Dab Ntxwg Nyoog Zoo Li Cas?

Phau Vajlugkub qhia li no

Peb pom tsis tau dab Ntxwg Nyoog, vim nws yog ib tug plig.—Efexus 6:11, 12.

Tib neeg ib txwm xav tias Ntxwg Nyoog txaus ntshai heev, nws muaj ob tug kub, muaj ib tug ko tw thiab tuav rawv ib rab hmuv muaj peb nkhib.

Ib txhia hais tias dab Ntxwg Nyoog txaus ntshai heev, nws muaj ob tug kub, muaj ib tug ko tw, thiab tuav rawv ib rab hmuv muaj peb nkhib. Tos tib neeg hais li ntawd los, vim lawv hnov los ntawm tej dab neeg tias Ntxwg Nyoog zoo li cas. Yav thaum ub, tib neeg thiaj kos duab li lawv tau hnov.

Phau Vajlugkub hais li cas txog dab Ntxwg Nyoog?

Phau Vajlugkub tsis qhia tias dab Ntxwg Nyoog muaj lub cev zoo li cas tiam sis qhia txog nws tus cwj pwm. Phau Vajlugkub muab nws piv li no:

Ib tug tim tswv ceeb tsheej uas ci ntsa iab. Nws ua txuj coj zoo kom tib neeg mloog nws hais es txhob mloog Vajtswv lus.—2 Kauleethaus 11:14.
Tus tsov ntxhuav uas nyooj laws. Nws ua lim hiam heev rau cov uas teev tiam Vajtswv.—1 Petus 5:8.
Tus nab txwj nab laug. Nws yog ib tug uas txaus ntshai heev, nws muaj hwj chim, thiab nyiam tsim kev kub ntxhov.—Tshwmsim 12:9.

Tej nqe Vajlugkub uas piav txog dab Ntxwg Nyoog

2 Kauleethaus 11:14: “Txawm yog dab ntxwgnyoog los nws twb txia tau ua li ib tug timtswv ceebtsheej uas muaj hwjchim ci ntsa iab.”

Nqe no txhais tias: Dab Ntxwg Nyoog ua txuj coj zoo kom ntxias tau tib neeg mloog nws lus es txhob mloog Vajtswv lus.
Efexus 6:11: “Nej yuav tsum muab tej cuabyeej uas Vajtswv pub rau nej lawm los hnav. Yog nej ua li ntawd thaum dab Ntxwgnyoog tuaj ntxias nej, nej thiaj yuav kovyeej.”

Nqe no txhais tias: Dab Ntxwg Nyoog lub hom phiaj yog ua kom peb txhob mloog Vajtswv lus.
Yakaunpaus 4:7: “Nej cia li mloog Vajtswv lus. Nej yuav tsum tawmtsam dab Ntxwgnyoog, dab thiaj yuav khiav ntawm nej mus.”

Nqe no txhais tias: Yog ib tug mloog Vajtswv lus nws yeej yuav kov yeej dab Ntxwg Nyoog.
1 Petus 5:8: “Nej yuav tsum ceevfaj zov zoo tsis txhob nkees, rau qhov dab Ntxwgnyoog tus uas yog nej tus yeebncuab, nws mus mus los los ib yam li tus tsov ntxhuav uas quaj nrhiav tom tsiaj noj.”

Nqe no txhais tias: Dab Ntxwg Nyoog ntxub cov uas teev tiam Vajtswv thiab nws ua ib puas tsav yam los rhuav lawv txoj kev sib raug zoo nrog Vajtswv.