Ua Li Cas Koj Thiaj Yuav Paub Vajtswv Zoo?

Phau Vajlugkub qhia li no

Thaum koj kawm txog Vajtswv thiab xyaum coj lub neej kom haum nws siab ces koj yeej yuav paub nws zoo xwb. Vajtswv “yuav los nyob ze” koj. (Yakaunpaus 4:8) Phau Vajlugkub qhia kom peb tso siab tau tias “Vajtswv nyob tsis deb ntawm peb txhua tus.”​—Tes Hauj Lwm 17:27.

• Yuav ua li cas thiaj paub Vajtswv

• Tej uas neeg xav yuam kev txog Vajtswv

Yuav ua li cas thiaj paub Vajtswv

Nyeem Phau Vajlugkub

• Phau Vajlugkub qhia tias: “Vajtswv Txojlus txhua zaj puavleej yog Vajtswv tshoov neeg lub siab kom neeg sau.”​—2 Timautes 3:16.

• Txhais tias: Lub tswv yim hauv phau Vajlugkub yog Vajtswv lub. Nws muab nws lub tswv yim tso rau hauv cov neeg uas sau phau Vajlugkub ntawd lub siab. Phau Vajlugkub zoo tsis thooj li lwm phau rau qhov nyob rau hauv, Vajtswv qhia tej uas nws lub siab nyiam rau peb paub. Nws kuj qhia peb txog nws tej yeeb yam qhuas lug xws li kev hlub, kev ncaj ncees, thiab nws txoj kev khuv leej.​—Khiav Dim 34:6; 2 Kevcai 32:4.

• Koj ua tau dab tsi: Nyeem phau Vajlugkub txhua txhua hnub. (Yausuas 1:8) Ua tib zoo xav txoj tej uas koj nyeem thiab nug koj tus kheej li no: ‘Tej uas kuv nyeem no qhia kuv li cas txog Vajtswv?’​—Phau Ntawv Nkauj 77:12.

  Muab ua pib txwv li no, nyeem Yelemis 29:11, thiab nug koj tus kheej tias: ‘Vajtswv xav kom kuv tau dab tsi​—kev vam meej los sis kev puas tsuaj? Nws puas yog ib tug Vajtswv uas nyiam pauj kev chim, los sis nws puas xav kom kuv tau lub neej zoo yav tom ntej?’

Ua tib zoo saib tej uas Vajtswv tsim

• Phau Vajlugkub qhia li no: “Saib tej uas Vajtswv tsim txij thaum ntuj tsim teb raug los, lawv yeej paub tias Vajtswv zoo li cas.”​—Loos 1:20.

• Txhais tias: Tej uas Vajtswv tsim qhia peb ntau yam txog nws tus yam ntxwv, ib yam li thaum peb saib ib daim duab pleev xim zoo zoo nkauj los sis ib lub tshuab uas tsim tau zoo heev yeej qhia tau rau peb txog tus neeg ntawd. Piv txwv li no, qhov uas tib neeg lub hlwb ua hauj lwm thiab khiav zoo li cas mus rau li cas qhia peb txog Vajtswv lub tswv yim, thiab qhov uas lub hnub thiab tej hnub qub kub ci ntsa iab tsis txawj tuag qhia peb txog Vajtswv lub hwj chim.​—Phau Ntawv Nkauj 104:24; Yaxayas 40:26.

• Koj ua tau dab tsi: Lauj sij hawm los ua tib zoo saib thiab kawm txog tej uas Vajtswv tsim uas nyob ib ncig peb. Thaum koj ua li ntawd ces nug koj tus kheej tias, ‘Tej uas kuv pom no qhia kuv li cas txog Vajtswv?’a Tseeb tiag, tej uas Vajtswv tsim yeej qhia tsis tau txhua yam txog peb tus Tswv Tsim. Vim li ntawd Vajtswv thiaj muab phau Vajlugkub los rau peb.

Siv Vajtswv lub npe

• Phau Vajlugkub qhia li no: “Kuv yuav tiv thaiv nws vim nws paub kuv lub npe. Nws yuav thov kuv, thiab kuv yuav teb nws tej lus thov.”​—Phau Ntawv Nkauj 91:14, 15, Phau Qab Ntuj Tshiab.

• Txhais tias: Vajtswv lub npe hu ua Yehauvas. Vajtswv yuav saib xyuas cov uas paub thiab hwm nws lub npe.b (Phau Ntawv Nkauj 83:18; Malakis 3:16) Qhov uas Vajtswv qhia nws lub npe rau peb paub, qhia tias Nws yeej xav kom peb paub nws. Vajtswv hais tias, “Kuv hu ua Yehauvas. Ntawm no yog kuv lub npe.”​—Yaxayas 42:8, Phau Qab Ntuj Tshiab.

• Koj ua tau dab tsi: Siv Yehauvas lub npe thaum koj tham txog nws.

Thov Yehauvas

• Phau Vajlugkub qhia li no: Yehauvas “nyob ze txhua tus uas thov nws.”​—Phau Ntawv Nkauj 145:18.

• Txhais tias: Yehauvas nyob ze tus uas thov nws thiab tso siab rau nws. Kev thov Vajtswv yog ib qhov ntawm txoj kev pe hawm uas qhia tias peb yeej hwm Vajtswv tiag tiag li.

• Koj ua tau dab tsi: Thov Vajtswv txhua txhua hnub. (1 Thexalaunikes 5:17) Qhia koj tej kev txhawj xeeb thiab tej uas nyob hauv koj nruab siab rau nws paub.​—Phau Ntawv Nkauj 62:8.c

Muaj kev ntseeg rau Vajtswv

• Phau Vajlugkub qhia li no: “Tus uas tsis ntseeg yeej ua tsis tau haum Vajtswv siab.”​—Henplais 11:6.

• Txhais tias: Yuav kom peb txav ze tau rau Vajtswv, peb yuav tsum ntseeg nws. Phau Vajlugkub hais tias qhov uas muaj kev ntseeg tsis yog txhais tias yus ntseeg tias muaj Vajtswv xwb. Tiam sis kuj txhais tias yus yeej tso siab plhuav rau nws, tsis hais nws tej lus cog tseg thiab nws tej kev cai huv si. Yuav kom yus muaj kev sib raug zoo nrog ib tug twg, tseem ceeb heev tias yus yuav tsum muaj kev sib ntseeg siab thiab.

• Koj ua tau dab tsi: Yuav tsum muaj kev kawm thiaj muaj tau kev ntseeg tiag tiag. (Loos 10:17) Yog li, cia li kawm phau Vajlugkub es koj thiaj qhia tau rau koj tus kheej tias koj yeej tso siab tau rau Vajtswv thiab nws tej lus qhuab qhia. Yehauvas Cov Tim Khawv zoo siab yuav qhia Vajlugkub rau koj.d

Ua tej uas haum Vajtswv siab

• Phau Vajlugkub qhia li no: “Qhov uas peb hlub Vajtswv yog peb ua raws li tej lus uas Vajtswv hais.”​—1 Yauhas 5:3.

• Txhais tias: Thaum peb mloog Yehauvas lus, ces qhia tias peb hlub nws.

• Koj ua tau dab tsi: Thaum koj kawm phau Vajlugkub, ua tib zoo kawm seb Vajtswv nyiam thiab tsis nyiam yam twg. Nug koj tus kheej seb, ‘Kuv yuav pauv kuv lub neej li cas thiaj ua tau rau tus Tsim kuv zoo siab?’​—1 Thexalaunikes 4:1.

Thaum koj ua li Vajtswv hais ces koj yuav pom nws txoj kev pab

• Phau Vajlugkub qhia li no: “Thaum koj pom kiag tej uas Vajtswv tau pab koj lawm ces koj yuav paub tias Vajtswv yeej zoo tiag.”​—Phau Ntawv Nkauj 34:8, Phau Qab Ntuj Tshiab.

• Txhais tias: Vajtswv xav kom koj pom seb nws zoo npaum li cas. Thaum koj pom nws txoj kev hlub thiab txoj kev pab, ces koj yuav xav txav los ze rau nws.

• Koj ua tau dab tsi: Thaum koj nyeem phau Vajlugkub, muab tej uas koj kawm coj los siv rau hauv koj lub neej. (Yaxayas 48:17, 18) Thiab mus saib cov uas Vajtswv tau pab lawm thev dhau lawm tej kev sim siab, pab lawv kho tau lawv thiab lawv tsev neeg lub neeg, thiab seb lawv tau ua li cas thiaj nrhiav tau kev zoo siab tiag tiag.e

Xav yuam kev txog Vajtswv

Xav Yuam Kev: Vim peb tsis pom Vajtswv ces peb tsis muaj peev xwm paub tau nws.

Qhov Tseeb: Muaj tej yam uas yuav tsis yooj yim rau peb nkag siab txog Vajtswv xws li tias nws yog ib tug Plig. Txawm li ntawd los, peb yeej muaj tau kev sib raug zoo nrog Vajtswv. Phau Vajlugkub hais tias peb yuav tsum los paub Vajtswv peb thiaj yuav tau txoj sia ib txhis tsis kawg. (Yauhas 17:3) Phau Vajlugkub qhia peb txog peb tus Tswv Tsim, nws tus yam txwv, nws lub ntsiab rau noob neej thiab lub ntiaj teb, thiab nws tej kev cai. (Yaxayas 45:18, 19;1 Timautes 2:4) Raws li tau hais lawm, phau Vajlugkub kuj qhia peb txog Vajtswv lub npe. (Phau Ntawv Nkauj 83:18) Peb tsis yog paub Vajtswv xwb tiam sis peb kuj txav ze tau rau nws thiab.​—Yakaunpaus 4:8.