau Vajlugkub qhia tias: “Ua neeg nquag koj lub neej thiaj li muaj nplua mias.”—Pajlug 14:23.
Zoo siab hlo ua txoj hauj lwm uas tsis zoo li txoj qub. Tej zaum koj yuav tau ua txoj hauj lwm qes qes los sis ib txoj uas them tsis ntau npaum li txoj qub.
Rau siab ntso nrhiav.
Phau Vajlugkub qhia tias: “Mus cog qoobloo thaum sawv ntxov thiab thaum yuav tsaus ntuj, rau qhov koj twb tsis paub hais tias cov twg yuav hlob zoo dua.”—Tej Lus Qhia 11:6.
Rau siab ntso nrhiav hauj lwm. Qhia rau koj cov txheeb ze, cov koj paub, cov koj nrog ua hauj lwm dhau los, thiab cov neeg zej zog paub tias koj tab tom nrhiav hauj lwm. Tsis tas li ntawd, mus nrhiav ntawm tej tsev, tej ntawv thiab tej vej xaij uas nrhiav neeg ua hauj lwm. Ua ntej koj yuav tau ib txoj hauj lwm, tej zaum koj yuav tau mus tso ntawv nrhiav hauj lwm ntau qhov thiab tej tsev hauj lwm yuav hu koj mus nug ntau zaus.